ဂျန်ဇက် (NSS) - အောက်တိုဘာ ၁၅ 

ဒေါ်အောင်ဆန်းစုကြည်ကို ချီးမြှင့်ထားတဲ့ Freedom of the City ဆုကို ပြန်လည်ရုတ်သိမ်းဖို့အတွက် လာမယ့် အောက်တိုဘာ ၁၉ ရက်မှာ ဗြိတိန်နိုင်ငံ Brighton and Hove မြို့ကောင်စီဝင်များကြား  မဲခွဲဆုံးဖြတ်သွားဖွယ်ရှိနေကြောင်း သိရပါတယ်။ 

ဒေါ်အောင်ဆန်းစုကြည် ဦးဆောင်တဲ့အစိုးရအဖွဲ့လက်ထက်အတွင်း ဘင်္ဂါလီတွေအပေါ် လူအခွင့်အရေးချိုးဖောက်မှုတွေ၊ လူမျိုးသုန်းသတ်ဖြတ်မှုတွေ ရှိခဲ့တဲ့အတွက် ဆုပြန်ရုတ်သိမ်းဖို့ တစ်ကျော့ပြန်စီစဉ်ခဲ့တာဖြစ်ပါတယ်။

အဆိုပါမြို့ကောင်စီဟာ ဒေါ်အောင်ဆန်းစုကြည်ကို ချီးမြှင့်ထားတဲ့ဆုကို ပြန်ရုတ်သိမ်းဖို့ ၂ဝ၁၈ ခုနှစ်က မဲခွဲဆုံးဖြတ်ခဲ့ပေမယ့် လုံလောက်တဲ့ မဲအရေအတွက် မရတဲ့အတွက် ဆုကို ပြန်လည်ရုတ်သိမ်းနိုင်တာမျိုးမရှိဘူးလို့ သိရပါတယ်။

Brighton and Hove မြို့ဟာ ဒေါ်အောင်ဆန်းစုကြည်ကို ၂ဝ၁၁ ခုနှစ်က  Freedom of the City ဆုချီးမြှင့်ခဲ့ခြင်းဖြစ်ကြောင်း သိရပါတယ်။ Brighton and Hove မြို့ကောင်စီက "ဒေါ်အောင်ဆန်းစုကြည်ဟာ ၂ဝ၁၆ ခုနှစ်ကနေ ၂ဝ၂၁ ခုနှစ်အတွင်းမှာ မြန်မာအစိုးရအဖွဲ့အတွင်း နိုင်ငံတော်အတိုင်ပင်ခံပုဂ္ဂိုလ်တာဝန်အပြင် နိုင်ငံခြားရေးဝန်ကြီးတာဝန်တွေကို ရယူခဲ့တယ်။ အဲဒီကာလအတွင်းမှာ ဘင်္ဂါလီတွေအပါအဝင်လူအခွင့်ရေးချိုးဖောက်ခံရမှုတွေ မြန်မာနိုင်ငံမှာဖြစ်ခဲ့တယ်" လို့ သတင်းထုတ်ပြန်ထားပါတယ်။

ဒေါ်အောင်ဆန်းစုကြည်ဟာ မြန်မာဒီမိုကရေစီအရေး ကြိုးပမ်းမှုတွေကြောင့် ကမ္ဘာ့ငြိမ်းချမ်းရေး နိုဘယ်ဆု၊အမေရိကန်လွှတ်တော်ရဲ့ရွှေ့တံဆိပ်ဆု အပါအဝင် ဂုဏ်ထူးဆောင်အများအပြား ရယူနိုင်ခဲ့တယ်လို့ သိရပါတယ်။

ဒါပေမယ့် ဒေါ်အောင်ဆန်းစုကြည် ဦးဆောင်တဲ့အစိုးရအဖွဲ့လက်ထက်မှာ ဘင်္ဂါလီတွေအပေါ် လူအခွင့်အရေးချိုးဖောက်ခံရမှုတွေနဲ့ပတ်သက်ပြီး ဒေါ်အောင်ဆန်းစုကြည်ကို ချီးမြှင့်ထားတဲ့ဆုတွေ ပြန်လည်ရုတ်သိမ်းခဲ့ကြောင်း သိရပါတယ်။ အောက်စဖိုဒ့်၊ လန်ဒန်၊ အီဒင်ဘတ်ချ် မြို့များ အပါအဝင် မြို့အချို့ဟာ ဒေါ်အောင်ဆန်းစုကြည်ကို ချီးမြှင့်ထားသော Freedom of the City ဆုများ ပြန်ရုတ်သိမ်းခဲ့ဖူးပါတယ်။ 

ဒါ့အပြင် နိုင်ငံတကာလွတ်ငြိမ်းချမ်းသာခွင့်အဖွဲ့အစည်း Amnesty International အဖွဲ့ကလည်း ဒေါ်အောင်ဆန်းစုကြည်အပေါ် ချီးမြှင့်ထားတဲ့ဆုကို ပြန်ရုတ်သိမ်းခဲ့တယ်လို့ သိရပါတယ်။