NSS - အောက်တိုဘာ ၂၆

မြန်မာနိုင်ငံအနေဖြင့် လက်ရှိဘဏ္ဍာနှစ် ပထမ(၆)လအတွင်း တရုတ်၊ ထိုင်း၊ စင်ကာပူနိုင်ငံများနှင့် ကုန်သွယ်မှုပမာဏအများဆုံးပြုလုပ်နိုင်ခဲ့ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ အချက်အလက်များအရ သိရသည်။

မြန်မာနိုင်ငံအနေဖြင့် ပြည်ပဖောက်သည် ဈေးကွက် ၂၃၈ နိုင်ငံအား ကုန်သွယ်မှုလုပ်ငန်းများဆောင်ရွက်ခဲ့ရာ ယခုဘဏ္ဍာနှစ်အတွင်း ဈေးကွက်နိုင်ငံပေါင်း ၁၃၅ နိုင်ငံနှင့် ပင်လယ်ရေကြောင်း၊ နယ်စပ်ကုန်သွယ်ရေးလမ်းကြောင်းများမှ ကုန်သွယ်မှုလုပ်ဆောင်ခဲ့ခြင်းဖြစ်ကြောင်း သိရသည်။

အဆိုပါကာလအတွင်း ပို့ကုန်တန်ဖိုး အမေရိကန်ဒေါ်လာ ၇ ဒသမ ၆ ဘီလျံကျော်နှင့် သွင်းကုန်တန်ဖိုး အမေရိကန်ဒေါ်လာ ၈ ဒသမ ၅ ဘီလျံကျော် စုစုပေါင်း ကုန်သွယ်မှု ပမာဏ အမေရိကန်ဒေါ်လာ ၁၆ ဘီလျံကျော် ရရှိအောင်ဆောင်ရွက်နိုင်ခဲ့ကြောင်း သိရသည်။

တရုတ်နှင့် ကုန်သွယ်မှုပမာဏသည် ပို့ကုန်တန်ဖိုး အမေရိကန်ဒေါ်လာ ၁ ဒသမ ၅၄ ဘီလျံကျော်၊ သွင်းကုန်တန်ဖိုး အမေရိကန်ဒေါ်လာ ၂ ဒသမ ၉၆ ဘီလျံကျော် စုစုပေါင်း ကုန်သွယ်မှုပမာဏ အမေရိကန်ဒေါ်လာ ၄ ဒသမ ၅ ဘီလျံကျော်နှင့် အများဆုံး ကုန်သွယ်နိုင်ခဲ့ခြင်းဖြစ်သည်။

ဒုတိယကုန်သွယ်မှုအများဆုံးနိုင်ငံအဖြစ် ထိုင်းနှင့် ပို့ကုန်တန်ဖိုး အမေရိကန်ဒေါ်လာ ၂ ဒသမ ၀၃၅ ဘီလျံကျော်၊ သွင်းကုန်တန်ဖိုး အမေရိကန်ဒေါ်လာ ၁ ဒသမ ၀၃၃ ဘီလျံကျော် စုစုပေါင်း ကုန်သွယ်မှုပမာဏ အမေရိကန်ဒေါ်လာ ၃ ဒသမ ၀၆၈ ဘီလျံကျော် ဆောင်ရွက်ထားခဲ့ခြင်းဖြစ်သည်။

စင်ကာပူနိုင်ငံ နှင့် ကုန်သွယ်မှု တတိယအများဆုံးဆောင်ရွက်ထားပြီး ပို့ကုန်တန်ဖိုး အမေရိကန်ဒေါ်လာ ၇၂ ဒသမ ၃၅၆ သန်း၊ သွင်းကုန်တန်ဖိုး အမေရိကန်ဒေါ်လာ ၁ ဒသမ ၇၄ ဘီလျံကျော်  စုစုပေါင်းကုန်သွယ်မှုပမာဏ ၁ ဒသမ ၈၁၂ ဘီလျံကျော် ဆောင်ရွက်ခဲ့ကြောင်း ဝန်ကြီးဌာန၏အချက်အလက်များအရသိရသည်။