မြူနစ် (NP News) - နိုဝင်ဘာ ၁၁

လောက်ကိုင်မြို့အထွက်ရှိ ပါစင်ကျော်ကျေးရွာ၌ ပိတ်မိနေသည့် စစ်ဘေးရှောင်ဦးရေသည် တစ်နေ့ထက်တစ်နေ့ ပိုမိုများပြားလာကြောင်း သိရသည်။

MNDAA ဦးဆောင်ကာ TNLA၊ AA လက်နက်ကိုင်မဟာမိတ်(၃)ဖွဲ့သည် အောက်တိုဘာလ ၂၇ ရက်မှစ၍ (၁၀၂၇ စစ်ဆင်ရေး) အမည်ဖြင့် ရှမ်းမြောက်ရှိ လုံခြုံရေးစခန်းများကို ဝင်ရောက်တိုက်ခိုက်လျက်ရှိသည်။

ထိုသို့တိုက်ခိုက်မှုများကြောင့် လောင်ကိုင်မြို့မှတစ်ဆင့် လားရှိုးမြို့သို့ စစ်ဘေးရှောင်ရန် ထွက်လာသော ပြည်သူများသည် လောက်ကိုင်မြို့အထွက် (၁၀)တန်ဂိတ်နှင့် ပါစင်ကျော်ကျေးရွာကြားတွင် ပိတ်မိလျက်ရှိသည်။

လူဦးရေထောင်နှင့်ချီသော စစ်ဘေးရှောင်ပြည်သူများသည် ကား၊ ဆိုင်ကယ်များနှင့်အတူ ပါစင်ကျော်ကျေးရွာ၌ ပိတ်မိနေခြင်းဖြစ်ကာ လက်ရှိတွင် တစ်ပတ်ခန့်ကြာမြင့်နေပြီဖြစ်ကြောင်း သိရသည်။

“အခု ၁၀ တန်ဂိတ်နဲ့ ပါစင်ကျော်ရွာကြားမှာ ပိတ်မိနေတဲ့ လူတန်းကြီးရဲ့ အခြေအနေပါ။ ဒီမှာ ကလေး သူငယ်တွေ၊ ကိုယ်ဝန်ဆောင်မိခင်တွေ၊ နို့တိုက်မိခင်တွေ၊ အရေးပေါ်အသက်လုရမယ့်လူနာတွေ အများကြီးပါ။ ရာသီဥတုကလည်း အရမ်းအေးတယ်ဆိုတော့ အချိန်ဒီထပ်ပိုကြာလို့ရှိရင် အဲဒီလူတွေ၊ သက်ကြီးရွယ်အိုတွေ အရမ်းအန္တရာယ်ရှိပါတယ်”ဟု ပါစင်ကျော်ကျေးရွာ၌ ပိတ်မိနေသော စစ်ဘေးရှောင်တစ်ဦးက လူမှုကွန်ယက်တွင် အသိပေးပြောကြားထားသည်။

အဆိုပါစစ်ဘေးရှောင်ပြည်သူများအနေဖြင့် နေထိုင်မကောင်မှုများ ဖြစ်ပေါ်နေသည့်အပြင် ဆေးဝါးလိုအပ်ချက်၊ အစားအသောက်လိုအပ်ချက်များနှင့်လည်း ရင်ဆိုင်ကြုံတွေ့နေရကြောင်း ၎င်းက ဆက် လက်ပြောသည်။

ထို့ကြောင့် ပိတ်မိနေသောလမ်းပိုင်းအား အမြန်ဆုံးပြန်လည်ဖွင့်လှစ်ပေးရန်အတွက် မေတ္တာရပ်ခံပြောဆိုထားသည်ကို တွေ့ရှိရသည်။

အလားတူ ယနေ့ နေ့လည်ပိုင်းတွင်လည်း လောက်ကိုင်မြို့အထွက် (၁၀)တန်ဂိတ်အနီး၌ လက်နက်ကြီးကျည်ကျရောက်ပေါက်ကွဲမှုကြောင့် ပိတ်မိနေသည့် စစ်ဘေးရှောင်ပြည်သူအချို့ ထိခိုက်ဒဏ်ရာများ ရရှိခဲ့ကြောင်း လောက်ကိုင်မြို့ခံတစ်ဦးက NSS ကို ပြောသည်။

“အန်တီတို့ရဲ့ ဝန်ထမ်းလေးတွေက မနေ့က မနက်ကတည်းက လားရှိုးပြန်မယ်ဆိုပြီးတော့ ပြန်သွားတာ။ အဲဒီမှာက ပိတ်မိနေတော့ သူတို့လည်း စောင့်နေတာပေါ့။ အဲဒီအချိန်မှာ လက်နက်ကြီးကျလို့ သူတို့လည်း ပြန်လှည့်လာရတယ်။ သူတို့ရဲ့ ဆိုင်ကယ်လည်း မိုင်းစတွေ ထိသွားတယ်။ တခြားထိခိုက်တဲ့သူတွေလည်း ရှိတယ်လို့ ပြောတယ်” ဟု လောက်ကိုင်မြို့ခံက ပြောသည်။

လက်ရှိတွင် ကွမ်းလုံ၊ လောက်ကိုင်၊ ချင်းရွှေဟော်၊ ဖောင်းဆိုင်၊ ကြူကုတ်၊ သိန္နီစသော ဒေသတစ်ဝိုက်တွင် တပ်မတော် နှင့် MNDAA ဦးဆောင်သော မဟာမိတ်အဖွဲ့များကြား တိုက်ပွဲများ ဆက်လက်ပြင်းထန်လျက်ရှိသည်။