ဂျန်ဇက် (NSS) - နိုဝင်ဘာ ၇ 

အစ္စရေးဝန်ကြီးချုပ်နေတန်ရာဟုက ၎င်းတို့အနေနဲ့ စစ်ပွဲပြီးဆုံးချိန်မှာ ဂါဇာဒေသရဲ့လုံခြုံရေးကိစ္စအားလုံးကို ထိန်းချုပ်တာဝန်ယူသွားဖို့ ဆန္ဒရှိနေကြောင်း ထုတ်ဖော်ပြောဆိုလိုက်ပါတယ်။ အစ္စရေးဝန်ကြီးချုပ်က ၎င်းတို့ဟာ ပြန်ပေးဆွဲထားသူတွေ ထွက်လာနိုင်ဖို့  ဒါမှမဟုတ် လူသားချင်းဆိုင်ရာစာနာမှုအကူအညီပေးမှုတွေ ဝင်ရောက်နိုင်ဖို့ ဂါဇာဒေသအပေါ် ပြုလုပ်နေတဲ့တိုက်ခိုက်မှုတွေကို နည်းစနစ်ပိုင်းအနည်းငယ်လျော့ချသွားဖို့ စဉ်းစားနေကြောင်း ပြောပါတယ်။ 

ရုရှားနိုင်ငံခြားရေးဝန်ကြီးဌာနက အစ္စရေးအစိုးရအဖွဲ့ဝန်ကြီးတစ်ဦးရဲ့ပြောဆိုချက်များနဲ့ပတ်သက်ပြီး မေးခွန်း ထုတ်စရာဖြစ်လာစေခဲ့ကြောင်း ထုတ်ဖော်ဝေဖန်လိုက်ပါတယ်။ အစ္စရေး ရှေးဟောင်းအမွေနှစ်ထိန်းသိမ်းရေး ဝန်ကြီးက ဂါဇာဒေသကို နျူကလီးယားလက်နက်များ နဲ့ တိုက်ခိုက်မယ့်အစီအစဉ်ဟာ ဖြစ်ကောင်းဖြစ်လာနိုင်ဖွယ် ရှိနေကြောင်း ပြီးခဲ့တဲ့ရက်ပိုင်းက ပြောခဲ့ပါတယ်။ 

မလေးရှားအစိုးရက ပါလက်စတိုင်းရှိ ဟားမက်စ်လက်နက်ကိုင်အဖွဲ့အပြင် အခြားလက်နက်ကိုင်အဖွဲ့တွေကို ကူညီ ထောက်ပံ့ပေးနေတဲ့နိုင်ငံခြားအဖွဲ့အစည်းတွေကို ပစ်မှတ်ထားပိတ်ဆို့မှုချမှတ်မယ့် အမေရိကန်အစိုးရရဲ့ တစ်ဖက် သတ်ပိတ်ဆို့မယ့်အစီအစဉ်ကို အသိမှတ်ပြုမှာမဟုတ်ကြောင်း ပြောပါတယ်။ မလေးရှားနိုင်ငံဟာ အစ္စရေးနိုင်ငံကို နိုင်ငံအဖြစ်အသိအမှတ်ပြုထားခြင်းမရှိသလို အစ္စရေးနဲ့ ဟားမက်စ်အဖွဲ့ စစ်ပွဲစတင်ခဲ့ပြီးနောက် အစ္စရေးနိုင်ငံကို ဝေဖန်ပြစ်တင်မှု အများဆုံးပြုလုပ်နေတဲ့နိုင်ငံဖြစ်ပါတယ်။

အစ္စရေးနိုင်ငံအနေနဲ့ ဂါဇာဒေသကို နျူကလီးယားလက်နက်များနဲ့ တိုက်ခိုက်ဖွယ်ရှိတယ်လို့ ထုတ်ဖော်ပြောဆိုခဲ့တဲ့ အစ္စရေးအစိုးရအဖွဲ့ဝန်ကြီးရဲ့ပြောဆိုချက်များကို ဆော်ဒီအာရေဗျ၊ ဂျော်ဒန် နဲ့ အခြားအာရပ်နိုင်ငံများက ဝေဖန် ပြစ်တင်လိုက်ကြောင်း သိရပါတယ်။ 

အစ္စရေးဝန်ကြီးချုပ်နေတန်ရာဟု အဆိုပါကိစ္စနဲ့ပတ်သက်ပြီး အစ္စရေးအမွေအနှစ်ထိန်းသိမ်းရေးဝန်ကြီးကို ရာထူး က ဆိုင်းငံ့ခဲ့ပေမယ့် ထုတ်ပယ်တာမျိုးမပြုလုပ်ခဲ့ကြောင်း သိရပါတယ်။

တူရကီနိုင်ငံရဲတပ်ဖွဲ့ဟာ တူရကီနိုင်ငံ Incirlik လေတပ်အခြေစိုက်စခန်းမှာ ပါလက်စတိုင်းလိုလားတဲ့ ဆန္ဒပြအုပ်စု တွေကို ထိန်းသိမ်းနိုင်ဖို့ မီးသတ်ပိုက်များ၊ မျက်ရည်ယိုဗုံးများ အသုံးပြုကာ ဖြိုခွင်းခဲ့ရကြောင်း သိရပါတယ်။ အဆိုပါ လေတပ်အခြေစိုက်စခန်းဟာ အမေရိကန်စစ်အခြေစိုက်စခန်းဖြစ်ရာ တူရကီရှိ ပါလက်စတိုင်းလိုလားသူအုပ်စုတွေ ဟာ အဲဒီလေတပ်စခန်းမှာ အစ္စရေးနဲ့ အမေရိကန်ဆန့်ကျင်ရေး ဆန္ဒပြပွဲလုပ်ဆောင်ခဲ့တာဖြစ်ပါတယ်။