စော(NSS) - အောက်တိုဘာ ၁၂

City Taxi ယာဉ်များအနေဖြင့် အဝါရောင် sticker များကို (၃)လအတွင်း YRTC ၌ လာရောက်ကပ်ပါက အခမဲ့လုပ်ဆောင်ပေးမည်ဖြစ်ကြောင်း YRTC မှ တွဲဖက်အတွင်းရေးမှူး ဦးလျန်ကျင့်မာန်က ပြောသည်။

တွဲဖက်အတွင်းရေးမှူး ဦးလျန်ကျင့်မာန်က ယနေ့(အောက်တိုဘာလ ၁၂ ရက်)တွင်  YRTC ရုံးချုပ်၌ ကျင်းပသော သတင်းစာရှင်းလင်းပွဲ၌ အထက်ပါကဲ့သို့ပြောကြားခဲ့ခြင်းဖြစ်သည်။

အဆိုပါ City Taxi ယာဉ်များအား အခြားသော ယာဉ်များနှင့် ကွဲပြားမှုရှိစေရန်အတွက် Sticker ကပ်ခြင်းကို လာမည့် (နိုဝင်ဘာလ ၁ ရက်)မှစတင်၍ ဆောင်ရွက်သွားမည်ဖြစ် ကြောင်း သိရသည်။

“City Taxi ယာဉ်တွေ အခြားယာဉ်တွေနဲ့ ကွဲကွဲပြားပြားဖြစ်ဖို့ သိသာထင်ရှားစွာ မြင်နိုင်ဖို့အတွက် ရန်ကုန်တိုင်းဒေသကြီး ယာဉ်အန္တရာယ်ကင်းရှင်းရေးကောင်စီရဲ့လမ်းညွှန်ချက်အရ City Taxi ယာဉ်တွေရဲ့ဘေးမှာ အနံ(၅)လမ်းမလောက်ရှိတဲ့ အဝါလိုင်း Sticker ကပ်ခြင်း၊ အဝါရောင် ဆေးသုတ်ခြင်းကို နိုဝင်ဘာလ (၁)ရက်မှာ စတင်ဆောင်ရွက်မှာဖြစ်ပါတယ်”ဟု YRTC မှ အတွင်းရေးမှူးဦးလျန်ကျင့်မာန်က ပြောကြားခဲ့သည်။

၎င်း Sticker များကို ယာဉ်များ၏ ဘေးဘက် ရှေ့မီးခွက်အောက်မှ နောက်မီးခွက်အထိ သတ်မှတ်ထားသည့် Design အတိုင်း အလျားလိုက်ကပ်ရမည်ဖြစ်ကြောင်း သိရသည်။

ထို့သို့ သတ်မှတ်ထားသည့် Design အတိုင်း ညှပ်ခ အပါအဝင် Sticker တန်ဖိုးသည် ကျပ် (၅၀၀၀)ကျသင့်မည်ဖြစ်ကြောင်း ဦးလျန်ကျင့်မာန်က ပြောကြားခဲ့သည်။

“ဘေးစတစ်ကာရဲ့တန်ဖိုးက Design အတိုင်းဆိုရင် ညှပ်ခက (၅၀၀၀)လောက်ကျပါတယ်။ အဲဒါကို သုံးလအတွင်းလာ‌ရောက်ဆောင်ရွက်တဲ့လူတွေကို YRTC ကနေပြီး ကျခံပြီးဆောင်ရွက်ပေးမှာဖြစ်ပါတယ်။ ဝန်ထမ်းတွေက ကပ်ပေးပါမှာဖြစ်ပါတယ်”ဟု တွဲဖက် အတွင်းရေးမှူး ဦးလျန်ကျင့်မာန်က ပြောကြားခဲ့သည်။

City Taxi ယာဉ်ပိုင်ရှင်များအနေဖြင့် လာမည့် နိုဝင်ဘာလ (၁)ရက်မှ (၂၀၂၄)ခုနှစ်၊ ဇန်နဝါ ရီလကုန်အထိ (၃)လအတွင်း sticker များလာကပ်ပါက YRTC မှ လက်ခမယူဘဲ ဝန်ထမ်းများက အခမဲ့ကပ်ပေးမည်ဖြစ်ကြောင်း သိရသည်။

ထို့ပြင် ယာဉ်ပိုင်ရှင်များအား မိမိအစီအစဉ်ဖြင့် သတ်မှတ်ထားသည့် Design အတိုင်း Sticker ကပ်ခြင်းများ သို့မဟုတ် ဆေးသုတ်ခြင်းများကိုလည်း ခွင့်ပြုထားကြောင်း သိရသည်။

“ဒီဟာနဲ့ ပတ်သတ်ပြီးတော့ လိုက်နာမှုမရှိရင်တော့ ယာဉ်အန္တရာယ်ကင်းရှင်းရေးနှင့် မော် တော်ယာဉ်စီမံခန့်ခွဲမှု ဥပဒေပုဒ်မ(၉၆)အရ ဒဏ်ကြေးကျပ်(၃၀၀၀၀) ထက်မပိုသော ငွေဒဏ်ကို ချမှတ်မှာဖြစ်ပါတယ်။ မနာခံမှုနဲ့ အရေးယူလို့ရပါတယ်”ဟု ၎င်းက ထပ်မံပြောကြားခဲ့သည်။ 

လက်ရှိတွင် YRTC ၌ မှတ်ပုံတင်ထားသည့် City Taxi ယာဉ်သည် (၅၃၀၀၀)ကျော်ရှိကြောင်း သိရသည်။