မြူနစ် (NSS) - နိုဝင်ဘာ ၁၃

ရခိုင်ပြည်နယ်၌ တစ်ကျော့ပြန်စစ်ပွဲများကို AA လက်နက်ကိုင်အဖွဲ့ ပြန်လည်ဖော်ဆောင်နေပြီး အစိုးရ၏ နယ်ခြားစောင့်ရဲကင်းစခန်းများ တိုက်ခိုက်ခံနေရကြောင်း သတင်းရရှိသည်။

ရခိုင်လက်နက်ကိုင်အဖွဲ့ ULA/AA သည် ယနေ့(နိုဝင်ဘာလ ၁၃ ရက်)၊ နံနက် ၅ နာရီအချိန်ခန့်တွင် ရခိုင်ပြည်နယ်၊ ရသေ့တောင်နှင့် မင်းပြားမြို့နယ်အတွင်းရှိ နယ်ခြားစောင့်ရဲကင်းစခန်းများကို စတင်တိုက်ခိုက်ခဲ့ခြင်းဖြစ်သည်။

“ရသေ့တောင် အငူမော်ဘက်ခြမ်းမှာရှိတဲ့ ကိုးတန်ကောက်တို့ဘက်မှာ တိုက်ပွဲဖြစ်နေတာပါ။ ရဲကင်းစခန်းတွေက အဲဒီဘက်မှာ တစ်နေရာနဲ့တစ်နေရာ (၃)မိုင်လောက်အတွင်းမှာ ဆက်တိုက်ရှိတယ်လေ။ အဲဒါတွေ အတိုက်ခံရနေတယ်လို့ သိရတယ်။ ရသေ့တောင်ဘက်က တပ်ကတော့ အမြောက်နဲ့ပစ်ပေးနေတယ်လို့တော့ သိရတယ်”ဟု ရခိုင်ပြည်နယ်လုံခြုံရေးအဖွဲ့နှင့်နီးစပ်သူတစ်ဦးက NSS ကို ပြောသည်။

ရခိုင်လက်နက်ကိုင်အဖွဲ့ AA သည် MNDAA ဦးဆောင်သော မဟာမိတ်(၃)ဖွဲ့တွင် တစ်ဖွဲ့အပါအဝင်ဖြစ်ပြီး ရှမ်းပြည်နယ် မြောက်ပိုင်းတိုက်ပွဲများတွင်လည်း ပါဝင်တိုက်ခိုက်ပေးလျက်ရှိသည်။

ထိုသို့ ရခိုင်ပြည်နယ်၌ တစ်ကျော့ပြန် ပြန်လည်ဖြစ်ပွားလာသည့်တိုက်ပွဲများကြောင့် ဒေသခံပြည်သူလူထုအနေဖြင့် စားရေရိက္ခာများကို ဈေးကြီးပေးကာ အလုအယက်ဝယ်ယူစုဆောင်နေမှုများ ဖြစ်ပေါ်လျက်ရှိကြောင်း သိရသည်။

“စစ်မီးက ဒီဘက်ကို ကူးပြီဆိုရင် ရခိုင်လူထုကတော့ စစ်ဘေးဒုက္ခသည် ပိုများလာမှာပေါ့။ ဒါပထမတစ်ချက်ပေါ့။ ဒုတိယ တစ်ချက်ကတော့ ဘယ်လိုပဲဖြစ်ဖြစ် မြန်မာနိုင်ငံအနှံ့မှာ ဖြစ်နေတော့ ရှမ်းမြောက်ရဲ့ အဆက်လို့လည်း ပြောကြမှာပေါ့။ ရှမ်းစစ်မြေပြင်ရဲ့ တိုက်ပွဲအနေအထားကို ပြောင်းစေဖို့ ရခိုင်ဒေသမှာ တိုက်ပွဲဖော်ကြတာလားဆိုတာ မေးခွန်းတစ်ခုဖြစ်လာမှာပေါ့”ဟု နိုင်ငံရေးသမားတစ်ဦးက NSS ကို သုံးသပ်ပြောကြားသည်။

ရခိုင်ပြည်နယ်၌ တပ်မတော် နှင့် AA လက်နက်ကိုင်အဖွဲ့ကြားတွင် ပြီးခဲ့သော ၂၀၂၂ ခုနှစ် နှစ်ကုန်ပိုင်း၌ နှစ်ဖက်အပစ်အခတ်ရပ်စဲရေး သဘောတူညီမှုရရှိခဲ့ပြီးနောက် လက်ရှိအချိန်တွင် AA ဘက်က ချိုးဖောက်ကာ တိုက်ပွဲများကို တစ်ကျော့ပြန် ပြန်လည်ဖော်ဆောင်ခြင်းမျိုး ဖြစ်သည်။

“ရခိုင်မှာ ဒုတိယတစ်ကြိမ် အပစ်အခတ်ရပ်စဲတာကို တစ်ဖက်ဖက်က ဖျက်ပြီးဖြစ်လာတဲ့ စစ်ပွဲကြီးက အလွန်တရာကျယ်ပြန့်နိုင်တယ်” ဟု ၎င်းကသုံးသပ်ထားသည်။

၂၀၂၂ ခုနှစ် သြဂုတ်လအတွင်း၌ ရခိုင်ပြည်နယ်တွင် တပ်မတော် နှင့် AA လက်နက်ကိုင်အဖွဲ့တို့ကြား တစ်ကျော့ပြန်တိုက်ပွဲများ ပြန်လည်ဖြစ်ပွားခဲ့ဖူးပြီး တိုက်ပွဲဖြစ်ပွားချိန် (၄)လခန့်ကြာပြီးနောက်ပိုင်းတွင် နိုင်ငံတကာ၏ ကြားဝင်စေ့စပ်ပေးမှုဖြင့် နှစ်ဖက်အပစ်အခတ်ရပ်စဲခဲ့ကြသည်။

လက်ရှိအချိန်သည် ရခိုင်ပြည်နယ်၌ စပါးများရိတ်သိမ်းချိန်ဖြစ်သည့်အတွက် ဒေသခံရခိုင်လူထုအနေဖြင့် စစ်ပွဲများကို လိုလားမှုမရှိကြောင်းလည်း ၎င်းက ဆက်လက်ပြောသည်။ 

ထို့ပြင် ရခိုင်ပြည်နယ်၌ ယနေ့နံနက်ပိုင်းတွင် စတင်ဖြစ်ပွားခဲ့သော တိုက်ပွဲများကြောင့် ကုန်လမ်း၊ ရေလမ်း လမ်းကြောင်းများကိုလည်း ပိတ်ဆို့လိုက်ပြီဖြစ်ကြောင်း သိရသည်။