အစ္စရေး - ပါလက်စတိုင်း နောက်ဆုံးရသတင်း updated (Oct-17 / 1:00 PM)
ဂျန်ဇက် (NSS) - အောက်တိုဘာ ၁၇
အစ္စရေးဟာ လက်ဘနွန်နိုင်ငံအတွင်းရှိ ဟစ်ဘိုလာလက်နက်ကိုင်အဖွဲ့ပစ်မှတ်များကို ညလုံးပေါက်တိုက်ခိုက်ခဲ့ကြောင်း အစ္စရေးစစ်ဘက်က အောက်တိုဘာ ၁၇ ရက်နေ့မှာ သတင်းထုတ်ပြန်ခဲ့ပါတယ်။
အစ္စရေးစစ်ဘက်က "ကျွန်တော်တို့ဟာ လက်ဘနွန်ပိုင်နက်အတွင်းရှိ ဟစ်ဘိုလာ လက်နက်ကိုင်အုပ်စုတွေကို ပစ်မှတ်ထားတိုက်ခိုက်ခဲ့တယ်" လို့ ပြောပါတယ်။
အစ္စရေး နဲ့ ဟားမက်စ်အဖွဲ့ကြားစစ်ပွဲစတင်ခဲ့ပြီးနောက် မကြာမီ ဟစ်ဘိုလာအဖွဲ့တွေဟာ အစ္စရေးပိုင်နက်တွေကို ဒုံးကျည်တွေနဲ့ ပစ်ခတ်တိုက်ခိုက်မှုတွေကြောင့် အစ္စရေးဟာ လက်ဘနွန် နဲ့ နယ်စပ်ချင်းထိစပ်နေတဲ့နေရာ ၁ မိုင် ကျော်အတွင်းရှိ နေရာပေါင်း ၂၈ ခုက အစ္စရေးဒေသခံထောင်ချီကို ဘေးလွှတ်ရာကို ရွှေ့ပြောင်းပေးခဲ့ရကြောင်း သိရပါတယ်။
ပါလက်စတိုင်းလက်နက်ကိုင်အဖွဲ့ဟားမက်စ်က ၎င်းတို့ဟာ ဂျေရုဆလင် နဲ့ တဲအဲဗစ်မြို့တို့ရှိ အစ္စရေးတို့ရဲ့ဒုံးကျည် ကာကွယ်ရေးအတားအဆီးတွေကို ပစ်ခတ်တိုက်ခိုက်ခဲ့ကြောင်း သတင်းထုတ်ပြန်ခဲ့ပါတယ်။ ဂါဇာဒေသအပေါ် အစ္စရေးရဲ့တိုက်ခိုက်မှုတွေကိုလက်တုံ့ပြန်မှုအဖြစ် ပစ်ခတ်တိုက်ခိုက်ခဲ့ခြင်းဖြစ်ကြောင်း ဟားမက်စ်အဖွဲ့က ပြောပါတယ်။
ဟားမက်စ်လက်နက်ကိုင်အဖွဲ့ခေါင်းဆောင်က အစ္စရေးအကျဉ်းထောင်တွေထဲမှာ ဖမ်းဆီးထိန်းသိမ်းခံထားရတဲ့ ပါလက်စတိုင်းလူမျိုးတွေ ပြန်လွှတ်ပေးမယ်ဆိုရင် ၎င်းတို့အနေနဲ့ပြန်ပေးဆွဲထားတဲ့သူတွေကို ပြန်လွှတ်ပေးသွား ဖွယ်ရှိနေကြောင်း ပြောပါတယ်။ ဟားမက်စ်အဖွဲ့ဟာ အောက်တိုဘာ ၇ ရက်က အစ္စရေးကို စတင်တိုက်ခိုက်ခဲ့ ပြီးနောက် အစ္စရေးနိုင်ငံသားတွေ နဲ့ အခြားနိုင်ငံသားတွေကို ဖမ်းဆီးခဲ့ကြောင်း သိရပါတယ်။ အစ္စရေးအကျဉ်း ထောင်တွေထဲမှာ ဖမ်းဆီးခံထားရတဲ့ ပါလက်စတိုင်းလူမျိုးအနည်းဆုံး ၆ဝဝဝ ခန့်ရှိနေပြီး၊ အဲဒီသူတွေကို အမြန်ဆုံး ပြန်လွှတ်ပေးစေလိုကြောင်း ဟားမက်စ်အဖွဲ့က ပြောပါတယ်။
