ဂျန်ဇက် (NSS) - အောက်တိုဘာ ၁၃

အမေရိကန်အစိုးအနေနဲ့ အစ္စရေးနဲ့ပါလက်စတိုင်းတို့ဖြစ်ပွားနေတဲ့စစ်ပွဲမှာ အစ္စရေးကို စစ်ရေးအကူအညီများပေးမှာ ဖြစ်ပေမယ့် စစ်ပွဲမှာပါဝင်ဖို့ အမေရိကန်တပ်ဖွဲ့ဝင်များ စေလွှတ်ဖြန့်ကြတ်မှာ မဟုတ်ကြောင်း အမေရိကန် အမျိုးသားလုံခြုံရေးကောင်စီပြောရေးဆိုခွင့်ရှိသူ ဂျွန်ကီဘိုင်က ထုတ်ဖော်ပြောဆိုလိုက်ပါတယ်။ 

အမေရိကန်အစိုးရအနေနဲ့ မြေထဲပင်လယ်အရှေ့ဘက်ပိုင်းကို လေယာဉ်တင်သင်္ဘောတွေ စေလွှတ်ထားပြီး အစ္စရေး နဲ့အတူ ပါဝင်တိုက်ခိုက်ဖွယ်ရှိတယ်လို့ သတင်းတွေထွက်ပေါ်လာခဲ့ပြီးနောက် ဂျွန်ကာဘိုင်က တုံ့ပြန်ခဲ့တာဖြစ်ပါ တယ်။ ၎င်းက "အစ္စရေးဟာ သူတို့ပိုင်နက်ထဲမှာ နိုင်ငံခြားသားတပ်ဖွဲ့တွေ ခြေချတာကို လက်ခံလိုလားမှုမရှိတာ ရှင်းလင်း သေချာတယ်။ အစ္စရေးဟာ ဟားမက်စ်အဖွဲ့အပေါ်တိုက်ခိုက်မယ့် စစ်ဆင်ရေးမှာ သူတို့ကိုယ်တိုင်သာ လုပ်လိုတယ်။ အစ္စရေးမှာ အဲဒီလိုမျိုး ကိုယ်တိုင်တိုက်ခိုက်ဖို့အခွင့်ရေးရှိတယ်။ ဒါကြောင့် အစ္စရေးနဲ့ ဟားမက်စ် တို့ရဲ့မြေပြင်စစ်ပွဲတွေမှာ အမေရိကန်တပ်ဖွဲ့တွေ ပါဝင်လာမှာ မဟုတ်ဘူး" လို့ ပြောပါတယ်။

အမေရိကန်ဟာ ဟားမက်စ်အဖွဲ့ ပြန်ပေးဆွဲထားတဲ့လူတွေ ဘယ်လိုမျိုး ပြန်ကယ်တင်ရမလဲဆိုတဲ့အချက်ကို အစ္စရေးနိုင်ငံကို အကြံပေးတာ၊ တိုင်ပင်တာတွေ ရှိနေကြောင်း သိရပါတယ်။ ဟားမက်စ်အဖွဲ့ဟာ အောက်တိုဘာ ၇ ရက်က အစ္စရေးနိုင်ငံအပေါ် ကြိုတင်သတိပေးချက်မရှိဘဲ တိုက်ခိုက်ခဲ့ရာ နှစ်ဖက်စစ်ပွဲ စတင်ခဲ့ကြောင်း သိရပါတယ်။ 

အစ္စရေးစစ်တပ်ဟာ သေးငယ်ပေမယ့် အလွန်တိုက်ခိုက်နိုင်စွမ်းရှိကြောင်း၊ အစ္စရေးစစ်တပ်ရဲ့ စွမ်းဆောင်ရည်များ ပိုမိုကောင်းမွန်စေဖို့ အမေရိကန်နိုင်ငံက လိုအပ်တာများ ကူညီပံ့ပိုးပေးမှာဖြစ်ကြောင်း အမေရိကန်အမျိုးသား လုံခြုံရေးကောင်စီပြောရေးဆိုခွင့်ရှိသူက ပြောပါတယ်။ ဟားမက်စ်အဖွဲ့ဟာ အောက်တိုဘာ ၇ ရက်က ဂါဇာမြို့ အနီးကျင်းပနေတဲ့ ဂီတပွဲတော်အပြင် မြို့နယ်၊ကျေးရွာများနဲ့ အစ္စရေးအခြေချနေထိုင်သူများရှိတဲ့ နေရာပေါင်း ၂၂ ခုကို တိုက်ခိုက်ခဲ့ကြောင်း သိရပါတယ်။