အစ္စရေး - ပါလက်စတိုင်း နောက်ဆုံးရသတင်း updated (Oct-26 / 6:00 PM)
ဂျန်ဇက် (NSS) - အောက်တိုဘာ ၂၆
ပါလက်စတိုင်း လက်နက်ကိုင်အဖွဲ့ ဟားမက်စ်အဖွဲ့ ဒုတိယခေါင်းဆောင်က အစ္စရေးဟာ ဂါဇာကမ်းမြောင်ဒေသကို မြေပြင်ထိုးစစ်ဆင်နွဲမယ်ဆိုရင် ၎င်းတို့ဟာ မျှော်လင့်မထားတဲ့ ထိခိုက်ဆုံးရှုံးမှုတွေနဲ့ တွေ့ကြုံရမယ်လို့ သတိပေးပြောဆိုလိုက်ပါတယ်။ အစ္စရေးတပ်ဖွဲ့တွေဟာ အောက်တိုဘာလ ၂၅ ရက်က ဂါဇာဒေသနယ်စပ်ကို တင့်ကားတွေနဲ့ဖြတ်ကျော်ဝင်ရောက်ခဲ့ပြီး မြေပြင်ထိုးစစ်ဆင်နွှဲဖို့ စတင်လိုက်ကြောင်း သိရပါတယ်။ ဟားမက်စ်အဖွဲ့က "ရန်သူတွေဟာ ကျွန်တော်တို့ပိုင်နက် နယ်မြေကို ကျူးကျော်လာပြီဆိုရင်တော့ ကျွန်တော်တို့ပြည်သူတွေအတွက် သမိုင်းစာမျက်နှာအသစ်ဖွင့်လှစ်ရတော့မှာဖြစ်တယ်။ ကျူး ကျော်သူတွေဟာ မျှော်လင့်မထားတဲ့ ထိခိုက်ရှုံးနိမ့်မှုတွေနဲ့တွေ့ကြုံရမယ်"လို့ပြောပါတယ်။
အီဂျစ်နိုင်ငံရှိ ဗြိတိန်တပ်ဖွဲ့တွေဟာ ဂါဇာဒေသကနေ ဗြိတိန်နိုင်ငံသားတွေ ထွက်နိုင်အောင် ကူညီပေးသွားမှာဖြစ်ကြောင်း၊ ဗြိတိန်ဝန်ကြီးချုပ် ဆူနက်က ထုတ် ဖော်ပြောဆိုလိုက်ပါတယ်။ ဗြိတိန်အစိုးရဟာ ဂါဇာဒေသမှာ ပိတ်မိနေတဲ့ ဗြိတိန်နိုင်ငံသားတွေကို မိခင်နိုင်ငံကို အမြန်ဆုံးပြန်ခေါ်ယူနိုင်ဖို့ လုပ်ဆောင်နေပြီး ရာဖယ်နယ်စပ်ဒေသကို ဖြတ်ကျော်နိုင်မယ်ဆိုရင် ဗြိတိန်နိုင်ငံကို ပြန်လည်ခေါ်ယူဖို့ ရာနှုန်းပြည့်သေချာသွားမှာဖြစ်ကြောင်း ဗြိတိန်ဝန်ကြီးချုပ်ကပြောပါတယ်။
အစ္စရေးရဲ့ ဗုံးကြဲတိုက်ခိုက်နေမှုများကြောင့် ဂါဇာဒေသမှာဘေးကင်းလုံခြုံသောနေရာမရှိကြောင်း ကုလသမဂ္ဂအဖွဲ့ရဲ့ လူသားချင်းဆိုင်ရာစာနာမှုအကူအညီပေးရေးအဖွဲ့တာဝန်ရှိသူတစ်ဦးက ထုတ်ဖော်ပြောဆိုလိုက်ပါတယ်။ အစ္စရေးဟာ အောက်တိုဘာလ ၇ ရက်နောက်ပိုင်းကတည်းက ဂါဇာဒေသကို ဗုံးကြဲတိုက်ခိုက်ခဲ့ရာ လူပေါင်းသိန်းချီဘေးဒုက္ခတွေရင်ဆိုင်နေရကြောင်း သိရပါတယ်။
အမေရိကန်နိုင်ငံဟာ အစ္စရေးနိုင်ငံကို စိုးရိမ်ကြောင့်ကြမှုမရှိဘဲ ပါလက်စတိုင်း ပြည်သူတွေကိုသတ်ဖြတ်ဖို့ မီးစိမ်းပြထားကြောင်း၊ မြောက်ကိုရီးယားနိုင်ငံခြား ရေးဝန်ကြီးဌာနက ဝေဖန်လိုက်ပါတယ်။ အမေရိကန်အစိုးရဟာ အရှေ့အလယ်ပိုင်းဒေသကို လေယာဉ်တင်သင်္ဘောများ စေလွှတ်ဖြန့်ကြတ်မှုအပါအဝင် အစ္စရေးကို စစ်ရေးအကူအညီများပေးကာ ပါလက်စတိုင်းပြည်သူတွေကို တိုက်ခိုက်ဖို့ မီးစိမ်းပြခဲ့ခြင်းမျိုးဖြစ်ကြောင်း၊ ဂါဇာဒေသအပေါ် ပြုလုပ်နေတဲ့အစ္စရေးရဲ့တိုက်ခိုက်မှုတွေဟာ စစ်ရာဇဝတ်မှုကျူးလွန်ခြင်းမျိုးဖြစ်ကြောင်းမြောက်ကိုရီးယားနိုင်ငံခြား ရေးဝန်ကြီးဌာနက ဆိုပါတယ်။
အစ္စရေးနိုင်ငံအနေနဲ့ အမှောင်ကိုခွင်းပြီး အလင်းကိုဆောင်ယူသွားမှာဖြစ်ကြောင်း ဝန်ကြီးချုပ်နေတန်ရာဟုက ထုတ်ဖော်ပြောဆိုလိုက်ပါတယ်။ အစ္စရေးဝန်ကြီး ချုပ်က ဂါဇာဒေသရှိ ဟားမက်စ်လက်နက်ကိုင်အဖွဲ့တွေအပေါ် ပြတ်ပြတ်သားသား အနိုင်ယူသွားမှာဖြစ်ကြောင်း ထပ်မံကတိပြုပြောဆိုခဲ့ပါတယ်။ ဟားမက်စ်လက်နက်ကိုင်အုပ်စုတွေကို ငရဲဘုံကို ပို့ပစ်မှာဖြစ်ကြောင်း၊ ဟားမက်စ်အဖွဲ့နဲ့တိုက်ခိုက်နေတဲ့စစ်ပွဲက လူသားအားလုံးအတွက် စမ်းသပ်မှုတစ်ခုဖြစ်ကြောင်းဝန်ကြီးချုပ်နေတန်ရာဟုကပြောပါတယ်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဘဏ္ဍာနှစ် ပထမ(၆)လအတွင်း တရုတ်၊ ထိုင်း၊ စင်ကာပူနိုင်ငံများနှင့် အများဆုံးကုန်သွယ်ထား
RELATED POSTS
19 Sep 2024 | နိုင်ငံရေး,ပြည်တွင်း