NSS - နိုဝင်ဘာ ၂၇

(၃)နှစ်ကျော်ကာလအတွင်း လျှပ်စစ်ဓာတ်အားပေးတာဝါတိုင် (၈၁)ခု ဖျက်ဆီးခံခဲ့ရပြီး အကြမ်းဖက်များအနေဖြင့် ဒီမိုကရေစီဗန်းပြကာ နိုင်ငံအလုံးစုံပျက်သုဉ်းရေးကို ဦးတည်ဆောင်ရွက်နေကြောင်း နစကမှ  (နိုဝင်ဘာလ ၂၆ ရက်)တွင် ထုတ်ပြန်ထားခြင်းဖြစ်သည်။

အကြမ်းဖက်ပူးပေါင်းအဖွဲ့များသည် နိုင်ငံပိုင်ဘဏ်များ အပါအဝင် ပုဂ္ဂလိကပိုင်ဘဏ်များ၊ ဌာနဆိုင်ရာရုံးများ၊ နိုင်ငံတော်ပိုင်ပစ္စည်းများ၊ ပုဂ္ဂလိကပိုင်ပစ္စည်းများ၊ စက်ရုံ၊ အလုပ်ရုံများ၊ တယ်လီဖုန်းတာဝါတိုင်များနှင့် လျှပ်စစ်ဓာတ်အားလိုင်းတာဝါတိုင်များကို မီးရှို့ဖျက်ဆီးခြင်းများ နှင့် ပစ္စည်းများလုယက်ခြင်းတို့ကို ကျူးလွန်နေကြောင်း နစကမှ အသိပေးထားသည်။

ထို့သို့ အကြမ်းဖက်အဖွဲ့များ၏ မိုင်းထောင်ဖောက်ခွဲခြင်း နှင့် မီးရှို့ဖျက်ဆီးခြင်းတို့ကြောင့် ၂၀၂၁ ခုနှစ်၊ ဖေဖော်ဝါရီလ ၂ ရက်မှ ၂၀၂၃ ခုနှစ်၊ နိုဝင်ဘာလ ၁၆ ရက်အထိ လျှပ်စစ်ဓာတ်အားပေးတာဝါတိုင် (၈၁) ခု ပျက်စီးဆုံးရှုံးခဲ့ရကြောင်း နစကမှ ထုတ်ပြန်ထားသည်။

 “ဒီလိုဆောင်ရွက်တဲ့နေရာမှာ လျှပ်စစ်ဓာတ်အားပေး တာဝါတိုင် ၈၁ ခု ပျက်စီးခဲ့ကြောင်း တွေ့ရပါတယ်။ မိုင်းထောင် ဖောက်ခွဲဖျက်ဆီးတာ အဓိကဖြစ်ပါတယ်။ အဓိကအားဖြင့် ကယားပြည်နယ်အတွင်းမှာ ဖြစ်ခဲ့တာဖြစ်ပါတယ်။ ကျွန်တော်တို့နိုင်ငံရဲ့ လျှပ်စစ်စွမ်းအားကဏ္ဍသည် တစ်နိုင်ငံလုံး လိုအပ်တဲ့အတိုင်း အတာအထိပေးနိုင်တဲ့ လုံလောက်မှုမရှိသေးပါဘူး။ မလုံလောက်တဲ့ကြားကနေ နိုင်ငံတော်အစိုးရအနေနဲ့ အစိုးရအဆက်ဆက်အနေနဲ့ လျှပ်စစ်စွမ်းအားကဏ္ဍ ဖွံ့ဖြိုးတိုးတက်ရေးကို နည်းလမ်းပေါင်းစုံနဲ့ ဆောင်ရွက်နေတာဖြစ်ပါတယ်”ဟု နစကပြောခွင့်ရ ဗိုလ်ချုပ်ဇော်မင်းထွန်းက ပြောသည်။

လျှပ်စစ်ဓာတ်အားပေးတာဝါတိုင်မိုင်းခွဲခံရမှု ဖြစ်စဉ်အများအပြားသည် ကယားပြည်နယ်အတွင်း၌ ဖြစ်ပွားခဲ့ခြင်းဖြစ်ကြောင်း သိရသည်။

“ဒီလိုနည်းလမ်းပေါင်းစုံနဲ့ ဆောင်ရွက်နေတဲ့ကြားက ဒီအဖျက်လုပ်ငန်းများကြောင့် လျှပ်စစ်ဓာတ်အားပေးလိုင်းများ ပျက်စီးရခြင်း၊ လျှပ်စစ်ဓာတ်အားခွဲစက်ရုံများ ပျက်စီးရခြင်းကြောင့် နိုင်ငံရဲ့လူမှုစီးပွားဘဝသည် တိုးတက်သင့်သလောက် မတိုးတက်ဘဲနဲ့ နှောင့်နှေးနေတာကို တွေ့ရမှာဖြစ်ပါတယ်။ အကြမ်းဖက်သောင်းကျန်းသူတွေအနေနဲ့ ပြည်သူလူထုလိုလားတဲ့ ဒီမိုကရေစီအရေးဆိုတာကိုဗန်းပြပြီး တစ်နိုင်ငံလုံး အလုံးစုံပျက်သုဉ်းရေးကို ဦးတည်ဆောင်ရွက်နေတာဖြစ်ပါတယ်”ဟု ၎င်းက ထပ်မံပြောသည်။

အဆိုပါ လျှပ်စစ်ဓာတ်အားပေးတာဝါတိုင်များအား မိုင်းထောင်ဖောက်ခွဲခြင်း နှင့် မီးရှို့ဖျက်ဆီးခြင်းများကြောင့် နိုင်ငံတော်ဖွံ့ဖြိုးတိုးတက်ရေး နှင့် လျှပ်စစ်မီးနေ့စဉ် အသုံးပြုလျက်ရှိသည့် ပြည်သူလူထုအတွက် များစွာထိခိုက်နစ်နာဆုံးရှုံးမှုများ ဖြစ်ပေါ်လျက်ရှိသည်။