မျိုးကြီး (NSS) - အောက်တိုဘာ ၁၁

NCA နှစ်ပတ်လည်ကျင်းပရန် ပြင်ဆင်နေချိန်၌ EAO အဖွဲ့များနှင့် ပစ်ခတ်တိုက်ခိုက်မှုကို အနည်းဆုံးဖြစ်ရန် ကြိုးပမ်းနေကြောင်း ဗိုလ်ချုပ်ဇော်မင်းထွန်းက ပြောသည်။

နစကပြောခွင့်ရ ဗိုလ်ချုပ်ဇော်မင်းထွန်းက ယနေ့(အောက်တိုဘာလ ၁၁ ရက်)တွင် KIA ဌာနချုပ် လိုင်ဇာမြို့အနီးရှိ မုန်လိုင်ချက်၌ဖြစ်ပွားခဲ့သည့် ပေါက်ကွဲမှုဖြစ်စဉ်နှင့်ပတ်သက်၍ မီဒီယာများကို အသိပေးရှင်းလင်းရာတွင် အထက်ပါကဲ့သို့ ထည့်သွင်းပြောကြားခဲ့ခြင်းဖြစ် သည်။

လက်ရှိတွင် ဗိုလ်ချုပ်မှူးကြီးမင်းအောင်လှိုင် ဦးဆောင်သော နစကအစိုးရအနေဖြင့် NCA လက်မှတ်ရေးထိုးခြင်း(၈)နှစ်ပြည့် နှစ်ပတ်လည်အခမ်းအနားကို အနှစ်သာရရှိရှိ ကျင်းပရန် ပြင်ဆင်နေသည်ဟု ပြောသည်။

“အစိုးရအနေနဲ့ကတော့ ဒီကာလဟာ NCA လက်မှတ်ရေးထိုးထားတဲ့ (၈)နှစ်ပြည့်ကာလ ဖြစ်တယ်။ တိုင်းရင်းသားလက်နက်ကိုင်အဖွဲ့အစည်းတွေအားလုံးကို NCA နှစ်ပတ်လည်နေ့ တက်ဖို့အတွက် ဖိတ်ခေါ်ထားတယ်။ အနှစ်သာရရှိရှိ လုပ်ဖို့လုပ်နေတယ်။ အဲဒီအချိန်အတွင်းမှာ ကျွန်တော်တို့ တိုင်းရင်းသားလက်နက်ကိုင်အဖွဲ့အစည်းတွေနဲ့ ပစ်ခတ်တိုက်ခိုက်မှုကို အနည်းဆုံးဖြစ်အောင် ဆောင်ရွက်ကြိုးပမ်းလျက်ရှိတယ်”ဟု ဗိုလ်ချုပ်ဇော်မင်းထွန်းက ပြော သည်။

ထို့ကြောင့် ယခုကဲ့သို့ NCA နှစ်ပတ်လည်အခမ်းအနားကျင်းပရန် ပြင်ဆင်နေချိန်၌ KIA ဌာနချုပ်အနီးရှိ မုန်လိုင်ချက်ဒေသကို တပ်မတော်အနေဖြင့် ပစ်ခတ်တိုက်ခိုက်စရာအ ကြောင်းမရှိကြောင်းလည်း ၎င်းက ထပ်မံပြောသည်။

ထို့ပြင် မုန်လိုင်ချက်ဒေသ၌ ပေါက်ကွဲမှုဖြစ်စဉ်အတွင်း ထိခိုက်သေဆုံးခဲ့ရသူများနှင့် ဒဏ်ရာရရှိခဲ့သူများအပေါ် နစကအစိုးရအနေဖြင့် ဝမ်းနည်းရကြောင်းလည်း နစကပြောခွင့်ရက အသိပေးပြောကြားသည်။

လာမည့် အောက်တိုဘာလ ၁၅ ရက်တွင် နေပြည်တော်၌ တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) လက်မှတ်ရေးထိုးခြင်း (၈)နှစ်ပြည့်အခမ်းအနားကို ကျင်းပသွားမည်ဖြစ်ကြောင်း သိရသည်။

အဆိုပါအခမ်းအနားသို့ တက်ရောက်ရန်အတွက် တိုင်းရင်းသားလက်နက်ကိုင်အဖွဲ့အစည်းအားလုံးကို ဖိတ်ကြားထားကြောင်းသိရပြီး NCA ကို ကိုယ်တိုင်လက်မှတ်ရေးထိုးခဲ့သူများ၊ နိုင်ငံတကာမှ အသိသက်သေများကိုလည်း ဖိတ်ကြားထားကြောင်း သိရသည်။