မြူနစ် (NSS) -  နိုဝင်ဘာ ၈

စစ်ကိုင်းတိုင်းအတွင်းရှိ ကောလင်းမြို့ကို PDF ပူးပေါင်းအဖွဲ့များ ထိန်းချုပ်လိုက်ပြီးနောက် ကလေးနှင့် တမူးမြို့တို့ကို ထပ်မံ၍ တော်လှန်ရေးထိုးစစ်ဆင်မည်ဟု အသိပေးထားသည်။

NUG လက်အောက်ခံ PDF၊ ကချင်လက်နက်ကိုင်အဖွဲ့ KIA၊ ရခိုင်လက်နက်ကိုင်အဖွဲ့ AA ပူးပေါင်းအဖွဲ့များသည် ကောလင်းမြို့ပေါ်ရှိ လုံခြုံရေးစခန်းများကို အင်အားအလုံးအရင်းဖြင့် ဝင်ရောက်တိုက်ခိုက်ကာ နိုဝင်ဘာလ ၆ ရက်တွင် ၎င်းမြို့ကို ထိန်းချုပ်လိုက်သည်ဟု ကြေညာထားသည်။

အလားတူ စစ်ကိုင်းတိုင်း၊ တမူးမြို့နယ်ရှိ ခမ်းပတ်မြို့နယ်ခွဲကို ယမန်နေ့(နိုဝင်ဘာလ ၇ ရက်)တွင် PDF ပူးပေါင်းအဖွဲ့များက ထိန်းချုပ်နိုင်ခဲ့ကြောင်း ကြေညာထားသည်ကို တွေ့ရှိရသည်။

“ကောလင်းမြို့သိမ်းတိုက်ပွဲလိုပဲ တော်လှန်ရေးထိုးစစ်ကို အရှိန်အဟုန်နဲ့ ထပ်မံချီတက်နေရတာကတော့ ကလေးမြို့နဲ့ တမူးမြို့တို့ပဲဖြစ်ပါတယ်” ဟု NUG ၏ ဒူဝါလရှီးလက ယမန်နေ့တွင် ထုတ်ဖော်အသိပေးထားသည်။

ကောလင်းမြို့နှင့် ခမ်းပတ်မြို့နယ်ခွဲတို့ကို PDF ပူးပေါင်းအဖွဲ့များ ထိန်းချုပ်ထားမှုနှင့်ပတ်သက်၍ နစကသတင်းထုတ်ပြန်ရေးအဖွဲ့က လက်ရှိအချိန်အထိ တစ်စုံတစ်ရာထုတ်ပြန်ပြောဆိုခြင်းမျိုး မရှိသေးပေ။

PDF ပူးပေါင်းအဖွဲ့များ ထိုးစစ်ဆင်မည်ဟု ပြောဆိုထားသော ကလေးမြို့နှင့်ပတ်သက်၍ လက်ရှိအချိန်တွင် မြို့ပေါ်၌ ဒေသခံပြည်သူများအနေဖြင့် ပုံမှန်အတိုင်းသာ သွားလာလှုပ်ရှားလျက်ရှိကြောင်း ကလေးမြို့ခံတစ်ဦးက NSS ကို ပြောသည်။

“ကလေးမြို့မှာ ညကတော့ လက်နက်ကြီးပစ်သံကြားတယ်။ အခုချိန်ထိတော့ မြို့ပေါ်မှာ အေးအေး ဆေးဆေးပါပဲ။ ပုံမှန်အတိုင်းပါပဲ။ ဒါပေမယ့် ခမ်းပတ်နဲ့ ကလေးမြို့ကြားမှာရှိတဲ့ရွာတွေကတော့ စိုးရိမ်ပူပန်မှုတော့ ရှိကြတယ်။ ကျွန်တော်တို့ အသိုင်းအဝိုင်းရဲ့လူတွေကတော့ ကလေးမြို့ပေါ်ကို ပြောင်းရွှေ့လာဖို့ ပြင်နေကြတာရှိတယ်။ ဒါပေမယ့် အခြေအနေတင်းမာမှ လာမယ့်သဘောမျိုးပေါ့။ အခုတော့ အခြေအနေတင်းမာတာမျိုး မရှိသေးဘူး”ဟု ကလေးမြို့ခံတစ်ဦးက ပြောသည်။

ကလေးမြို့သည် ခမ်းပတ်မြို့နယ်ခွဲနှင့် မိုင်(၄၀)ခန့် ကွာဝေးကြောင်း သိရှိရပြီး တမူးမြို့နှင့်လည်း မိုင်(၈၀)ခန့် ကွာဝေးကြောင်း သိရသည်။

ထို့ပြင် ယနေ့(နိုဝင်ဘာလ ၈ ရက်)တွင်လည်း စစ်ကိုင်းတိုင်းအတွင်းရှိ ပင်လယ်ဘူးမြို့ကို PDF ပူးပေါင်းအဖွဲ့များက တိုက်ခိုက်ထိန်းချုပ်လိုက်ပြီဖြစ်ကြောင်း ရေးသားပြောဆိုမှုများရှိနေသော်လည်း NSS အနေဖြင့် သီးခြားအတည်ပြုနိုင်ခြင်း မရှိသကဲ့သို့ နစကဘက်ကလည်း တစ်စုံတစ်ရာထုတ်ပြန်ပြောဆိုခြင်းမျိုး မရှိသေးပေ။