Pika (NSS) - နိုဝင်ဘာ ၂ဝ 

မြန်မာနိုင်ငံမြောက်ပိုင်းတွင် မြန်မာ့တပ်မတော်နှင့် လက်နက်ကိုင်တပ်ဖွဲ့များကြား တိုက်ပွဲဖြစ်ပွားမှု ပိုမိုအရှိန်မြင့် လာခြင်းကြောင့် ပိတ်မိနေသော ထိုင်းနိုင်ငံသား(၂ဝဝ)ကျော်ကို တရုတ်နိုင်ငံမှ တစ်ဆင့် ထိုင်းနိုင်ငံသို့ ဘေးကင်းစွာ ရွှေ့ပြောင်းပေးနိုင်ခဲ့ကြောင်း ထိုင်းနိုင်ငံခြားရေးဝန်ကြီးဌာနက နိုဝင်ဘာလ(၁၉)ရက်တွင် ထုတ်ဖော်ပြောခဲ့သည်။ 

မြန်မာအာဏာပိုင်များ၏ အကူအညီဖြင့် ထိုင်းနိုင်ငံသား(၂၆၆)ဦး၊ ဖိလစ်ပိုင်နိုင်ငံသားများ နှင့် စင်ကာပူနိုင်ငံသား များပါဝင်သော အဖွဲ့တစ်ဖွဲ့ကို  ရှမ်းပြည်နယ်မြောက်ပိုင်းလောက်ကိုင်မြို့မှ မြန်မာ-တရုတ်နယ်စပ်သို့ ဘေးကင်းစွာ ရွှေ့ပြောင်းပေးနိုင်ခဲ့ကြောင်း ထိုင်းနိုင်ငံခြားရေးဝန်ကြီးဌာနက ပြောကြားခဲ့သည်။ 

အဆိုပါအဖွဲ့ကို တရုတ်နိုင်ငံအတွင်းသို့ ဝင်ရောက်ခွင့်ပေးမည်ဖြစ်ပြီး ကူမင်းမြို့မှ ဘန်ကောက်မြို့သို့ လေယာဉ် နှစ်စင်းဖြင့် ပို့ဆောင်မည်ဖြစ်ကြောင်း သိရသည်။ ထို့နောက် အဆိုပါထိုင်းနိုင်ငံသားအားလုံးကို လူကုန်ကူးမှု နှင့် မှုခင်းမှတ်တမ်း ရှိ/မရှိ စစ်ဆေးသွားမည်ဖြစ်ကြောင်း ထိုင်းနိုင်ငံခြားရေးဝန်ကြီးဌာနက ပြောကြားခဲ့သည်။

ဘန်ကောက်မြို့သို့ ပျံသန်းမည့် လေယာဉ်ခရီးစဉ်အချိန်ကို ထိုင်းနိုင်ငံခြားရေးဝန်ကြီးဌာနက ထုတ်ဖော်ပြောကြားခဲ့ ခြင်းမျိုးမရှိသော်လည်း အဆိုပါအဖွဲ့သည် နိုဝင်ဘာလ(၁၉)ရက်နေ့တွင် တရုတ်နယ်စပ်သို့သွားရောက်မည် ဖြစ်သည်ဆိုသည့်အချက်ကိုသာ ပြောဆိုခဲ့ကြောင်းသိရသည်။

မြန်မာနိုင်ငံတွင် ပိတ်မိနေသော ထိုင်းနိုင်ငံသားများထဲမှ အချို့မှာ လူကုန်ကူးခံခဲ့ရခြင်းဖြစ်ပြီး အချို့မှာ အွန်လိုင်းကို အသုံးပြုကာလိမ်လည်နေသည့်ဂိုဏ်းများတွင် ပါဝင်ပတ်သက်နေသူများဖြစ်နိုင်ဖွယ်ရှိကြောင်း ထိုင်းအာဏာပိုင် များက အစောပိုင်းတွင်ပြောကြားခဲ့သည်။ မြန်မာနိုင်ငံအပါအဝင် အရှေ့တောင်အာရှသည် အွန်လိုင်းကိုအသုံးပြု ကာ လိမ်လည်နေသော ဂိုဏ်းများနှင့် လူကုန်ကူးမှုများအတွက် အဓိကအချက်အချာကျသည့် နေရာတစ်ခုဖြစ်လာ ကြောင်း ကုလသမဂ္ဂကပြောဆိုခဲ့သည်။

ထို့အပြင် လူသိန်းပေါင်းများစွာသည် ရာဇဝတ်ဂိုဏ်းများ၏ လူကုန်ကူးမှုများကိုခံခဲ့ရပြီး အွန်လိုင်းကိုအသုံးပြုကာ လိမ်လည်နေသော ဂိုဏ်းများနှင့် အခြားတရားမဝင် လုပ်ငန်းများတွင် အတင်းအကျပ်ဖိအားပေး အလုပ်ခိုင်း စေခံခဲ့ရကြောင်း ကုလသမဂ္ဂ၏အဆိုအရ သိရသည်။ ထိုင်းအာဏာပိုင်များနှင့် မြန်မာစစ်တပ်အကြား ညှိနှိုင်း ဆောင်ရွက်ကာ ထိုင်းနိုင်ငံသား(၄၁)ဦးကို ထိုင်းနိုင်ငံသို့ ပြန်လည်ပို့ဆောင်ခဲ့ပြီးနောက် တစ်ရက်အကြာတွင် တရုတ်နယ်စပ်သို့ ပြောင်းရွှေ့မှုထွက်ပေါ်လာခြင်းဖြစ်သည်။