စော(NSS) - အောက်တိုဘာ ၁၁

စံချိန်တင်ရေကြီးရေလျှံမှုဖြစ်ပေါ်ခဲ့သည့် ပဲခူးမြို့၌ ယနေ့ (အောက်တိုဘာလ ၁၁ရက်) နံနက်ပိုင်းတွင် ရေများပြန်လည်ကျဆင်းလာကြောင်း သတင်းရရှိသည်။

ပဲခူးမြို့၌ မိုးများအဆက်မပျက်ရွာသွန်းမှုနှင့် ပဲခူးမြစ်ရေ စံချိန်တင်မြင့်တက်လာမှုများကြောင့်  ပြီးခဲ့သည့် (အောက်တိုဘာလ ၇ရက်) ညပိုင်းမှ စတင်ကာ ရေကြီးရေလျှံမှုများဖြစ်ပေါ်လာခဲ့သည်။

အဆိုပါ ရေကြီးရေလျှံမှုများကြောင့် ပဲခူးမြို့တွင် ရေဝင်ရောက်မှုများဖြစ်ပေါ်ခဲ့ပြီး ကားလမ်းများနှင့် ရထားလမ်းပေါ်သို့လည်း ရေကျော်မှုများကြောင့် ကားများနှင့် ရထားလမ်းခရီးစဉ်များ ဖျက်သိမ်းခဲ့ရသည်။

သို့သော် ပဲခူးမြို့ပေါ်တွင် ယနေ့(အောက်တိုဘာလ ၁၁ ရက်)၊နံနက်ပိုင်းမှ စတင်ကာ ရေများ ပြန်လည်ကျဆင်းလာပြီး ကားလမ်းအချို့၌ ရေများမရှိတော့ကြောင်း သိရသည်။

“မြို့ပေါ်လမ်းမကြီးတွေတော့ ရေကကျသွားပါပြီ။ ရွှေမော်ဓောဘုရားကြီးရှေ့၊ အနောက်မုဒ်လမ်းတန်းတန်းဆိုရင် ရေကလုံးဝမရှိတော့ဘူး ပြန်ကျသွားပြီ။ main လမ်းမကြီးတို့ မြို့ထဲအချို့နေရာတွေမှာဆိုရင် ရေကနည်းနည်းပဲကျန်တော့တာ။ ambulance တွေတော့ဖြတ်မောင်းနေတာပဲ။ ကုန်းမြင့်ပိုင်းတွေတော့ ရေကကျသွားတာပေါ့။ အနိမ်ပိုင်းနေရာလေးတွေတော့ ရေနည်းနည်းများနေတာပေါ့။ ကားလမ်းပွင့်သွားပြီဆိုတာထက် မောင်းလို့ရတဲ့အနေထားလေးရောက်တာပေါ့”ဟု ပဲခူးမြို့သို့ သွားရောက်ကူညီနေသည့် ပရဟိအသင်းသားတစ်ဦးက NSS ကိုပြောသည်။

ပဲခူးမြို့၌ ရေများကျဆင်းသွားခြင်းကြောင့် ကားများ ပြန်လည်သွားလာနေကြကြောင်း သိရသည်။

 “ရေက လုံးလုံးကြီးကျသွားတာလို့တော့ ကျွန်တော်တို့ပြောလို့မရသေးဘူး။ ရပ်ကွက်ထဲမှာရှိတဲ့ ရေတွေက မကုန်သေးတဲ့အတွက်ကြောင့်ပါ။နောက်ပြီး ရေကြီးနေတဲ့ရပ်ကွက်တွေထဲမှာပဲ ရေကမကုန်သေးတာ။ ဇင်းတောင်၊ ‌ဇင်းမြောက်၊ ကျောက်ကြီးစုမှာတော့ ရေတွေဝင်နေသေးတယ်။ လမ်းမတန်းတွေတော့ ရေကမရှိတော့ဘူး”ဟု ပဲခူးမြို့နယ် မီးသတ်စခန်းမှ တာဝန်ရှိသူတစ်ဦးက NSS ကိုပြောသည်။

ပဲခူးမြို့ရှိ ရပ်ကွက်အချို့တွင် ရေများပြန်လည်ကျဆင်းမှုရှိသော်လည်း လှေဖြင့် သွားလာနေရမှုများရှိနေကြောင်း သိရသည်။

“ရေကတော့ကျသွားပြီပေါ့နော်။ ဘုရားကြီးဆိုလည်း လမ်းပွင့်သွားပြီ။ ကျွန်တော်တို့ ကူညီကယ်ဆယ်နေတဲ့ မှော်ကန်၊ ဆိုရှယ်လစ်၊ ပုဏ္ဏားစုတို့ဆို (၃)ပေ၊ (၄)ပေလောက်ကျသွားပြီ။ ရေကျတယ်ဆိုပေမဲ့ လှေနဲ့သွားနေရတုန်း။ အရင်တုန်းက ရေက လူရဲ့တစ်ရပ်ကျော်မြုပ်တာကို”ဟု ဝန်းရံမှူးလူမှုကူညီကယ်ဆယ်ရေးအသင်းမှ တာဝန်ရှိသူတစ်ဦးက NSS ကိုပြောသည်။

ပဲခူးမြို့၌ မိုးရွာသွန်းမှုနှင့် ပဲခူးဖြစ်ရေ စံချိန်တင် မြင့်တက်လာမှုကြောင့် ရေဘေးသင့်ပြည်သူ (၂၀၀၀၀)နီးပါးရှိခဲ့ပြီး ကယ်ဆယ်ရေးစခန်း (၄၁)ခုသို့ ပြောင်းရွှေ့ခဲ့ရကြောင်း သိရသည်။