ဂျန်ဇက် (NSS) - အောက်တိုဘာ ၁ဝ

ထိုင်းအစိုးရသည် မြန်မာ နှင့် ထိုင်းနိုင်ငံနယ်စပ်ဒေသတစ်လျှောက်ရှိ ကျန်းမာရေးပိုင်းဆိုင်ရာစိန်ခေါ်မှုများ နှင့် ရင်ဆိုင်နေရသောမြန်မာပြည်သူများအတွက် လူသားချင်းဆိုင်ရာစာနာမှုအကူအညီပေးမှုအဖြစ် ထိုင်းဘတ် ငွေ ၃ ဒသမ ၆ သန်း ကူညီလှူဒါန်းလိုက်ကြောင်း ထိုင်းနိုင်ငံခြားရေးဝန်ကြီးဌာနက သတင်းထုတ်ပြန်ထားသည်။ 

ထိုင်းအစိုးရသည် ထိုင်း နှင့် မြန်မာနယ်စပ်ဒေသတစ်လျှောက်ရှိ ကျန်းမာရေးဆိုင်ရာအကူအညီများပေးနိုင်ရန် အတွက် ကုလသမဂ္ဂကလေးငယ်များ ရန်ပုံငွေ UNICEF အဖွဲ့ထံကူညီလှူဒါန်းပေးခဲ့ခြင်းဖြစ်ကြောင်း သိရသည်။

ထိုင်းဒုတိယဝန်ကြီးချုပ်ဖြစ်သလို ထိုင်းနိုင်ငံခြားရေးဝန်ကြီး  Parnpree Bahiddha-Nukara ဦးဆောင်သော အဖွဲ့သည် အဆိုပါကူညီလှူဒါန်းငွေများကို ထိုင်းနိုင်ငံရှိ UNICEF ကိုယ်စားလှယ်ရုံးတာဝန်ရှိသူများထံ ကူညီလှူဒါန်းပေးခဲ့ခြင်းဖြစ်ကြောင်း သိရသည်။ ထိုင်းနိုင်ငံခြားရေးဝန်ကြီးဌာနက ထိုင်းနှင့်နယ်စပ်ချင်းထိစပ်နေသော မြန်မာနိုင်ငံ ကရင်ပြည်နယ်၊ ကယားပြည်နယ်တို့တွင် ကျန်းမာရေးနှင့်ပတ်သက်ပြီး လူသားချင်းဆိုင်ရာစာနာမှု အကူအညီလိုအပ်နေသူများကို အာဟာရပြည့်စေရန်၊ သောက်ရေသန့်၊ တစ်ကိုယ်ရေသန့်ရှင်းရေးသုံးပစ္စည်း နှင့် သန့်ရှင်ရေးပစ္စည်းများ၊ ကလေးငယ်များကို ကာကွယ်ဆေးအပြင် စိတ်ပိုင်းဆိုင်ရာကူညီပေးနိုင်မှုများ ပြုလုပ်နိုင်ရန် အတွက် UNICEF အဖွဲ့ကို ကူညီလှူဒါန်းပေးခဲ့ခြင်းဖြစ်ကြောင်း သတင်းထုတ်ပြန်ထားသည်။ 

ထိုင်းနိုင်ငံခြားရေးဝန်ကြီးဌာနက "မြန်မာနိုင်ငံကို လူသားချင်းဆိုင်ရာစာနာမှုအကူအညီများ ပေးနိုင်အောင် ကူညီ ထောက်ပံ့ပေးဖို့ ထိုင်းအစိုးရကတိတွေ ခိုင်မာမှုရှိကြောင်း ပြသတာပါ။ ဒါ့အပြင် ကုလသမဂ္ဂရဲ့လုပ်ငန်းတွေကို ထိုင်းအစိုးရက အပြုသဘောဆောင်တဲ့ ကူညီထောက်ပံ့ပေးဖို့ရည်ရွယ်တာလည်း ဖြစ်ပါတယ်။ ဒီကူညီလှူဒါန်းမှု တွေဟာ ထိုင်းနဲ့ မြန်မာနယ်စပ်ဒေသတစ်လျှောက်မှာ နေထိုင်နေတဲ့ လူတွေအတွက် အများပြည်သူကျန်းမာရေး ဆိုင်ရာစနစ်တွေကို ပိုမိုကောင်းမွန်လာစေဖို့ အထောက်ပံ့ဖြစ်မှာပါ" ဟု ပြောသည်။