Pika (NSS) - အောက်တိုဘာ ၁၅ 

တောင်ကိုရီးယားအစိုးရသည် ရုရှား နှင့် မြောက်ကိုရီးယားကြား စစ်ရေးဖလှယ်မှုဆိုင်ရာတိုးတက်မှုများကို အနီးကပ်စောင့်ကြည့်နေပြီး လက်တုံ့ပြန်မှုများလုပ်ဆောင်ရန် စဉ်းစားနေကြောင်း တောင်ကိုရီးယားနိုင်ငံခြားရေး ဝန်ကြီးဌာန အကြီးတန်းအရာရှိတစ်ဦးက ပြောကြားခဲ့သည်။

၎င်းက "ရုရှား နဲ့ မြောက်ကိုရီးယားကြား လက်နက်ဖလှယ်မှုတွေဟာ ကုလသမဂ္ဂလုံခြုံရေးကောင်စီရဲ့ ဆုံးဖြတ်ချက် တွေကို ချိုးဖောက်တာဖြစ်ပြီး ကိုရီးယားကျွန်းဆွယ်ရဲ့ တည်ငြိမ်မှုနဲ့ ငြိမ်းချမ်းရေးကို ခြိမ်းခြောက်တာမျိုးလည်း ဖြစ်ပါတယ်။ အမေရိကန်အစိုးရရဲ့နောက်ဆုံးထုတ်ပြန်ချက်နဲ့ပတ်သက်ပြီး ရုရှား နဲ့ မြောက်ကိုရီးယားတို့ရဲ့ စစ်ရေး ဖလှယ်မှုတွေကို ကျွန်တော်တို့အနီးကပ်စောင့်ကြည့်နေပါတယ်" ဟု ပြောခဲ့သည်။

မြောက်ကိုရီးယားသည် ယူကရိန်း နှင့် စစ်ပွဲတွင် အသုံးပြုရန်အတွက် စစ်လက်နက်ပစ္စည်းများကို ရုရှားထံပေးပို့ခဲ့ ကြောင်း အမေရိကန်အမျိုးသားလုံခြုံရေးကောင်စီပြောရေးဆိုခွင့်ရှိသူ ဂျွန်ကီဘိုင်က အောက်တိုဘာလ(၁၃)ရက် တွင် ထုတ်ဖော်ပြောဆိုခဲ့သည်။

မြောက်ကိုရီးယားအစိုးရသည် စစ်လက်နက်ပစ္စည်းများ နှင့် ခဲယမ်းမီးကျည်များ ပါဝင်သည့် ကွန်တိန်နာ(၁)ထောင် ကျော်ကို ရုရှားထံပေးပို့ခဲ့ကြောင်း ၎င်းက ပြောဆိုခဲ့သည်။ သို့သော်လည်း အဆိုပါစစ်လက်နက်ပစ္စည်းများနှင့် ပတ်သက်ပြီး အသေးစိတ်အချက်အလက်များကို ဂျွန်ကီဘိုင်က ထုတ်ဖော်ပြောဆိုခဲ့ခြင်းမျိုးမရှိကြောင်း သိရသည်။

ဂျွန်ကီဘိုင်က "ယူကရိန်းမြို့တွေကို တိုက်ခိုက်ဖို့၊ ယူကရိန်းပြည်သူတွေကို သတ်ဖို့ နဲ့ တရားမဝင်ကျူးကျော်စစ်ပွဲကို အားပေးသလိုဖြစ်စေတဲ့ စစ်လက်နက်ပစ္စည်းတွေ ရုရှားကိုပေးအပ်ခဲ့တဲ့ မြောက်ကိုရီးယားရဲ့လုပ်ရပ်ကို ကျွန်တော် တို့ ပြစ်တင်ရှုတ်ချပါတယ်" ဟု ပြောခဲ့သည်။

အပြန်အလှန်အနေဖြင့် မြောက်ကိုရီးယားသည် ရုရှားထံမှ ဒုံးကျည်နည်းပညာများကို လက်ခံရယူနိုင်ဖွယ်ရှိနေကြောင်း အမေရိကန်အစိုးရက ပြောခဲ့သည်။ 

မြောက်ကိုရီးယားခေါင်းဆောင် ကင်ဂျုံအန်းသည် ပြီးခဲ့သည့်လတွင် ရုရှားသမ္မတပူတင်နှင့်သွားရောက်တွေ့ဆုံခဲ့ပြီး နောက် ဖြစ်နိုင်ခြေရှိသော လက်နက်သဘောတူညီချက်များနှင့်ပတ်သက်ပြီး အမေရိကန် နှင့် ၎င်း၏မိတ်ဖက်နိုင်ငံ များကြားတွင် စိုးရိမ်ပူပန်မှုများဖြစ်ပေါ်လာစေခဲ့ကြောင်း သိရသည်။