KIA ဌာနချုပ် လိုင်ဇာမြို့အနီး၌ ပေါက်ကွဲမှုဖြစ်စဉ်တစ်ခု ဖြစ်ပွားခဲ့ရာ ကလေးငယ်များအပါအဝင် လူ(၃၀)ထက်မနည်း သေဆုံးခဲ့
မြူနစ် (NSS) - အောက်တိုဘာ ၁၀
ကချင်တိုင်းရင်းသားလက်နက်ကိုင်အဖွဲ့ KIA ဌာနချုပ် လိုင်ဇာမြို့အနီး၌ ပေါက်ကွဲမှုဖြစ်စဉ်တစ်ခုဖြစ်ပွားခဲ့ရာ ကလေးငယ်များအပါအဝင် လူ(၃၀)ထက်မနည်းသေဆုံးခဲ့ကြောင်း သတင်းရရှိသည်။
အဆိုပါပေါက်ကွဲမှုဖြစ်စဉ်သည် ယမန်နေ့(အောက်တိုဘာလ ၉ ရက်) ညသန်းခေါင်ယံအချိန်၌ လိုင်ဇာမြို့နှင့် (၂)မိုင်ခန့်သာ ကွာဝေးသော မုန်လိုင်ခက်စစ်ရှောင်စခန်း၌ ဖြစ်ပွားခဲ့ကြောင်း သိရသည်။
၎င်းကဲ့သို့ ပေါက်ကွဲမှုဖြစ်စဉ်အတွင်း (၁၀)ဦးထက်မနည်းသော ကလေးငယ်များအပါအဝင် လူပေါင်း (၃၀)ဝန်းကျင်ခန့် ထိခိုက်သေဆုံးခဲ့ကြောင်း သတင်းများထွက်ပေါ်လျက်ရှိသည်။
KIA ဌာနချုပ်အနီးရှိ မုန်လိုင်ခက်စစ်ရှောင်စခန်းကို တပ်မတော်က လေယာဉ်ဖြင့် ဗုံးကြဲတိုက်ခိုက်ခဲ့ခြင်းဖြစ်ကြောင်း သတင်းဖော်ပြမှုများရှိနေသည်ကို တွေ့ရှိရသည်။
လိုင်ဇာမြို့အနီး ပေါက်ကွဲမှုဖြစ်စဉ်နှင့်ပတ်သက်၍ နစက၏ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက မြေပြင်သတင်းအခြေအနေကို စုံစမ်းနေဆဲဖြစ်ကြောင်း ယနေ့(အောက်တိုဘာလ ၁၀ ရက်) နံနက်ပိုင်းတွင် မီဒီယာများကို ဖြေကြားသည်။
“ဒီလိုင်ဇာသတင်းနဲ့ပတ်သက်ပြီး ကျွန်တော်တို့အနေနဲ့လည်း စုံစမ်းနေဆဲ ဖြစ်ပါတယ်။ တစ်ခုက ကျွန်တော်တို့အနေနဲ့က ဒီနယ်စပ်ဒေသ တည်ငြိမ်အေးချမ်းရေးကို အမြဲတမ်းထိန်းသိမ်းဆောင်ရွက်လျက်ရှိတယ်။ ဒီနယ်စပ်ဒေသနဲ့ နီးတဲ့နေရာမှာ ညသန်းခေါင်အချိန်လောက်ကြီးမှာ ဗုံးကြဲတိုက်ခိုက်တယ်လို့၊ လက်နက်ကြီးနဲ့ ပစ်ခတ်တယ်လို့ဆိုတာ ဖြစ်နိုင်သလားဆိုတာ စဉ်းစားစေချင်ပါတယ်။ ကျွန်တော်တို့ ပြောခဲ့ပြီးဖြစ်တယ်။ တပ်မတော်အနေနဲ့ကတော့ မည်သည့်ဌာနချုပ်မဆို၊ လက်နက်ကိုင်သောင်းကျန်းနေတဲ့ မည်သည့်ဌာနချုပ်မဆို ကျွန်တော်တို့ ပစ်ခတ်နိုင်တယ်။ တိုက်ခိုက်နိုင်တယ်။ သို့သော် ကျွန်တော်တို့ ပစ်ခတ်တိုက်ခိုက်မှု မရှိခဲ့ဘူးဆိုတာကို ပြောပြီးဖြစ်ပါတယ်”ဟု ဗိုလ်ချုပ်ဇော်မင်းထွန်းက ပြောသည်။
