ကားအာမခံပေါ်လစီအသစ်ထုတ်ပြန်ခဲ့ပြီးနောက် အာမခံကြေးနှစ်ဆခန့်မြင့်တက်လာ
NSS - အောက်တိုဘာ ၁၅
မြန်မာနိုင်ငံ၌ လက်ရှိကျင့်သုံးနေသည့် မော်တော်ကားအာမခံသည် ခေတ်စနစ်နှင့်မကိုက်ညီခြင်းကြောင့် မြန်မာ့အာမခံလုပ်ငန်း နှင့် မြန်မာ့အာမခံအသင်းတို့က မော်တော်ကားအာမခံပေါ်လစီအသစ်ကို အောက်တိုဘာလ ၁၂ ရက်မှစတင်ကာ ပြောင်းလဲကျင့်သုံးလျက်ရှိ ကြောင်း သိရသည်။
ယင်းအာမခံပေါ်လစီအသစ်အရ မော်တော်ကားအာမခံနှင့်ပတ်သက်ပြီး ယခင်အခေါ်အဝေါ်ဖြစ်သည့် အလုံးစုံမော်တော်ယာဉ်အာမခံ(Comprehensive Motor Insurance) အစား မော်တော်ယာဉ်အာမခံ (Motor Vehicle Insurance) ဟု ပြောင်းလဲခဲ့သည်။
ကားအာမခံထားရှိပြီးနောက် မည်သည့်နစ်နာဆုံးရှုံးမှုမဆို ပေးလျော်ခြင်းမပြုဘဲ အာမခံထားရှိသည့် ကားအမျိုးအစားနှင့် အစိတ်အပိုင်းအလိုက်ပေါ်မူတည်ကာ သတ်မှတ်စည်းကမ်းဘောင်အတွင်း ကိုက်ညီမှုရှိမှသာပေးလျော်မည် ဖြစ်ကြောင်းသိရသည်။
ထို့ပြင် ယခင်ကျင့်သုံးခဲ့သည့် အာမခံပေါ်လစီအရ ကားအာမခံထားသူသည် သတ်မှတ်အရည်အချင်းရှိလိုင်စင် နှင့် ယာဉ်မောင်းလိုင်စင်သက်တမ်းရှိပါက လျော်ကြေးနှင့်အကျုံးဝင်သော်လည်း ပေါ်လစီအသစ်အရ အာမခံထားစဉ်တွင် တင်ပြထားသည့် ယာဉ်မောင်းစာရင်းမှလွဲ၍ကျန်သည့် မောင်းနှင်သူများမောင်းနှင်အသုံးပြု၍ ယာဉ်ထိခိုက်မှုများဖြစ်ပါက အကျုံးမဝင်တော့ကြောင်းသိရသည်။
ထို့ကြောင့် ယာဉ်မောင်းစာရင်းကို ယာဉ်တစ်စီးစာအာမခံအတွက် ယာဉ်မောင်းလေးဦးအထိစာရင်းပေးနိုင်ပြီး ယာဉ်မောင်းပြောင်းလိုပါက အာမခံကုမ္ပဏီထံတင်ပြ၍ပြောင်းနိုင်ကြောင်းသိရသည်။
“အခုက မော်တော်ယာဉ်တိုက်ရုံတောင် မဟုတ်တော့ဘဲ ကားပေါ်က ပစ္စည်းတွေ အခိုးခံရတာ၊ နောက်ပြင်ဆင်စရိတ်တွေ၊ အပိုပစ္စည်း နဲ့ အခြား risk အမျိုးအစားအသစ်တွေလည်း ရှိလာပြီး စရိတ်စကတွေကလည်း တက်လာတဲ့အတွက် ပုဂ္ဂလိက ကုမ္ပဏီတွေကလည်း သူပြန်လျော်ရမယ့်နှုန်းထားတွေ ပြောင်းလာတာတွေကြောင့် အာမခံကြေးတိုးကောက်တဲ့ သဘောပေါ့။ အခု ခေတ်နဲ့မလျော်ညီလို့ဆိုပြီး နှုန်း update လုပ်တယ်ဆိုရင် service ကိုလည်း update လုပ်ပြီး အာမခံထားသူတွေကို ဘာတွေ ပြန်ပေးရမလဲ တိတိကျကျလေး အကောင်အထည်ဖော်ရင် ပိုကောင်းလာမှာပါ”ဟု ကုန်သည်/စက်မှုအသင်းချုပ်မှ လုပ်ငန်းရှင်တစ်ဦးက ပြောသည်။
ထို့ပြင်အာမခံပေါ်လစီအသစ်အရ အခြခံအာမခံနှင့်အပိုထပ်ဆောင်းအကာအကွယ်ဟူ၍ သတ်မှတ်လိုက်သည့်အပြင် အာမခံကြေးသည်လည်း ယခင်ထက်နှစ်ဆခန့်မြင့်တက်သွားပြီးအခြေခံအာမခံကိုသာ ရယူထားသူများအနေဖြင့် အလုံးစုံအကာအကွယ်ရရှိနိုင်တော့မည်မဟုတ်ကြောင်း အာမခံအေဂျင်စီများထံမှသိရသည်။
ထိုသို့အာမခံပေါ်လစီအသစ်ပြောင်းလဲရာတွင် ဓာတ်ဆီ၊ ဒီဇယ် နှင့် စီအန်ဂျီသုံးမော် တော်ကားများသာပါဝင်ပြီး လျှပ်စစ်မော်တော်ကား EV များ အကျုံးဝင်ခြင်းမရှိကြောင်းနှင့် EV ကားများအတွက် အာမခံကို ဆက်လက်ရေးဆွဲ အကောင်အထည်ဖော်သွားမည်ဖြစ်ကြောင်း မြန်မာ့အာမခံလုပ်ငန်းမှ သိရသည်။
မော်တော်ယာဉ်ပိုင်ရှင်များနှင့် မော်တော်ယာဉ်လုပ်ငန်းရှင်အများအကြား၌ မြန်မာ့အာမခံအသင်းမှ အာမခံပေါ်လစီအသစ်ပြောင်းလဲမှုနှင့်ပတ်သက်၍ ဝေဖန်သံများကျယ်ပြန့်စွာထွက်ပေါ်လျက်ရှိနေပြီး ပေါ်လစီသစ်နှင့် ပတ်သက်သောအသေးစိတ်အချက်အလက်များကို ဆက်လက်ထုတ်ပြန်ရန်လိုအပ်ကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
(၃)နှစ်ကြာ ရပ်နားထားသည့် အင်းလေးဖောင်တော်ဦးဘုရားပွဲတော် ယနေ့ စတင်ကျင်းပ
RELATED POSTS
18 Sep 2024 | မှုခင်း,ပြည်တွင်း
17 Sep 2024 | မှုခင်း,နိုင်ငံတကာ