ရှမ်းမြောက်တိုက်ပွဲများကြောင့် မြန်မာ-တရုတ်နယ်စပ် BP (၁၂၅)စစ်ဘေးရှောင်စခန်း၌ စစ်ဘေးရှောင်ဦးရေ သောင်းချီတိုးမြင့်လာ
မြူနစ် (NSS) - နိုဝင်ဘာ ၇
ရှမ်းမြောက်တိုက်ပွဲများကြောင့် မြန်မာ-တရုတ်နယ်စပ် BP (၁၂၅)၌ ဖွင့်လှစ်ထားသည့် စစ်ဘေးရှောင်စခန်း၌ စစ်ဘေးရှောင်ဦးရေ သောင်းချီတိုးမြင့်လာကြောင်း သတင်းရရှိသည်။
BP (၁၂၅) စစ်ဘေးရှောင်စခန်း၌ နိုဝင်ဘာလ ၆ ရက်အထိ စစ်ဘေးရှောင်ပြည်သူဦးရေမှာ (၁၃၄၀၀) ကျော်အထိရှိကြောင်း ကိုးကန့်ကိုယ်ပိုင်အုပ်ချုပ်ခွင့်ရဒေသစီမံအုပ်ချုပ်ရေးအဖွဲ့၏ သတင်းအချက် အလက်များအရ သိရသည်။
လက်ရှိတွင် ၎င်းစစ်ဘေးရှောင်စခန်းသို့ စစ်ဘေးရှောင်ပြည်သူများသည် အဆက်မပြတ် ရောက်ရှိလျက်ရှိပြီး နေရာထိုင်ခင်း၊ စားနပ်ရိက္ခာ၊ ကျန်းမာရေးနှင့် သောက်သုံးရေတို့တွင် ကြီးမာသောအခက်အခဲများနှင့် ရင်ဆိုင်နေရကြောင်း စီမံအုပ်ချုပ်ရေးအဖွဲ့က ပြောသည်။
အဆိုပါစစ်ဘေးရှောင်ပြည်သူများ၏ လိုအပ်ချက်များကို အိမ်နီးချင်းနိုင်ငံများ၏ ပံ့ပိုးကူညီမှုအပြင် ဒေသတွင်းရှိ ပြည်သူများကလည်း ပံ့ပိုးကူညီပေးနေမှုများရှိကြောင်း သိရသည်။
“အဲဒါက မြန်မာ-တရုတ်နယ်စပ်ပေါ့ BP (၁၂၅)မှာ ဖွင့်ထားတဲ့ စစ်ရှောင်းစခန်းပါ။ လောက်ကိုင်မှာ စစ်ဖြစ်လာရင် အဲဒီနယ်စပ်အပေါက်ကို တရုတ်တွေကလည်း ဖွင့်ပေးတယ်။ နောက်သူတို့ ဘက်ခြမ်းမှာလည်း စစ်ရှောင်စခန်းတွေ ဖွင့်ပေးထားတယ်။ ထမင်းလည်းကျွေးတယ်ပေါ့။ အဲဒီ (၁၂၅)မှာ လောက်ကိုင်ဘက်ကလည်း သွားရှောင်နေတဲ့သူတွေရှိတယ်” ဟု လောက်ကိုင်မြို့ခံတစ်ဦးက NSS ကို ပြောသည်။
ကိုးကန့်လက်နက်ကိုင်အဖွဲ့ MNDAA ဦးဆောင်သော မဟာမိတ်(၃)ဖွဲ့သည် ပြီးခဲ့သော အောက်တိုဘာလ ၂၇ ရက်မှစတင်ကာ (၁၀၂၇ စစ်ဆင်ရေး)အမည်ဖြင့် ချင်းရွှေဟော်၊ သိန္နီ၊ မုံးကိုး၊ ဖောင်းဆိုင်၊ ကြူကုတ်၊ နမ့်ခမ်း၊ လားရှိုး၊ လောက်ကိုင်စသော ဒေသများရှိ လုံခြုံရေးစခန်းများကို အင်အားအလုံးအရင်းဖြင့် ဝင်ရောက်တိုက်ခိုက်လျက်ရှိသည်။
၎င်းတိုက်ပွဲများနှင့်အတူ အထက်ပါဒေသများ၏ ကုန်စည်စီးဆင်းမှုများ ရပ်တန့်ကာ ဆက်သွယ်ရေးလမ်း ကြောင်းများ ပြတ်တောက်လျက်ရှိနေပြီး ကုန်ဈေးနှုန်းကြီးမြင့်မှုဒဏ်ကိုပါ အပြင်းအထန်ရင်ဆိုင်ရလျက်ရှိသည်။
“ကုန်ဈေးနှုန်းက မတရားဈေးတက်နေတယ်လေ။ အရင်တုန်းက ငါးယွမ်နဲ့ ဆယ်ယွမ်ကြားပဲရှိတဲ့ ငရုတ်သီးစိမ်းက အခု ယွမ် ၂၀၀ ပေးဝယ်နေရတယ်။ နံနံပင်လည်း အရင်က ၇ ယွမ်ပဲရှိတဲ့ဟာ အခု ယွမ်(၅၀)ပေးဝယ်ရတယ်။ မနေ့က အန်တီ ဈေးသွားဝယ်ထားတာ။ ပြည်သူတွေ ဒုက္ခရောက်နေပါပြီ။ စားစရာဒုက္ခက အတော်လေးဆိုးပါတယ်”ဟု လောက်ကိုင်မြို့ခံတစ်ဦးက ပြောသည်။
လက်ရှိတွင် ရှမ်းပြည်နယ်မြောက်ပိုင်းအတွင်းဒေသများ၌ တပ်မတော်လုံခြုံရေးအဖွဲ့နှင့် MNDAA ဦးဆောင်သော မဟာမိတ်(၃)ဖွဲ့ကြားတွင် တိုက်ပွဲများ ဆက်လက်ဖြစ်ပွားလျက်ရှိသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
တိုင်းရင်းသားအဖွဲ့အစည်းများနှင့်တိုင်းရင်းသားအားလုံးပူးပေါင်းပါဝင်မှသာ နိုင်ငံတော်တည်ဆောက်ရေးနှင့် ဖွံ့ဖြိုးတိုးတက်ရေးကို အောင်မြင်အောင်ဆောင်ရွက်နိုင်မည်ဟုဆို
RELATED POSTS
21 Sep 2024 | အထွေထွေ,နိုင်ငံတကာ
20 Sep 2024 | အထွေထွေ,ပြည်တွင်း
19 Sep 2024 | အထွေထွေ,ပြည်တွင်း
19 Sep 2024 | အထွေထွေ,ပြည်တွင်း