ပေါက်ကွဲမှုဖြစ်ပွားခဲ့သော နေရာအား တပ်မတော်က လေယာဉ်ဖြင့် ပစ်ခတ်သည်ဟု ပြော ဆိုမှုများရှိသကဲ့သို့ လက်နက်ကြီးဖြင့် ပစ်ခတ်သည်ဟုလည်း မတိမကျပြောဆိုနေမှုများရှိကြောင်းလည်း နစကပြောခွင့်ရက တုံ့ပြန်ထားသည်။
“ကျွန်တော် အတိအကျပြောနိုင်တာတစ်ခုကတော့ အဲဒီနေရာပေါ့၊ အခုပေါက်ကွဲမှုဖြစ်ခဲ့တဲ့နေရာသည် KIA အနေနဲ့ UAV တွေသုံးပြီးတော့ မောင်းသူမဲ့လေယာဉ်တွေ သုံးပြီးတော့ တပ်မတော်စခန်းတွေကို Drop ဗုံး လာချတဲ့နေရာ၊ စစ်ကြောင်းတွေကို Drop ဗုံးလာချတဲ့ နေရာဖြစ်တယ်။ ဒါကြောင့်မိုလို့ ဒီမှာပေါက်ကွဲမှုတစ်ခုဖြစ်ခဲ့တယ်။ ဒီပေါက်ကွဲမှုသည် ဘာ ကြောင့်ဖြစ်တယ်ဆိုတာတော့ စုံစမ်းနေဆဲပဲ ဖြစ်တယ်”ဟု ၎င်းက ထပ်မံပြောသည်။
ထို့ပြင် နစကပြောခွင့်ရက ယခုပေါက်ကွဲမှုဖြစ်ပွားခဲ့သော နေရာသည် Drop ဗုံးများ သို လှောင်သည့်နေရာ ပေါက်ကွဲခြင်းဖြစ်နိုင်သည်ဟု သုံးသပ်ထားပြီး မြေပြင်သတင်းများကို စုံစမ်းနေဆဲဖြစ်ကြောင်း ပြောသည်။
မုန်လိုင်ခက်စစ်ရှောင်စခန်းသည် KIA ဌာနချုပ်ရှိရာ လိုင်ဇာမြို့၌ (၂)မိုင်ခန့်သာ ကွာဝေးပြီး ယင်းနေရာတွင် KIA နှင့် ၎င်း၏ မိသားစုဝင်များသာ အများစုနေထိုင်ကြောင်း သိရသည်ဟု ကချင်ပြည်နယ်အခြေစိုက် ဒူးလေးပါတီဥက္ကဋ္ဌဦးရွှေမင်းက NSS ကို ပြောသည်။
“ဘာမှ အသံမကြားဘူး။ “ချိမ်း”ဆိုတဲ့ အသံတစ်ချက်ပဲ ကြားပြီးတော့ ပြီးတာနဲ့ အားလုံး ဒီလိုကြီး ဖြစ်သွားတယ်ဆိုတော့ အမျိုးမျိုး ဖြစ်နိုင်ပါတယ်။ သူတို့အထဲကလည်း ဖြစ်နိုင်သလို သူတို့ရဲ့ ရန်သူတွေရှိတဲ့ဘက်ကလည်း ဖြစ်နိုင်တယ်။ ဒါပေမယ့် လက်နက်က တော်တော်လေးကောင်းတယ်လို့ သုံးသပ်လို့ရပါတယ်” ဟု ဦးရွှေမင်းက ပြောသည်။
စစ်ပွဲများ ဖြစ်ပွားနေသမျှ ယခုကဲ့သို့ ဖြစ်စဉ်များ ရှိနေမည်ဖြစ်သည့်အတွက် ငြိမ်းချမ်းရေးကို ဖော်ဆောင်နိုင်ရန် အရေးကြီးသည်ဟု ဥက္ကဋ္ဌဦးရွှေမင်းက ထပ်မံပြောသည်။
အထက်ပါဖြစ်စဉ်နှင့်ပတ်သက်၍ ကချင်လွတ်လပ်ရေးအဖွဲ့ (KIO/KIA)ဘက်က လက်ရှိအချိန်ထိ တစ်စုံတစ်ရာ ထုတ်ပြန်ပြောဆိုခြင်းမျိုး မတွေ့ရသေးပေ။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
အခြေခံရည်ညွှန်းစပါးဈေးအောက် နှိမ့်ဝယ်ခြင်း၊ အချိန်ဆွဲဝယ်ယူခြင်းများကြောင့် တောင်သူတွေ အခက်အခဲဖြစ်နေ
RELATED POSTS
18 Sep 2024 | မှုခင်း,ပြည်တွင်း
17 Sep 2024 | မှုခင်း,နိုင်ငံတကာ