မြူနစ် (NSS) - နိုဝင်ဘာ ၂၅

တရုတ်နိုင်ငံ၊ တပ်မတော်ရေ၏ စစ်သင်္ဘောများသည် မြန်မာနိုင်ငံသို့ ချစ်ကြည်ရေးခရီးအဖြစ် လာရောက်လည်ပတ်ရန်ရှိကြောင်း နစကထံမှ သိရသည်။

မြန်မာ-တရုတ်နှစ်နိုင်ငံ တပ်မတော်ချင်းပူးပေါင်းဆောင်ရွက်မှုသည် ခိုင်မြဲလျက်ရှိကြောင်း နစကပြောခွင့်ရ ဗိုလ်ချုပ်ဇော်မင်းထွန်းက မီဒီယာများကို ပြောသည်။

“တရုတ်ပြည်သူ့သမ္မတနိုင်ငံ၊ တပ်မတော်ရေရဲ့ ရေတပ်စစ်သင်္ဘောများလည်း မြန်မာနိုင်ငံကို ချစ် ကြည်ရေးခရီး မကြာခင်မှာ လာရောက်လည်ပတ်ဖို့ရှိပါတယ်။ တရုတ်-မြန်မာနှစ်နိုင်ငံ တပ်မတော်ချင်းပူးပေါင်းဆောင်ရွက်မှုသည် ခိုင်မြဲလျက်ရှိကြောင်း နဲ့ ချစ်ကြည်ရင်းနှီးစွာတည်ဆောက်လျက်ရှိကြောင်း ပြောကြားလိုပါတယ်”ဟု ဗိုလ်ချုပ်ဇော်မင်းထွန်းက ပြောသည်။

အဆိုပါတရုတ်စစ်သင်္ဘောများသည် လာမည့် နိုဝင်ဘာလ ၂၇ ရက်တွင် ရန်ကုန်မြို့သို့ ရောက်ရှိလာမည်ဖြစ်ကြောင်း မြန်မာ့တပ်မတော်ရေနှင့်နီးစပ်သော သတင်းအရင်းအမြစ်တစ်ဦးကလည်း NP News ကို အသိပေးထားသည်။

လက်ရှိတွင် တရုတ်နိုင်ငံသည် မြန်မာနိုင်ငံ၏ ပြည်တွင်းရေးကို ဝင်ရောက်မစွက်ဖက်သော မူဝါဒအပေါ်တွင်သာ ဆက်လက်ရပ်တည်နေကြောင်း နစကမှ ယုံကြည်ထားသည်။

“အခုက ချစ်ကြည်ရေးခရီးဖြစ်ဖို့ များပါတယ်။ ရုရှားနဲ့လည်း ရေတပ်ပူးတွဲလေ့ကျင့်တာ လုပ်တာပေါ့။ အဲဒီတော့ အိမ်နီးနားချင်း တရုတ်နဲ့လည်း လုပ်မှာပေါ့။ နောက်အိန္ဒိယနဲ့လည်း လုပ်မယ်ဆိုတဲ့သတင်းက ထွက်နေပြီးပြီလေ။ ဒီစစ်ရေးလေ့ကျင့်မှု လုပ်တာက ချစ်ကြည်မှုနဲ့ တပ်မတော်ချင်း သွေးစည်းခိုင်မာမှုကို ပြတဲ့သဘောဖြစ်တာပေါ့။ သံခင်းတမန်ခင်းရယ်၊ တပ်ပိုင်းဆိုင်ရာ ယုံယုံကြည်ကြည် နဲ့ ချစ်ကြည်မှုကို ပြတယ်လို့ပဲ မြင်ပါတယ်။ အရှေ့မြောက်ပိုင်းနဲ့လည်း ဆက်စပ်ကောင်း ဆက်စပ်နိုင်တာပေါ့”ဟု ရခိုင့်ဦးဆောင်ပါတီဥက္ကဋ္ဌ ဒေါက်တာအေးမောင်က သုံးသပ်ပြောကြားသည်။

တရုတ်နိုင်ငံသည် မြန်မာနိုင်ငံအား တည်ငြိမ်သော နိုင်ငံရေးအခင်းအကျင်းတစ်ခုဖြစ်ရန် လိုလားပြီး ပြည်တွင်းရေးအား ဝင်ရောက်မစွက်ဖက်သည့်မူကို ကိုင်စွဲထားကြောင်းလည်း ဒေါက်တာအေးမောင်က သုံးသပ်ထားသည်။

အလားတူ အရာရှိစစ်သည် (၈၀၀)ခန့် လိုက်ပါလာသည့် ရုရှားစစ်သင်္ဘော (၃)စင်းသည်လည်း ယခု နိုဝင်ဘာလ ၂ ရက်တွင် ရန်ကုန်မြို့သို့လာရောက်ခဲ့သည်။

ရုရှားစစ်သင်္ဘော(၃)စင်းသည် ပထမဆုံးအကြိမ်အဖြစ် မြန်မာ-ရုရှားရေကြောင်းလုံခြုံရေးဆိုင်ရာလေ့ ကျင့်ခန်းဆောင်ရွက်ရန်အတွက် မြန်မာနိုင်ငံသို့ လာရောက်ခဲ့ခြင်းဖြစ်ပြီး လေ့ကျင့်မှုများကို တနင်္သာရီ တိုင်း၊ မြိတ်မြို့အနီးရှိ ပင်လယ်ပြင်၌ ပြုလုပ်ခဲ့ကြောင်း သိရသည်။