Pika (NSS) - အောက်တိုဘာ ၁၁ 

မလေးရှားနိုင်ငံသည်  အမေရိကန်ဒေါ်လာအပေါ် မှီခိုအားထားနေရမှုများကို လျှော့ချရန်အတွက် ပြည်တွင်းသုံး ငွေကြေးဖြင့် အခြေချမှုများကို ပိုမိုတိုးမြှင့်လုပ်ဆောင်ရန် စီစဉ်နေကြောင်း မလေးရှားဝန်ကြီးချုပ် အန်ဝါအီဘရာဟင်က ထုတ်ဖော်ပြောခဲ့သည်။ 

အန်ဝါအီဘရာဟင် က "အမေရိကန်ဒေါ်လာအပေါ် မှီခိုအားထားနေရတာကို လုံးဝရပ်တန့်ဖို့က ခက်ခဲပါလိမ့်မယ်။ ဒါပေမယ့် မလေးရှားအစိုးရဟာ ကုန်သွယ်မှုတွေမှာ မလေးရှားငွေကြေးရင်းဂစ်ကို ပိုမိုတိုးမြှင့်အသုံးပြုဖို့ စီစဉ်နေပါတယ်" ဟု ပြောခဲ့သည်။ 

အရှေ့တောင်အာရှတွင် အမေရိကန်ဒေါ်လာအသုံးမပြုရေး လုပ်ငန်းစဉ်သည် ပိုမိုအားကောင်းလာခဲ့ကြောင်း ၎င်းက ပြောကြားခဲ့သည်။ ထို့အပြင် မလေးရှားနိုင်ငံသည် ကုန်သွယ်မှုများကို ပိုမိုလုပ်ဆောင်ရန်နှင့် ရင်းနှီးမြှုပ်နှံမှုများတွင် ပြည်တွင်းသုံးငွေကြေးများကို အသုံးပြုရန် အင်ဒိုနီးရှား၊ ထိုင်း၊ တရုတ်နိုင်ငံတို့ နှင့် သဘောတူညီချက်ရရှိထားပြီးပြီ ဖြစ်ကြောင်း အန်ဝါအီဘရာဟင် က ပြောကြားခဲ့သည်။

အမေရိကန်ဒေါ်လာ နှင့် နှိုင်းယှဉ်မည်ဆိုပါက မလေးရှားသုံးငွေကြေး ရင်းဂစ်၏ တန်ဖိုး သိသိသာသာကျဆင်းလာ ချိန်တွင် အဆိုပါလှုပ်ရှားမှုထွက်ပေါ်လာခြင်းဖြစ်သည်။ ကုန်သွယ်မှုများတွင် ရင်းဂစ်၏ တန်ဖိုးသည် သမိုင်းဝင် အနိမ့်ဆုံးသို့ ကျဆင်းသွားခဲ့ပြီး ယခုနှစ်တွင် အမေရိကန်ဒေါ်လာနှင့် နှိုင်းယှဉ်မည်ဆိုပါက ရင်းဂစ်၏ တန်ဖိုး (၇ ဒသမ ၆) ရာခိုင်နှုန်းခန့် ကျဆင်းသွားခဲ့ကြောင်း သိရသည်။

အမေရိကန်ဒေါ်လာအသုံးပြုမှုကို လျှော့ချရန်အတွက် နိုင်ငံတကာကုန်သွယ်မှုများတွင် နိုင်ငံသုံးငွေကြေးများ ပိုမိုတိုးမြှင့်အသုံးပြုလာခြင်းကို အရှေ့တောင်အာရှရှိ စီးပွားရေးပညာရှင်အများအပြား က ထောက်ပြခဲ့ကြောင်းလည်း သိရသည်။