ဂျန်ဇက် (NSS) - အောက်တိုဘာ ၁ဝ

အစ္စရေးအာဏာပိုင်တွေက ဂါဇာကမ်းမြောင်ဒေသမှာ ပါလက်စတိုင်းလက်နက်ကိုင်အဖွဲ့ဖြစ်တဲ့ ဟာမက်အဖွဲ့ရဲ့ ပြန်ပေးဆွဲခံထားရသူဦးရေ အနည်းဆုံး ၁၅ဝ ကျော်ရှိနေတယ်လို့ ယုံကြည်နေပါတယ်။ ဟာမက်အဖွဲ့ဟာ အစ္စရေး နိုင်ငံကို အောက်တိုဘာ ၇ ရက်နေ့မှာ ကျူးကျော်တိုက်ခိုက်ခဲ့ပြီးနောက် အစ္စရေးစစ်သားတွေ အပါအဝင် လူအများ အပြားကို ကုန်ကားတွေနဲ့ခေါ်ဆောင်ကာ ဖမ်းဆီးသွားခဲ့တယ်လို့ သိရပါတယ်။ 

အစ္စရေးစစ်ဘက်က အစ္စရေးနိုင်ငံပိုင်နက်အတွင်းနဲ့ ဂါဇာကမ်းမြောင်ပတ်ဝန်းကျင်တွေမှာ ဟာမက်စစ်သွေးကြွအဖွဲ့ဝင် ၁၅ဝဝ ကျော်ရဲ့ရုပ်အလောင်းကို တွေ့ရှိခဲ့ကြောင်း ပြောပါတယ်။ အစ္စရေးကာကွယ်ရေးဝန်ကြီးက ဂါဇာ ကမ်းမြောင်ဒေသရှိ အစ္စရေးအဖွဲ့အစည်းများအားလုံးကို ဘေးလွှတ်ရာကိုရွှေ့ပြောင်းပေးမှုတွေ အပြီးသတ်တော့မှာ ဖြစ်ကြောင်း ပြောပါတယ်။

အစ္စရေးဟာ ပါလက်စတိုင်းလက်နက်ကိုင်အဖွဲ့ရဲ့နေရာတွေကို ပစ်မှတ်ထားပြီးလေကြောင်း ဗုံးကြဲတိုက်ခိုက်မှုတွေ ဆက်လက်လုပ်ဆောင်ခဲ့ရာ အောက်တိုဘာ ၉ ရက် ညပိုင်းက ဂါဇာကမ်းမြောင်ဒေသရှိ နေရာပေါင်း ၂ဝဝ ကျော်ကို ပစ်မှတ်ထားတိုက်ခိုက်ခဲ့ကြောင်း သိရပါတယ်။ ဗုံးကြဲတိုက်ခိုက်ရာမှာ ဟာမက်လက်နက်ကိုင်အဖွဲ့လက်နက်များ သိုလှောင်ထားတဲ့နေရာတွေလို့ယူဆရတဲ့ ဗလီတွေ၊ နဲ့ အခြားအဆောက်အဦးတွေကို ပစ်မှတ်ထားတိုက်ခိုက်ခဲ့တယ် လို့ အစ္စရေးစစ်ဘက်က ပြောပါတယ်။ 

အစ္စရေးစစ်ဘက်ဟာ အောက်တိုဘာ ၇ ရက်က အစ္စရေးနိုင်ငံတောင်ပိုင်းကို စိမ့်ဝင်လာတဲ့ ဟာမက်လက်နက်ကိုင်အဖွဲ့ ချိုးဖျက်ခဲ့တဲ့ ဂါဇာဒေသခြံစည်းရိုးကို အပြည့်အဝပြန်လည်ထိန်းချုပ်နိုင်ခဲ့တယ်လို့ ဆိုပါတယ်။ အစ္စရေး ကာကွယ်ရေးဝန်ကြီးဌာန ပြောရေးဆိုခွင့်ရှိသူက ပြီးခဲ့တဲ့ ၂၄ နာရီအတွင်း အစ္စရေးနယ်စပ်ခြံစည်းရိုးကို ဖြတ်ကျော် ဝင်ရောက်တိုက်ခိုက်ခဲ့တဲ့ ဟာမက်လက်နက်ကိုင်အဖွဲ့ဝင်တွေ မရှိခဲ့ကြောင်း ပြောပါတယ်။ အစ္စရေးစစ်တပ်ဟာ ဟာမက်လက်နက်ကိုင်အဖွဲ့တွေ ထပ်မံကျူးကျော်ဝင်ရောက်တာတွေကို တားဆီးဖို့ နယ်စပ်ခြံစည်းရိုးနားမှာ အတားအဆီးတွေ၊ မိုင်းတွေ ဖြန့်ကြတ်ချထားဖို့ စီစဉ်နေတယ်လို့ ဆိုပါတယ်။ 

အစ္စရေးနဲ့ ဟာမက်အဖွဲ့ကြားဖြစ်ပွားနေတဲ့ စစ်ပွဲကြောင့် ထိုင်းနိုင်ငံသား သေဆုံးသူအရေအတွက် ဆက်လက် မြင့်တက်လာနေပြီး အနည်းဆုံး ၁၈ ဦးအထိ သေဆုံးခဲ့ကြောင်း ထိုင်းမီဒီယာတွေက ဖော်ပြပါတယ်။ ပါလက်စတိုင်း လက်နက်အဖွဲ့က ပြန်ပေးဆွဲထားတဲ့လူတွေထဲမှာ ထိုင်းအမျိုးသမီးတစ်ဦးနဲ့ ထိုင်းနိုင်ငံသား ၁ဝ ဦး ပြန်ပေးဆွဲခံ ထားရကြောင်း သိရပါတယ်။ ထိုင်းအစိုးရဟာ စစ်ပွဲတွေကြောင့် အစ္စရေးနိုင်ငံအတွင်းရောက်ရှိနေတဲ့ ထိုင်းနိုင်ငံသား ၃ဝဝဝ ကျော်ကို မိခင်နိုင်ငံကို အမြန်ဆုံးပြန်လာဖို့ တိုက်တွန်းထားပါတယ်။