ဂျန်ဇက် (NSS) - အောက်တိုဘာ ၃၁ 

အမေရိကန်နိုင်ငံဟာ အရှေ့အလယ်ပိုင်းဒေသမှာ မတည်ငြိမ်မှုများဖြစ်အောင် ဖန်တီးလုပ်ဆောင်နေကြောင်း ရုရှားသမ္မတပူတင် က ထုတ်ဖော်ဝေဖန်လိုက်ပါတယ်။

အရှေ့အလယ်ပိုင်းဒေသနိုင်ငံတွေဖြစ်တဲ့ အစ္စရေးနဲ့ ပါလက်စတိုင်းလက်နက်ကိုင်အဖွဲ့ဖြစ်တဲ့ ဟားမက်စ်ကြား စစ်ပွဲများ စတင်ခဲ့ပြီးနောက် ဒေသအတွင်းမတည်ငြိမ်မှုတွေ မြင့်တက်လာခဲ့ကြောင်း သိရပါတယ်။ ရုရှားသမ္မတပူတင်က အရှေ့အလယ်ပိုင်းဒေသမှာ သွေးထွက်သံယိုမှုတွေဖြစ်ပွားစေတဲ့ တိုက်ပွဲတွေနဲ့ပတ်သက်ပြီး အမေရိကန်နိုင်ငံမှာ တာဝန်အရှိဆုံးဖြစ်ကြောင်းပြောပါတယ်။ ရုရှားသမ္မတက "လက်ရှိအချိန်အခါမှာ လူအများ သေစေတဲ့ ပရမ်းပတာဖြစ်မှုတွေကို ဘယ်သူစီစဉ်လုပ်ကိုင်နေသလဲ။ အဲဒီပရမ်းပတာဖြစ်မှုတွေက အကျိုးကျေးဇူး က ဘယ်သူတွေရရှိနေသလဲ။ ကျွန်တော်ရဲ့အမြင်အရတော့ အရှေ့အလယ်ပိုင်းဒေသမှာဖြစ်နေတဲ့ စစ်ပွဲ နောက်ကွယ်မှာ အမေရိကန်အစိုးရ ပါဝင်နေတယ်။ အမေရိကန်နိုင်ငံဟာ ဆီးရီးယား၊ ယူကရိန်း၊ အီရတ်နိုင်ငံတို့မှာ ဖြစ်ခဲ့တဲ့ စစ်ပွဲတွေတုန်းကလည်း နောက်ကွယ်ကနေ ပါဝင်နေတယ်" လို့ ပြောပါတယ်။

ဟားမက်စ်လက်နက်ကိုင်အဖွဲ့ဟာ အောက်တိုဘာ ၇ ရက်မှာ အစ္စရေးနိုင်ငံကို စတင်တိုက်ခိုက်ခဲ့ပြီးနောက် အစ္စရေးနဲ့ ဟားမက်စ်အဖွဲ့ကြားစစ်ပွဲဖြစ်ပွားလာခဲ့ရာ ပါလက်စတိုင်းလူမျိုးအနည်းဆုံး ၈ထောင်ကျော်နဲ့ အစ္စရေး နိုင်ငံသား အနည်းဆုံး ၁၄ဝဝ ကျော် သေဆုံးထားကြောင်း သိရပါတယ်။ အစ္စရေးဟာ ဟားမက်စ် လက်နက်ကိုင် အဖွဲ့ထိန်းချုပ်ထားတဲ့ဂါဇာဒေသကို အောက်တိုဘာ ၂၇ ရက်ကတည်းက စတင်ပြီး မြေပြင်ထိုးစစ်ဆင်နွှဲနေကြောင်း သိရပါတယ်။

အမေရိကန်အစိုးရဟာ ဟားမက်စ်လက်နက်ကိုင်အဖွဲ့နဲ့ အစ္စရေးကြားစစ်ပွဲ စတင်ခဲ့ပြီးနောက် အစ္စရေးကို ကူညီပေး သွားမယ်လို့ ကတိပြုထားကြောင်း သိရပါတယ်။