အစ္စရေးနဲ့ ဟားမက်စ်အဖွဲ့ကြားစစ်ပွဲဖြစ်ပွားနေချိန်မှာပဲ ကိုလံဘီယာနိုင်ငံဟာ အစ္စရေးသံအမတ်ကြီးကို နိုင်ငံ အတွင်းမှ အမြန်ဆုံးထွက်ခွာဖို့ အမိန့်ပေးခဲ့ကြောင်း သိရပါတယ်။ ဟားမက်စ်နဲ့ အစ္စရေးကြားဖြစ်ပွားနေတဲ့စစ်ပွဲနဲ့ ပတ်သက်ပြီး ကိုလံဘီယာသမ္မတရဲ့မှတ်ချက်စကားအပေါ် အစ္စရေးနဲ့ ကိုလံဘီယာကြားအငြင်းပွားမှုတွေ ရှိခဲ့ပြီး နောက် အခုလိုမျိုးအစ္စရေးသံအမတ်ကြီးကို နှင်ထုတ်ခဲ့တာဖြစ်ပါတယ်။
ကိုလံဘီယာသမ္မတက ဂါဇာဒေသအပေါ် အစ္စရေးရဲ့တိုက်ခိုက်မှုတွေဟာ ဂျူးလူမျိုးတွေကို နာဇီတွေ တုံ့ပြန်တိုက်ခိုက်ပုံ နဲ့ အလားသဏ္ဍာန်တူညီနေကြောင်း ပြောပါတယ်။
အမေရိကန် နဲ့ အစ္စရေးတို့ဟာ ပိတ်ဆို့ခံထားရတဲ့ဂါဇာဒေသကို လူသားချင်းဆိုင်ရာစာနာမှုအကူအညီအဖြစ် နိုင်ငံတကာရဲ့အကူအညီပေးမှုတွေကို လက်ခံဖို့ သဘောတူညီခဲ့ကြောင်း သိရပါတယ်။ အမေရိကန် နိုင်ငံခြားရေးဝန်ကြီး အန်တိုနီဘလီကန်ဟာ အောက်တိုဘာ ၁၆ ရက်မှာ အစ္စရေးဝန်ကြီးချုပ်နေတန်ရာဟုနဲ့ ၈ နာရီကြာတွေ့ဆုံဆွေးနွေးခဲ့ပြီးနောက် သဘောတူညီခဲ့ခြင်းဖြစ်ပါတယ်။
အမေရိကန်နိုင်ငံခြားရေးဝန်ကြီးက "တောင်းဆိုချက်အရ အမေရိကန် နဲ့ အစ္စရေးတို့ဟာ ဂါဇာဒေသရှိ အရပ်သား ပြည်သူတွေထံ လူသားချင်းဆိုင်ရာစာနာမှုအကူအညီတွေ၊ နိုင်ငံတကာအကူအညီတွေ လက်ခံပေးဖို့ သဘောတူညီခဲ့တယ်" လို့ ပြောပါတယ်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဒေသအတွင်းရှိ လက်နက်ကိုင်အဖွဲ့အစည်းတွေက ဂါဇာဒေသကို အစ္စရေးကို စိတ်တိုင်းကြိုက်လုပ်ခွင့်ပေးမှာ မဟုတ်ဟု အီရန်အစိုးရပြော
RELATED POSTS
19 Sep 2024 | နိုင်ငံရေး,ပြည်တွင်း