Pika (NSS) - နိုဝင်ဘာ ၂၂

နေတိုးအဖွဲ့ဝင်နိုင်ငံ (သို့မဟုတ်) ဘော်လ်ကန်ဒေသအပေါ် ရုရှား၏ စစ်ရေးအရခြိမ်းခြောက်မှုများကို မမြင်မိကြောင်း နေတိုးအဖွဲ့အတွင်းရေးမှူးချုပ် ဂျန်စတိုလ်တန်ဘာ့ချ်က ထုတ်ဖော်ပြောခဲ့သည်။

ဂျန်စတိုလ်တန်ဘာ့ချ်သည် ၂ဝ၁၉ ခုနှစ်တွင် နေတိုးအဖွဲ့နှင့်ပူးပေါင်းခဲ့သော ယူဂိုဆလပ်သမ္မတနိုင်ငံဟောင်းဖြစ် သည့် North Macedonia နိုင်ငံသို့ အလည်အပတ်ရောက်ရှိနေချိန်တွင် ယခုကဲ့သို့ ထုတ်ဖော်ပြောဆိုခဲ့ခြင်းဖြစ်သည်။ 

North Macedonia နိုင်ငံဝန်ကြီးချုပ် Dimitar Kovacevski နှင့် ပူးတွဲသတင်းစာရှင်းလင်းပွဲတစ်ခုအတွင်း ဂျန်စတိုလ်တန်ဘာ့ချ်သည် ရုရှားနိုင်ငံက ဘော်လ်ကန်ဒေသကို မတည်မငြိမ်ဖြစ်အောင် လုပ်ဆောင်ရန် အစီအစဉ် ရှိနေကြောင်း ယူကရိန်းသမ္မတဇီလန်စကီး၏ ထုတ်ဖော်ပြောဆိုချက်များနှင့်ပတ်သက်ပြီး မေးမြန်းခံရသည့်အချိန် တွင် ယခုကဲ့သို့ထုတ်ဖော်ပြောဆိုခဲ့ခြင်းဖြစ်သည်။

ဂျန်စတိုလ်တန်ဘာ့ချ် က "နေတိုးအဖွဲ့ဝင်နိုင်ငံတွေ ဒါမှမဟုတ် ဘော်လ်ကန်ဒေသအပေါ် ရုရှားရဲ့ စစ်ရေးအရ ခြိမ်းခြောက်မှုတွေကို ကျွန်တော်တို့မမြင်မိပါဘူး။ဒါပေမယ့် သေချာတာကတော့ ကျွန်တော်တို့ သတိကြီးကြီးထား နေတုန်းပါပဲ။ ရုရှားရဲ့လုပ်ဆောင်မှုတွေကို ကျွန်တော်တို့ အနီးကပ်စောင့်ကြည့်နေပြီး စည်းလုံးညီညွတ်စွာရှိ နေပါတယ်" ဟု ပြောခဲ့သည်။

ထို့အပြင် ယူကရိန်းသမ္မတဇီလန်စကီးက အခိုင်အမာပြောဆိုခဲ့သည့် ရုရှားဖက်က စစ်ရေးအရ ခြိမ်းခြောက်မှုမျိုး လည်းမရှိခဲ့ကြောင်း ဂျန်စတိုလ်တန်ဘာ့ချ်က အခိုင်အမာပြောခဲ့သည်။ ရုရှားနိုင်ငံသည် အရှေ့အလယ်ပိုင်းဒေသ တွင် လက်ရှိဖြစ်ပွားနေသော ပဋိပက္ခ၏နောက်ကွယ်တွင် ရှိနေပြီး ယူကရိန်းအပေါ် ကမ္ဘာကြီး၏အာရုံစိုက်မှုများကို လွှဲစေရန်အတွက် ဘော်လ်ကန်ဒေသနှင့် မော်လ်ဒိုဗာနိုင်ငံတို့ကို ဖြိုခွင်းရန်ကြံစည်နေကြောင်း ယူကရိန်းသမ္မတ ဇီလန်စကီးက အခိုင်အမာပြောခဲ့သည်။

ဇီလန်စကီး က "ဘော်လ်ကန်ဒေသကို အာရုံစိုက်ကြပါ။ ကျွန်တော်တို့ သတင်းအချက်အလက်တွေ ရရှိထားတာ မလို့ ကျွန်တော့်ကို ယုံကြည်ကြပါ။ ရုရှားမှာ ရှည်လျားတဲ့အစီအစဉ်တစ်ခုရှိပါတယ်။ ဒီကိစ္စနဲ့ပတ်သက်ပြီး ကမ္ဘာပေါ် မှာရှိတဲ့နိုင်ငံတွေက ဘာမှမလုပ်ကြဖူးဆိုရင် အရှေ့အလယ်ပိုင်းဒေသမှာဖြစ်ပွားနေတဲ့ပဋိပက္ခလိုပဲ နောက်ထပ် ပဋိပက္ခတစ်ခု ထပ်မံဖြစ်ပွားလာပါလိမ့်မယ်" ဟု ပြောခဲ့သည်။