အင်းလေးကန် စံချိန်တင် ရေမြင့်တက်နေခြင်းကြောင့် ဒေသခံများ စိုးရိမ်နေ
NSS - အောက်တိုဘာ ၁၀
ရှမ်းပြည်နယ်တောင်ပိုင်း၊ ညောင်ရွှေမြို့နယ်ရှိ အင်းလေးကန်သည် ၁၈ နှစ်အတွင်း စံချိန်တင်ရေမြင့်တက်လာခြင်းကြောင့် နေထိုင်ရေးအတွက် စိုးရိမ်နေရကြောင်း ဒေသခံများထံမှ သိရသည်။
မိုးရာသီကာလ ဇူလိုင်လ အစပိုင်းကတည်းက မိုးသည်းထန်စွာ ရွာသွန်းမှုကြောင့် ယခုရက် ပိုင်းတွင် စံချိန်တင်ရေတက်လာပြီး အင်လေးကန်အတွင်းရှိ ကျေးရွာအချို့တွင် နေအိမ်အောက်ထပ်များ၌ ရေဝင်နေကြောင်းသိရသည်။
ယခင် ၂၀၀၅ ခုနှစ်၌ အင်းလေးကန်၌ စံချိန်တင်ရေမြင့်တက်ပြီး ဖောင်တော်ဦးဘုရား ရင်ပြင်အထိ ရေဝင်ရောက်ခြင်းကြောင့် ဈေး၊ ဈေးဆိုင်ခန်းများနှင့် စာသင်ကျောင်းများ တစ်လခန့် ပိတ်ထားခဲ့ရကြောင်း သိရသည်။
“ရေက ရွာလယ်လမ်း ကြွေပြားတွေအထိ ဝင်လာပြီ။ ဒီထက် တက်လာရင်လည်း လှေနဲ့ သွားလို့ရတာပေါ့။ မဟုတ်ဘူးဆိုလည်း ရေနည်းနည်းတော့ ကျစေချင်တာပေါ့။ အခုက ဟိုမရောက် ဒီမရောက် လမ်းလျှောက်လည်း ရေစို၊ လှေနဲ့လည်း သွားလို့မရ။ နမ့်ဟူး (ဖောင်တော်ဦးဘုရား အနောက်ရွာ)မှာတော့ အိမ်အောက်ထပ်တွေ ရေဝင်နေပြီ ”ဟု ဖောင်တော်ဦးဘုရားအနီး သာလေးကျေးရွာတွင် နေထိုင်သူတစ်ဦးက NSS ကိုပြောသည်။
အင်းလေးကန် ရေတက်လာခြင်းသည် အောက်တိုဘာလ ၁၅ ရက်တွင် ကျင်းပမည့် ဒေသစာရီ ကြွချီပူဇော်ပွဲတော်အတွက် အဆင်ပြေသော်လည်း စီးပွားရေးနှင့် နေထိုင်ရေးများ အတွက် အခက်အခဲရှိလာနိုင်ကြောင်း ပြောသည်။
လက်ရှိတွင် ဖောင်တော်ဦးဘုရား ရင်ပြင်သို့ ရေရောက်ရှိရန် ၃ တောင်ခန့်သာလိုပြီး ရေထပ် မံတက်လာပါက ဘုရားရင်ပြင်ထဲ ရေဝင်ရောက်ပြီး ပွဲတော်ထိခိုက်မည်ကို စိုးရိမ်ရကြောင်း ဖောင်တော်ဦးဘုရားမှဈေးသည်တစ်ဦးက NSS ကိုပြောသည်။
“ပွဲတော်မဖြစ်တာ ၃ နှစ်ကြာပြီလေ။ ဒီနှစ်ပြန်လုပ်မယ်ဆိုတော့ အားခဲထားတာ။ ရေထပ်တက်လာရင်တော့ ဈေးမရောင်းရတော့ဘူး။ ဘယ်သူမှလည်း လာကြတော့မှာ မဟုတ်ဘူး။ ဒီလောက်အနေအထားဆိုရင်တော့ မဆိုးဘူး။ မိုးထပ်ရွာရင်တော့ မလွယ်ဘူး။ အင်းလေးမှာက သိတဲ့အတိုင်း ရေတက်ရင် တအားမြန်တာ”ဟု အဆိုပါ ဈေးသည်က ပြောသည်။
လတ်တလော၌ အင်းလေးကန် အနောက်ဘက် လမ်းပိုင်းအချို့တွင် ရေဝင်ရောက်နေပြီး ဆိုင်ကယ်များသွားလာရန် ခက်ခဲနေကြောင်းသိရသည်။
ဖောင်တော်ဦး ဘုရားပွဲကို အောက်တိုဘာလ ၁၅ ရက်မှ နိုဝင်ဘာလ ၁ ရက်အထိ ကျင်းပမည်ဖြစ်ပြီး ရှေးအစဉ်အလာအတိုင်း နေရာ၂၁ ခုသို့ ဒေသစာရီကြွချီအပူဇော်ခံမည်ဖြစ်ကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
မြန်မာလုပ်သားများ၏ ဝန်ထမ်းထောက်ပံ့ရေး စုဆောင်းငွေများကို ပြန်လည်ထုတ်ယူနိုင်ကြောင်း မလေးရှားရှိ မြန်မာသံရုံးအသိပေး
RELATED POSTS
19 Sep 2024 | အထွေထွေ,ပြည်တွင်း
19 Sep 2024 | အထွေထွေ,ပြည်တွင်း
19 Sep 2024 | အထွေထွေ,ပြည်တွင်း