Pika (NSS) - အောက်တိုဘာ ၁၉

တရုတ်နိုင်ငံသည် စီးပွားရေးအရ အကြပ်ကိုင်မှုများနှင့် အထီးကျန်ဖြစ်အောင် လုပ်ဆောင်ခြင်းများကို ငြင်းဆန်ပယ်ချကြောင်း တရုတ်သမ္မတရှီကျင့်ဖျင်က ထုတ်ဖော်ပြောခဲ့သည်။

တရုတ်နိုင်ငံ ပေကျင်းမြို့တွင် အောက်တိုဘာလ(၁၇)ရက်က စတင်ကျင်းပသော ပိုးလမ်းမရပ်ဝန်းစီမံကိန်းဖိုရမ် ဖွင့်ပွဲတွင် ရှီကျင့်ဖျင်က ယခုကဲ့သို့ထုတ်ဖော်ပြောကြားခဲ့ခြင်းဖြစ်သည်။ ရှီကျင့်ဖျင် က "တစ်ဖက်သတ် ပိတ်ဆို့ အရေးယူမှုတွေ၊ စီးပွားရေးအရ အကြပ်ကိုင်တာတွေ၊ အထီးကျန်ဖြစ်အောင် လုပ်ဆောင်တာတွေနဲ့ ဆယ်နွယ်တာ တွေကို လုံးဝ ဆန့်ကျင်ပါတယ်။ တရုတ်နိုင်ငံဟာ အတွေးအခေါ်ဆိုင်ရာ ထိပ်တိုက်တွေ့ဆုံမှုတွေ၊ ပထဝီဝင်နိုင်ငံ ရေးကစားတာမျိုးတွေ ဒါမှမဟုတ် အုပ်စုလိုက် ထိပ်တိုက်တွေ့ဆုံတာမျိုးတွေမှာ ပါဝင်မှာ မဟုတ်ပါဘူး။ အခြားနိုင်ငံတွေရဲ့ဖွံ့ဖြိုးတိုးတက်မှုကို ခြိမ်းခြောက်မှုလို့မြင်တာတွေနဲ့ စီးပွားရေးအရ အပြန်အလှန်မှီခိုတာကို အန္တရာယ်အဖြစ် ရှုမြင်တာမျိုးတွေဟာ အခြားနိုင်ငံတွေအတွက်လည်း မကောင်းသလို ကိုယ်တိုင်ဖွံ့ဖြိုးတိုးတက် မှုတွေကိုလည်း ပိုမြန်စေမှာ မဟုတ်ပါဘူး" ဟု ပြောခဲ့သည်။

ထို့အပြင် ပိုးလမ်းမရပ်ဝန်းစီမံကိန်းကို ကမ္ဘာ့စီးပွားရေးအား တွန်းအားပေးနိုင်မည့်အရာတစ်ခုဖြစ်အောင် ကြိုးပမ်း သွားမည်ဖြစ်ကြောင်း ရှီကျင့်ဖျင်က ပြောခဲ့သည်။ ရှီကျင့်ဖျင်က "ပိုးလမ်းမရပ်ဝန်းစီမံကိန်းဟာ မူဝါဒ၊ အခြေခံ အဆောက်အအုံ၊ ကုန်သွယ်မှု၊ ငွေကြေးနဲ့ လူအချင်းချင်းချိတ်ဆက်မှုတွေကို တိုးမြှင့်ဖို့ရည်ရွယ်ထားတာပါ။ win-win ပူးပေါင်းဆောင်ရွက်မှုရှိမှသာ အရာအားလုံးကို ကောင်းမွန်စွာပြီးမြောက်အောင် လုပ်ဆောင်နိုင်မယ်လို့ ကျွန်တော်တို့ ယုံကြည်ပါတယ်။ တရုတ်နိုင်ငံဟာ ပိုးလမ်းမရပ်ဝန်းစီမံကိန်းမိတ်ဖက်တွေနဲ့ ပူးပေါင်းဆောင်ရွက်မှု တွေ လုပ်ဆောင်သွားဖို့ ဆန္ဒရှိပါတယ်။ ပြီးတော့ တစ်ကမ္ဘာလုံးမှာရှိတဲ့ နိုင်ငံတိုင်းရဲ့ ခေတ်မီဖွံ့ဖြိုးတိုးတက်ရေးကို အကောင်အထည်ဖော်ဖို့လည်း ဆန္ဒရှိပါတယ်" ဟု ပြောခဲ့သည်။ 

အောက်တိုဘာလ(၁၇)ရက်တွင် တရုတ်အစိုးရသည် ပိုးလမ်းမရပ်ဝန်းစီမံကိန်းဖိုရမ်အတွက် နိုင်ငံပေါင်း(၁၃ဝ) မှ ကိုယ်စားလှယ်များကို လက်ခံကျင်းပခဲ့ကြောင်းလည်း သိရသည်။