စော (NSS) - နိုဝင်ဘာ ၇

ဆေးတက္ကသိုလ်များ နှင့် သွားဘက်ဆိုင်ရာဆေးတက္ကသိုလ်များ၏ ပထမနှစ် တက်ရောက်ခွင့်ရရှိသူ (၆၀၀)ကျော်ရှိကြောင်း ကျန်းမာရေးဝန်ကြီးဌာနက အသိပေးထုတ်ပြန်ထားသည်။

ကျန်းမာရေးဝန်ကြီးဌာနက ယနေ့(နိုဝင်ဘာလ ၇ ရက်)တွင် အထက်ပါကဲ့သို့အသိပေးထုတ်ပြန်ထားခြင်းဖြစ်သည်။

ကျန်းမာရေးဝန်ကြီးဌာန၊ ဆေးတက္ကသိုလ် (၁)ရန်ကုန်တွင် (၁၂၈)ဦး၊ ဆေးတက္ကသိုလ်(မန္တလေး)တွင် (၁၄၆)ဦး၊ ဆေးတက္ကသိုလ်(၂)ရန်ကုန်တွင် (၉၅)ဦး၊ ဆေးတက္ကသိုလ်(မကွေး)တွင် (၈၄)ဦး၊ ဆေးတက္ကသိုလ်(တောင်ကြီး)တွင် (၂၉)ဦး၊ Naypyitaw State Academy တွင် (၃၁)ဦး၊ သွားဘက်ဆိုင်ရာဆေးတက္ကသိုလ်(ရန်ကုန်)တွင် (၄၄)ဦး နှင့် သွားဘက်ဆိုင်ရာဆေးတက္ကသိုလ်(မန္တလေး)တွင် (၅၉)ဦး စုစုပေါင်း (၆၁၆)ဦး တက်ရောက်ခွင့်ရကြောင်း သိရသည်။ 

ဆေးတက္ကသိုလ်များ နှင့် သွားဘက်ဆိုင်ရာဆေးတက္ကသိုလ်များ၏ ပထမနှစ် တက်ရောက်ခွင့်ရရှိသူများ၏ အမည်စာရင်းများကို ယနေ့(နိုဝင်ဘာလ ၇ ရက်)တွင် ကျန်းမာရေးဝန်ကြီးဌာန၏ Website www.moh.gov.mm နှင့် Facebook Page (Ministry of Health, Myanmar) တို့၌ ကြေညာထားကြောင်း သိရသည်။

ထို့ပြင် ကျန်းမာရေးလူ့စွမ်းအားအရင်းအမြစ်ဦးစီးဌာန၏ Website  www.hrh.gov.mm နှင့် သက်ဆိုင်ရာ တက္ကသိုလ်များတွင်လည်း ကြေညာထားကြောင်း သိရသည်။

တက္ကသိုလ်များ နှင့် ကောလိပ်များ၏ နေ့သင်တန်းများအားလုံးကို လာမည့် (နိုဝင်ဘာလ ၂၃ ရက်)တွင် ဖွင့်လှစ်မည်ဖြစ်ပြီး ကျောင်းအပ်လက်ခံခြင်းကို (နိုဝင်ဘာလ ၁၆ ရက်)မှစတင်၍ ပိတ်ရက်မရှိ လက်ခံဆောင်ရွက်ပေးသွားမည်ဖြစ်ကြောင်း သိရသည်။

ဆေးတက္ကသိုလ်နှင့် သွားဘက်ဆိုင်ရာဆေးတက္ကသိုလ်သို့ တက်ရောက်ခွင့်ရရှိသူများသည် ဒီဇင်ဘာလ (၂၂)ရက်အထိ ကျောင်းအပ်နှံခြင်းမရှိပါက တက်ရောက်ခွင့်ပယ်ဖျက်သွားမည်ဖြစ်ကြောင်း ထုတ်ပြန်ချက်အရသိရသည်။

ထို့ပြင် အထက်ပါတက္ကသိုလ်များသို့ ပထမနှစ်သင်တန်း တက်ရောက်ခွင့်ရရှိသူများအနက် မိမိကိုယ်ပိုင်စရိတ်ဖြင့် ဝင်ခွင့်ရရှိသူ (၄၃)ဦး ရှိကြောင်း သိရသည်။