Pearl (NSS) - အောက်တိုဘာ ၂၈

ရန်ကုန်အခြေစိုက်၍ Online မှတစ်ဆင့် ငွေကြေးများလိမ်လည်နေသောကုမ္ပဏီအား ဝင်ရောက်ဖမ်းဆီးရာ လူ(၁၀၀)နီးပါး ဖမ်းဆီးရမိခဲ့ကြောင်း နစကမှ အောက်တိုဘာလ (၂၇) ရက်တွင် သတင်းထုတ်ပြန်ထားသည်။ 

ပြီးခဲ့သည့်  အောက်တိုဘာလ (၂၆) ရက်တွင် ရန်ကုန်တိုင်း ၊ တာမွေမြို့နယ်၊ ဦးချစ်မောင်လမ်း၊ ဦးချစ်မောင်အိမ်ရာ၊ တိုက်အမှတ်(S-19)တွင် ရုံးခန်းဖွင့်လှစ်ထားသည့် Supportfix Co.,Ltd အား သတင်းအရ လုံခြုံရေးအဖွဲ့အစည်းများမှ ဝင်ရောက်စီးနင်းရှာဖွေခဲ့ကြောင်း သိရသည်။ 

ထိုသို့ ရှာဖွေခဲ့ရာ ဇူကျန်း(ခ) လောက်ဖ (၃၄) နှစ် နှင့် ၎င်း၏ ဖခင်ဖြစ်သူ ဦးလောက်ရှီးအပါအဝင် အမျိုးသား (၆၆) ဦး၊ အမျိုးသမီး (၂၂) ဦးတို့အား ပြည်ပနိုင်ငံသားများ၏ အချက်အလက်များစုဆောင်း၍ ငွေကြေးလိမ်လည်နိုင်ရေးဆောင်ရွက်ရာတွင် အသုံးပြုသည့် ကွန်ပျူတာ၊ မိုဘိုင်းဖုန်း စသည့် ဆက်စပ်ပစ္စည်းများနှင့်အတူ ဖမ်းဆီးရမိခဲ့ကြောင်း သိရသည်။ 

ဖမ်းဆီးရမိသော ဇူကျန်း၏ ထွက်ဆိုချက်အရ အင်းစိန်မြို့နယ်၊ ကမ်းနားအလယ်ရပ်ကွက်၊ လှိုင်မြစ်လမ်းရှိ Spring Line ကွန်ဒို၊ (၅)လွှာ၊ အခန်း(၅၀၁)သို့ ဝင်ရောက်ရှာဖွေရာ ကျန်းယွိ (၃၀)နှစ်နှင့် ၎င်း၏ ဖခင် ဦးကျော်ရုံရွှန်းအပါအဝင် အမျိုးသား ၅ ဦး၊ အမျိုးသမီး ၂ ဦး တို့အား ဆက်စပ်ပစ္စည်းများနှင့်အတူ ထပ်မံဖမ်းဆီးရမိခဲ့ကြောင်း သိရသည်။ 

ဖော်ထုတ်ရရှိချက်များအရ Supportfix Co.,Ltd အတွက် ဝန်ထမ်းများ ရှာဖွေပေးသူ ကမာရွတ်မြို့နယ်၊ နာနတ်တောလမ်းတွင် နေထိုင်သူ Zhan Tu Co.,Ltd  ပိုင်ရှင် ရန်လုံရှင်းအား သွားရောက်ရှာဖွေရာ ထွက်ပြေးတိမ်းရှောင်သွားသဖြင့် ရုံးခန်းဖွင့်လှစ်ထားသည့် Time City Office Tower (3)၊ (၁၅)လွှာ၊ အခန်းအမှတ်(၁၅၀၂)အား ချိတ်ပိတ် သိမ်းဆည်းခဲ့ကြောင်း သိရသည်။

လက်ရှိတွင် ဖမ်းဆီးရမိသူ (၉၅) ဦးအား တရားဥပဒေနှင့်အညီ ထိရောက်စွာအရေးယူ ဆောင်ရွက်သွားမည်ဖြစ်ကြောင်း နစကမှ သတင်းထုတ်ပြန်ထားသည်။ 

အဆိုပါအဖွဲ့များအနေဖြင့် ပြည်ပနိုင်ငံသားများထံမှ ငွေကြေးလိမ်လည်ရန်အတွက် ပစ်မှတ်များရှာဖွေပြီး ပစ်မှတ်များ၏ ကိုယ်ရေးအချက်အလက်များရယူရန် ဝန်ထမ်းတစ်ဖွဲ့လျှင် (၁၀) ဦးစီခန့်ဖြင့် (၈) ဖွဲ့ ဖွဲ့၍ Whats App လူမှုကွန်ရက်မှတစ်ဆင့် ဆက်သွယ်ကာ အချက်အလက်များရယူကြောင်း သိရသည်။

ထိုသို့ ရရှိသည့်အချက်အလက်များအား ငွေကြေးလိမ်လည်မည့် အခြားအဖွဲ့များသို့ ပြန်လည်ရောင်းချခြင်းများပြုလုပ်လျက်ရှိကြောင်းသိရသည်။

ပြည်သူများအနေဖြင့် အထက်ပါကဲ့သို့ ငွေကြေးလိမ်လည်နေသည့် အဖွဲ့အစည်းများအားသိရှိပါက သက်ဆိုင်ရာလုံခြုံရေး အဖွဲ့အစည်းများထံ  သတင်းပေးပို့နိုင်ကြောင်း နစကမှ အသိပေးသတင်းထုတ်ပြန်ထားသည်။