မြူနစ် (NSS) - နိုဝင်ဘာ ၂၄

KNPP ပူးပေါင်းအဖွဲ့၏ ဖမ်းဆီးခြင်းခံခဲ့ရသော လွိုင်ကော်တက္ကသိုလ်မှ ပညာရေးဝန်ထမ်းနှင့် မိသားစုဝင် (၁၀၀)ကျော် ပြန်လည်လွတ်မြောက်လာခဲ့ကြောင်း သိရသည်။

လွိုင်ကော်တက္ကသိုလ်မှ နည်းပြ၊ သရုပ်ပြအပါအဝင် ဝန်ထမ်း (၇၀)ဦး နှင့် မိသားစုဝင် (၃၇)ဦး စုစုပေါင်း (၁၀၇)ဦးကို နေရပ်ပြန်နိုင်ရေးအတွက် သက်ဆိုင်ရာအဖွဲ့အစည်းထံသို့ လွှဲပြောင်းအပ်နှံလိုက်ကြောင်း IEC ဘက်က ယနေ့(နိုဝင်ဘာလ ၂၄ ရက်) တွင် အသိပေးထုတ်ပြန်ထားသည်။

ထိုသို့ ပြန်လည်လွတ်မြောက်လာသည့် လွိုင်ကော်တက္ကသိုလ်မှ ဝန်ထမ်းနှင့်မိသားစုဝင် (၁၀၇)ဦးကို ရှမ်းပြည်နယ်၊ တောင်ကြီးမြို့အဝင်၌ တပ်မတော်ဘက်က လက်ခံရယူခဲ့ကြောင်း NSS ၏ တောင်ကြီးမြို့ခံသတင်းရင်းမြစ်က ပြောသည်။

အဆိုပါတက္ကသိုလ်မှ ဝန်ထမ်းများနှင့် မိသားစုဝင်(၁၀၇)ဦးသည် ၎င်းတို့ဖမ်းဆီးခံထားရသောနေရာမှ ယမန်နေ့(နိုဝင်ဘာလ ၂၃ ရက်) ညပိုင်းတွင် စတင်ထွက်ခွာလာခဲ့ပြီး ယနေ့ နံနက်ပိုင်းအချိန်၌ လမ်းခုလပ်ရှိ ဘုန်းကြီးကျောင်းတစ်ကျောင်းတွင် နံနက်စား ဝင်စားပြီးနောက် တောင်ကြီးမြို့သို့ ရောက်ရှိခဲ့ခြင်းဖြစ်ကြောင်း သိရသည်။

“လွိုင်ကော်ကို ပို့တာ မဟုတ်ဘူး။ တောင်ကြီးကို ပို့တာ။ တောင်ကြီးက တပ်မတော်နဲ့ချိတ်ပြီးတော့မှ လွှဲအပ်တာလို့ သိရတယ်။ တောင်ကြီးမြို့အဝင် သူတို့ချိန်ထားတဲ့နေရာမှာ လွှဲပြောင်းပေးတာလို့ သိရတယ်။ စစ်တပ်က လာကြိုတယ်။ တောင်ကြီးမြို့အဝင်မှာ။ ဝန်ထမ်း (၇၀)ဦးနဲ့ မိသားစုဝင် (၃၇)ဦး စုစုပေါင်း (၁၀၇) ယောက်ပေါ့။ အခုတော့ တောင်ကြီး တက္ကသိုလ်မှာ သီးသန့်ထားတယ်လို့ သိရတယ်” ဟု အထက်ပါသတင်းရင်းမြစ်က ပြောသည်။

လက်ရှိတွင် ပြန်လည်လွတ်မြောက်လာသော လွိုင်ကော်တက္ကသိုလ်မှ ဝန်ထမ်းများနှင့်မိသားစုဝင်များသည် အဝတ်တစ်ထည် ကိုယ်တစ်ခု၊ ဖုန်းဖြင့်သာ ပြန်လည်လွတ်မြောက်လာခဲ့ခြင်းဖြစ်ပြီး လက်ဝတ်လက်စားများမှာ သိမ်းဆည်းခံခဲ့ရကြောင်း သိရသည်။

“လက်ဝတ်လက်စား၊ ငွေကြေးတွေကို အကုန်လုံးယူထားတယ်လို့ သိရတယ်။ ဖုန်းကိုလည်း စစ်ဆေးပြီးတော့မှ ဘယ်သူတွေနဲ့ အဆက်အသွယ်ရှိလဲ၊ ဘာညာမှတ်တမ်းယူပြီးတော့မှ ဖုန်းတွေကို ပြန်ပေးလိုက်တယ်လို့ သိရတယ်။ အဝတ်တစ်ထည်ကိုယ်တစ်ခုနဲ့ ပြန်ရတဲ့သဘောပေါ့” ဟု တောင်ကြီးမြို့ခံသတင်းရင်းမြစ်က ဆက်လက်ပြောသည်။

KNPP ပူးပေါင်းအဖွဲ့များသည် (၁၁.၁၁ စစ်ဆင်ရေး)အမည်ဖြင့် ကယားပြည်နယ်ရှိ လွိုင်ကော်မြို့ကို ဝင်ရောက်တိုက်ခိုက်စဉ် လွိုင်ကော်တက္ကသိုလ်မှ ပါမောက္ခချုပ်ဒေါက်တာအောင်ခင်မြင့်အပါအဝင် ဆရာ၊ ဆရာမ၊ ဝန်ထမ်းနှင့် မိသားစုဝင် (၂၀၄)ဦးကို ဖမ်းဆီးခေါ်ဆောင်သွားခဲ့ကြောင်း သိရသည်။

“အဖမ်းခံရတဲ့ တက္ကသိုလ်ဆရာ၊ ဆရာမတွေထဲက နည်းပြနဲ့ နည်းပြရဲ့အောက် ဝန်ထမ်းတွေကို လွှတ်ပေးတယ်။ နည်းပြရဲ့အထက်ကိုတော့ မလွှတ်ပေးသေးဘူး။ လက်ထောက်ကထိကနဲ့အထက်ကို ချန်ထားတယ် မလွှတ်သေးဘူး”ဟု တောင်ကြီးမြို့ခံသတင်းရင်းမြစ်က ဆက်လက်ပြောသည်။

လက်ရှိတွင် လွိုင်ကော်တက္ကသိုလ်မှ ပါမောက္ခချုပ်ဒေါက်တာအောင်ခင်မြင့်အပါအဝင် ဆရာ၊ ဆရာမဦးရေ (၁၀၀)နီးပါးသည် ဆက်လက်ဖမ်းဆီးခံထားရဆဲ ဖြစ်ကြောင်းသိရသည်။