NSS - အောက်တိုဘာ ၂၅

စားသုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်းကြီး ကြပ်ရေးကော်မတီမှ စားအုန်းဆီ တစ်ပိဿာ အခြေခံ လက်ကားရည်ညွှန်းဈေးများကို တစ်ပတ်လျှင်တစ်ကြိမ် ထုတ်ပြန်ကြေညာလျက်ရှိသည်။ 

အောက်တိုဘာလ၏ စတုတ္ထပတ်အတွက် တစ်ပတ်စာ ရည်ညွှန်းဈေးအဖြစ် အောက်တိုဘာလ ၂၃ ရက်တွင် ၄၃၉၅ ကျပ်ထုတ်ပြန်ခဲ့သော်လည်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများအရဟုဆိုကာ အောက်တိုဘာလ ၂၄ ရက်တွင် တစ်ပတ်စာ ရည်ညွှန်းဈေးကို ၄၇၂၅ ကျပ်အထိ ထပ်မံတိုးမြှင့်ပြောင်းလဲ သတ်မှတ်ခဲ့ကြောင်း သိရသည်။ 

အဆိုပါ သတ်မှတ်ဈေးနှုန်းသည် ယခင်သီတင်းပတ်ကထက် ၅၀၀ ကျပ်နီးပါးမြင့်တက်လာခဲ့ပြီး ပြင်ပဈေးကွက်အတွင်း၌လည်း ငွေကျပ် ၅၀၀ ထပ်မံမြင့်တက်လာကြောင်း စားသုံးသူများထံက သိရသည်။

"ယခင်အပတ်က စားအုန်းဆီ တစ်ပိဿာကို ပြင်ပမှာ ငွေကျပ် ၈,၀၀၀  ပေးဝယ်နေရာကနေ အခု ၈,၅၀၀ ကျပ် ဖြစ်သွားတယ်။ ၅၀၀ ကျပ်တက်သွားတယ်။ ရပ်ကွက်၊ မြို့နယ် နဲ့ ဆီကုန်သည်တွေ ရောင်းပေးနေတဲ့ ဆိုင်တွေမှာတော့ ငွေကျပ် ၄၀၀၀ ကျော်နဲ့ ရချင်ရမှာပေါ့နော်။ အန်တီတို့က တန်းစီပြီးမစောင့်နိုင်တော့ ပြင်ပဆိုင်တွေမှာပဲ ဝယ်လိုက်တယ်။ အခုလည်းကြားတာက အစိုးရရည်ညွှန်းဈေးတက်သွားလို့ စားအုန်းဆီဆိုင်တွေလည်း တက်လာတာလို့ ပြောနေကြတယ်"ဟု တောင်ဒဂုံမြို့ နယ်မှ အိမ်ရှင်မတစ်ဦးက ပြောသည်။

စားသုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်း၌ဖြစ်သင့်ဖြစ်ထိုက်သော ဈေးနှုန်းများကို အပတ်စဉ် ထုတ်ပြန်ပေးနေပြီး အောက်တိုဘာလ ၂ ရက်မှ ၈ ရက်အထိ စားအုန်းဆီ တစ်ပိဿာ ရည်ညွှန်းဈေးကို ၄,၃၉၀ ကျပ်၊ ဒုတိယတစ်ပတ်ဖြစ်သည့် အောက်တိုဘာလ ၉ ရက်မှ ၁၅ ရက်အထိ ကို ၄,၃၄၀ ကျပ်၊ တတိယတစ်ပတ်ဖြစ်သည့် အောက်တို ဘာလ ၁၆ ရက်မှ ၂၂ ရက်အထိကို ၄,၂၇၅ ကျပ်အသီးသီးထုတ်ပြန်ခဲ့ရာ အဆိုပါ ကာလအတွင်း ပြင်ပပေါက်ဈေးသည်လည်း ၇,၈၀၀ ကျပ်နှင့် ၈,၀၀၀ ကျပ် ဝန်းကျင်အထိ ပေါက်ဈေးရှိနေကြောင်း သိရသည်။

စားအုန်းဆီဈေးအပြောင်းအလဲပြုလုပ်ခဲ့သော်လည်း ခွဲတမ်းအလိုက် မြို့နယ်များတွင် တန်းစီဝယ်ယူနေရဆဲဖြစ်ကြောင်း စားသုံးသူပြည်သူများထံမှ သိရသည်။