ဂျန်ဇက် (NSS) - အောက်တိုဘာ ၁၅

ဗြိတိန်နိုင်ငံ လန်ဒန်မြို့နဲ့ အခြားမြို့တွေမှာ လူပေါင်းထောင်ချီဟာ ပါလက်စတိုင်းထောက်ခံဆန္ဒပြပွဲတွေ အောက်တိုဘာ ၁၄ ရက်က လုပ်ဆောင်ခဲ့ကြောင်း သိရပါတယ်။

ဗြိတိန်ရဲတပ်ဖွဲ့ဟာ ဟားမက်စ်လက်နက်ကိုင်အဖွဲ့ကို အားပေးထောက်ခံကြောင်း ဆန္ဒပြသူတိုင်းကို အပြစ်ပေး အရေးယူမယ်လို့ သတိပေးချက်များရှိနေချိန်မှာ ဗြိတိန်နိုင်ငံတဝှမ်းမှာ ဆန္ဒပြပွဲတွေဖြစ်လာခဲ့တာဖြစ်ပါတယ်။

ဥရောပသမဂ္ဂဟာ အစ္စရေးရဲ့ဗုံးကြဲတိုက်ခိုက်မှုတွေ ရင်ဆိုင်နေရတဲ့ ဂါဇာကမ်းမြောင်ဒေသအတွက် လူသားချင်း ဆိုင်ရာစာနာမှုအကူညီအဖြစ် ယူရို ၇၅ သန်းကျော် ကူညီထောက်ပံ့ပေးသွားမှာဖြစ်တယ်လို့ သတင်းထုတ်ပြန်လိုက် ပါတယ်။ အစ္စရေးဟာ ဂါဇာဒေသကို မြေပြင်ထိုးစစ်ဆင်နွဲ့ဖို့ စီစဉ်နေတဲ့အတွက် ဂါဇာဒေသရှိ လူပေါင်း ၁ ဒသမ ၁ သန်းကို ဘေးလွှတ်ရာကိုရွှေ့ပြောင်းပေးဖို့ ပြီးခဲ့တဲ့ ရက်ပိုင်းက သတင်းထုတ်ပြန်ထားပါတယ်။ 

အစ္စရေးနဲ့ ပါလက်စတိုင်းလက်နက်ကိုင်အဖွဲ့ဟားမက်စ် ကြားဖြစ်ပွားနေတဲ့စစ်ပွဲတွေဟာ တင်းမာမှုအရှိန်မြင့် တက်လာနေပြီး အရှေ့အလယ်ပိုင်းဒေသတစ်ခုလုံးကို ရိုက်ခတ်မယ့် ကြီးမားကျယ်ပြန့်တဲ့စစ်ပွဲဖြစ်လာနိုင်ကြောင်း ကုလသမဂ္ဂဆိုင်ရာရုရှားသံအမတ်ကြီးက ပြောပါတယ်။ ရုရှားသံအမတ်ကြီးက အစ္စရေးနဲ့ ဟားမက်စ်အဖွဲ့ကြား ဖြစ်နေတဲ့ စစ်ပွဲတွေကို ချက်ချင်းရပ်တန့်ဖို့ နဲ့ အရပ်သားတွေကိုတိုက်ခိုက်သူတိုင်းကို ပြစ်တင်ရှုတ်ချကြောင်း ပြောပါတယ်။ 

ပါကစ္စတန်နိုင်ငံရဲ့အကြီးမားဆုံးနိုင်ငံရေးနဲ့ ဘာသာရေးဆိုင်ရာပါတီတစ်ခုဖြစ်တဲ့ Jamiat Ulema-e-Islam (JUIF) ခေါင်းဆောင်က ပါလက်စတိုင်းလက်နက်ကိုင်အဖွဲ့ ဟားမက်စ်အုပ်စုတွေကို ငွေကြေးပိုင်းကူညီထောက်ပံ့ပေးသွား မှာဖြစ်သလို အစ္စရေးနဲ့ တိုက်ခိုက်မယ့် ရှေ့တန်းစစ်မျက်နှာတွေမှာလည်း ပါကစ္စတန်လက်နက်ကိုင်အဖွဲ့တွေ ပူးပေါင်း ပါဝင်မှာဖြစ်ကြောင်း ပြောပါတယ်။ 

ပါကစ္စတန်နိုင်ငံရေးနဲ့ဘာသာရေးဆိုင်ရာ ပါတီခေါင်းဆောင်က "ကျွန်တော်တို့ဟာ ဟားမက်စ်နဲ့အတူ အစ္စရေး တပ်ဖွဲ့တွေကို ရှေ့တန်းမှာအတူတိုက်ခိုက်ဖို့ အဆင့်သင့်ရှိနေပါတယ်" လို့ ပြောပါတယ်။ အဆိုပါပါတီက ဦးဆောင်ပြီး Peshawar ဒေသမှာ ပါလက်စတိုင်း နဲ့ စုစည်းညီညွှတ်ကြောင်း ကြီးမားတဲ့ဆန္ဒပြပွဲတွေ လုပ်ဆောင် သွားမှာဖြစ်ကြောင်း သိရပါတယ်။ 

ပါလက်စတိုင်းသမ္မတ မာမွတ်အာဘက်ဟာ ဂါဇာဒေသမြောက်ပိုင်းကို ရွှေ့ပြောင်းပေးဖို့ အစ္စရေးစစ်တပ်ရဲ့ တောင်းဆိုချက်တွေကိုငြင်းဆန်ပယ်ချလိုက်ကြောင်း သိရပါတယ်။ ပါလက်စတိုင်းသမ္မတဟာ အမေရိကန်သမ္မတ ဂျိုးဘိုင်ဒန် နဲ့ ဖုန်းဆက်ဆွေးနွေးချိန်အတွင်း ဂါဇာဒေသခံတွေကိုဘေးလွတ်ရာကို ရွှေ့ပြောင်းဖို့ တောင်းဆိုချက် တွေကို ငြင်းဆန်ခဲ့တာပါ။ အမေရိကန်သမ္မတက ဂါဇာဒေသမှာ လူသားချင်းဆိုင်ရာစာနာမှုအကူအညီပေးရေး လိုအပ်ချက်တွေရရှိအောင် ကြိုးပမ်းနေတဲ့ ပါလက်စတိုင်းအစိုးရဲ့ကြိုးပမ်းမှုတွေကို ကူညီထောက်ပံ့ပေးမယ်လို့ ဆိုပါတယ်။