ချင်းရွှေဟော်၊ ဖောင်းဆိုင် နှင့် ကြူကုတ် နေရာ(၃)ခုကို လက်လွှတ်ခဲ့ရကြောင်း နစက ထုတ်ဖော်အသိပေး
မြူနစ် (NSS) - နိုဝင်ဘာ ၂
ရှမ်းပြည်နယ်အတွင်းရှိ ချင်းရွှေဟော်၊ ဖောင်းဆိုင်နှင့် ကြူကုတ် နေရာ(၃)ခုကို လက်လွှတ်ခဲ့ရကြောင်း နစကပြောခွင့်ရ ဗိုလ်ချုပ်ဇော်မင်းထွန်းက ပြောသည်။
ဗိုလ်ချုပ်ဇော်မင်းထွန်းက ယမန်နေ့(နိုဝင်ဘာလ ၁ ရက်)တွင် ရှမ်းပြည်နယ်မြောက်ပိုင်း၌ ဖြစ်ပွားနေသော တိုက်ပွဲများနှင့်ပတ်သက်၍ မီဒီယာများကို ပြောဆိုရှင်းလင်းရာ၌ အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။
MNDAA ဦးဆောင်သော မဟာမိတ်(၃)ဖွဲ့သည် အောက်တိုဘာလ ၂၇ ရက်မှစတင်ကာ (၁၀၂၇ စစ်ဆင်ရေး)အမည်ဖြင့် ချင်းရွှေဟော်၊ သိန္နီ၊ လောက်ကိုင်၊ လားရှိုး၊ နမ့်ခမ်း၊ ကွမ်လုံ၊ မုံးကိုး၊ ဖောင်းဆိုင်နှင့် ကြူကုတ်ဒေသများကို အင်အားအလုံးအရင်းဖြင့် ဝင်ရောက်တိုက် ခိုက်ခဲ့ကြောင်း သိရသည်။
“ဒီအချိန်မှာတော့ အစိုးရ နဲ့ အုပ်ချုပ်ရေးအဖွဲ့အစည်းတွေ၊ လုံခြုံရေးအဖွဲ့အစည်းတွေ လက် လွှတ်ခဲ့ရတဲ့ နေရာတွေရှိပါတယ်။ ဒါကတော့ ချင်းရွှေဟော်ရယ်၊ ဖောင်းဆိုင်ရယ်၊ ကြူကုတ်ရယ် (၃)ခုလောက်ရှိပါတယ်”ဟု ဗိုလ်ချုပ်ဇော်မင်းထွန်းက ပြောသည်။
သို့သော် ယနေ့(နိုဝင်ဘာလ ၂ ရက်) တွင် ချင်းရွှေဟော်၊ ဖောင်းဆိုင်၊ သိန္နီ နှင့် ကြူကုတ်မြို့များကို အလုံးစုံထိန်းချုပ်နိုင်ပြီဖြစ်ကြောင်း မဟာမိတ်(၃)ဖွဲ့က ကြေညာထားသည်ကို တွေ့ရှိရသည်။
“မြန်မာနိုင်ငံသည် လွတ်လပ်ပြီး အချုပ်အခြာအာဏာပိုင်တဲ့ နိုင်ငံဖြစ်တယ်။ ကျွန်တော်တို့ရဲ့ လွတ်လပ်ရေး၊ အချုပ်အခြာအာဏာ၊ နယ်မြေဒေသကို ကျွန်တော်တို့ အစွမ်းကုန်ကြိုးပမ်းကာကွယ်သွားမှာဖြစ်တယ်”ဟု နစကပြောခွင့်ရ ဗိုလ်ချုပ်ဇော်မင်းထွန်းက ပြောသည်။
ရှမ်းပြည်နယ်မြောက်ပိုင်းအတွင်း မဟာမိတ်(၃)ဖွဲ့ နှင့် တပ်မတော်တို့အကြား ဖြစ်ပွားနေသည့် တိုက်ပွဲများကြောင့် နေရပ်စွန့်ခွာစစ်ဘေးရှောင်နေရသည့် လူဦးရေသည် (၆၂၀၀) ကျော်ရှိနေပြီဖြစ်ကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ပိတ်ဆို့အရေးယူမှုတွေ ချမှတ်ခြင်းဖြင့် အနောက်အုပ်စုနိုင်ငံများဟာ ကိုယ့်ကိုယ်ကိုယ်ပြန်လည်ထိခိုက်အောင် လုပ်ဆောင်နေကြောင်း ရုရှားသမ္မတပူတင်ပြော
RELATED POSTS
20 Sep 2024 | နိုင်ငံရေး,ပြည်တွင်း
19 Sep 2024 | နိုင်ငံရေး,ပြည်တွင်း