ဂျန်ဇက် (NSS) - အောက်တိုဘာ ၃၁ 

အစ္စရေးဝန်ကြီးချုပ်နေတန်ရာဟုဟာ ဂါဇာဒေသ အပစ်ခတ်ရပ်စဲရေးနဲ့ပတ်သက်ပြီး ကမ်းလှမ်းမှုတွေကို ငြင်းဆန် ပယ်ချခဲ့တယ်လို့ ပြောပါတယ်။ အစ္စရေးဝန်ကြီးချုပ်က ဂါဇာဒေသကို ထိန်းချုပ်ထားတဲ့ ဟားမက်စ်အဖွဲ့အပေါ် လုပ်ဆောင်တဲ့ အစ္စရေးရဲ့တိုက်ခိုက်မှုတွေဟာ အပစ်ခတ်ရပ်စဲဖို့ ဖြစ်လာမှာမဟုတ်ကြောင်း ဆိုပါတယ်။ အစ္စရေး ဟာ ဟားမက်စ်အဖွဲ့ထိန်းချုပ်ထားတဲ့ ပါလက်စတိုင်းဒေသရှိ ဂါဇာကို လေကြောင်းတိုက်ခိုက်မှုတွေအပြင် မြေပြင် ထိုးစစ်ဆင်မှုတွေ လုပ်ဆောင်လျက်ရှိနေကြောင်း သိရပါတယ်။

အစ္စရေးရဲ့တိုက်ခိုက်မှုတွေကြောင့် ဂါဇာဒေသမျာ လူသားချင်းဆိုင်ရာစာနာမှုအကူအညီလိုအပ်မှုတွေ မကြုံစဖူးအောင် ဖြစ်လာနိုင်ဖွယ်ရှိနေကြောင်း၊ ကုလသမဂ္ဂအဖွဲ့က သတိပေးထားပါတယ်။ အစ္စရေးရဲ့တိုက်ခိုက်မှုကြောင့် ဂါဇာဒေသမှာ ပါလက်စတိုင်းလူမျိုးအနည်းဆုံး ၈၃ဝဝ ကျော် သေဆုံးထားကြောင်း သိရပါတယ်။ အစ္စရေးဝန်ကြီး ချုပ်က အပစ်ခတ်ရပ်စဲရေးအတွက် ဟားမက်စ်အဖွဲ့ လက်နက်ချဖို့အပြင် ဖမ်းဆီးထားတဲ့ လူပေါင်း ၂၃ဝ ကို ပြန်လွှတ်ပေးဖို့ လိုအပ်ကြောင်း ပြောပါတယ်။ 

အစ္စရေးဝန်ကြီးချုပ်နေတန်ရာဟု က "အပစ်ခတ်ရပ်စဲရေး တောင်းဆိုနေသူတွေဟာ ဟားမက်စ်အဖွဲ့ကို လက်နက်ချဖို့ တောင်းဆိုရမယ်။ ဟားမက်စ်အဖွဲ့လက်နက်ချ အညံ့မခံဘူးဆိုရင်တော့ အပစ်ခတ်ရပ်စဲရေးဖြစ်မှာ မဟုတ်ဘူး။ အစ္စရေးဟာ စစ်ပွဲကို အနိုင်ရတဲ့အချိန် အထိတိုက်ခိုက်သွားမှာပါ" လို့ ပြောပါတယ်။ 

အစ္စရေးရဲ့မဟာမိတ်နိုင်ငံဖြစ်တဲ့ အမေရိကန်နိုင်ငံကလည်း အပစ်ခတ်ရပ်စဲရေးလုပ်ဆောင်မယ့်အစီအစဉ်ကို ငြင်းဆန်ပယ်ချထားကြောင်း သိရပါတယ်။ အမေရိကန်အမျိုးသားလုံခြုံရေးကောင်စီအကြံပေးဖြစ်သူ ဂျွန်ကာဘိုင် က "ကျွန်တော်တို့ဟာ အပစ်ခတ်ရပ်စဲရေးကို လက်ရှိအချိန်မှာ လုပ်ဆောင်ဖို့ သင့်တော်မှုရှိမယ်လို့ မယုံကြည်ဘူး။ အပစ်ခတ်ရပ်စဲရေးအစား ဂါဇာဒေသကို လူသားချင်းဆိုင်ရာစာနာမှုအကူအညီပေးနိုင်ဖို့ကို အဓိကထား စဉ်းစားရမယ်" လို့ ပြောပါတယ်