မျိုးကြီး (NSS) - နိုဝင်ဘာ ၁ဝ

ရော်ဘာအခြေခံ ထုတ်ကုန်များဖြစ်သော စက်ဘီးနှင့် မော်တော်ဆိုင်ကယ် တာယာများ၊ ကျွတ်များကို နှစ်စဉ် ပြည်ပ မှ အမေရိကန်ဒေါ်လာ (၆၅)သန်းဖိုးခန့် တင်သွင်းနေရကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ယမန်နေ့တွင် နေပြည်တော်ရှိ MICC-II ၌ ကျင်းပသည့် မြန်မာ ရော်ဘာဖိုရမ်-၂ဝ၂၃ ဖွင့်ပွဲအခမ်းအနားတွင် အထက်ပါကဲ့သို့ ထည့်သွင်းပြောဆိုခဲ့ခြင်းဖြစ်သည်။

မြန်မာနိုင်ငံတွင် ရော်ဘာအခြေခံ ထုတ်ကုန်ပစ္စည်းများကို ထုတ်လုပ်ရန် အခြေခံကောင်းများရှိသော်လည်း ထုတ်လုပ်မှုကဏ္ဍကို အားပေးမှုမရှိခဲ့ခြင်း၊ ဈေးကွက်ယှဉ်ပြိုင်နိုင်စွမ်းမရှိခြင်းတို့ကြောင့် ပြည်ပမှ တင်သွင်းနေရမှု များရှိကြောင်း နစကဥက္ကဋ္ဌက ဆိုသည်။

စက်ဘီးနှင့်မော်တော်ဆိုင်ကယ် တာယာများ၊ ကျွတ်များကို နှစ်စဉ်ပျမ်းမျှ အမေရိကန်ဒေါ်လာ (၆၅)သန်းဖိုးခန့် တင်သွင်းနေရပြီး ယင်းထုတ်ကုန်များကို ပြည်တွင်း၌ မဖြစ်မနေထုတ်လုပ်ရန်လည်း ဗိုလ်ချုပ်မှူးကြီး မင်းအောင်လှိုင်က တိုက်တွန်းထားသည်။

နိုင်ငံအတွင်းရှိ တိုင်းနှင့် ပြည်နယ် (၉)ခုတွင် ရော်ဘာဧကပေါင်း (၁ ဒသမ ၆၄) သန်း စိုက်ပျိုးထားပြီး အစေးခြစ်ဧက (၁) သန်းနီးပါးမှ ရော်ဘာတန်ချိန် (၃)သိန်းကျော် နှစ်စဉ် ထွက်ရှိကြောင်း သိရသည်။

ထိုသို့ ထွက်ရှိသည့် ရော်ဘာများထဲမှ ပြည်တွင်းသုံးစွဲမှုအနေဖြင့် တန်ချိန်နှစ်သောင်းကျော်ခန့်ရှိပြီး ပြည်ပသို့ တန်ချိန်(၃) သိန်းခန့် တင်ပို့နေလျက်ရှိကြောင်း သိရသည်။

ယခု ၂ဝ၂၃-၂ဝ၂၄ ခုနှစ်အတွင်း ပြည်ပသို့ ရော်ဘာတန်ချိန် (၄)သိန်းခန့် တင်ပို့နိုင်ရန်အတွက် လျာထားဆောင်ရွက် နေကြောင်းလည်း နစကဘက်က ထုတ်ပြန်ထားသည်။

မြန်မာနိုင်ငံအနေဖြင့် ပြည်ပသို့ ရော်ဘာတင်ပို့မှုမှတစ်ဆင့် ၂ဝ၁၈-၂ဝ၁၉ ခုနှစ်မှ ၂ဝ၂၂-၂ဝ၂၃ ဘဏ္ဍာနှစ်အတွင်း တစ်နှစ်လျှင် ပျမ်းမျှ အမေရိကန်ဒေါ်လာ သန်း (၂၅ဝ)မှ (၄၅ဝ)ကြား ရရှိနေကြောင်း သိရသည်။

သို့သော် မြန်မာနိုင်ငံသည် ရော်ဘာစိုက်ပျိုးမှု ရှည်လျားသောသမိုင်းကြောင်းရှိခဲ့သော်လည်း လက်ရှိအခြေအနေ တွင် ရော်ဘာအထွက်နှုန်း နှင့် အရည်အသွေးသည် ထိုင်း၊ အင်ဒိုနီးရှား၊ မလေးရှား၊ ဗီယက်နမ်နိုင်ငံများနှင့် နှိုင်းယှဉ်ပါက အားနည်းနေဆဲဖြစ်သည်။