စော (NSS) - အောက်တိုဘာ ၉

မျက်စိနာရောဂါသည် ကူးစက်လွယ်သောရောဂါဖြစ်ပြီး ကူးစက်ခံရသူ၏ ပစ္စည်းများကို သုံးစွဲခြင်းမပြုသင့်ကြောင်း ကျန်းမာရေးဝန်ကြီးဌာနမှ အသိ ပေးထုတ်ပြန်ထားသည်။

ကျန်းမာရေးဝန်ကြီးဌာနက ယနေ့(အောက်တိုဘာလ ၉ ရက်)တွင် အထက် ပါကဲ့သို့ အသိပေးထုတ်ပြန်ထားခြင်းဖြစ်သည်။

ကျန်းမာရေးဝန်ကြီးဌာနက မျက်မြှေးရောင်ရောဂါ (သို့မဟုတ်) မျက်စိနာရောဂါသည် ဗိုင်းရပ်ပိုးကြောင့်ဖြစ်ပွားပြီး ရောဂါကူးစက်ခံရလျှင် (၅)ရက်မှ (၇)ရက်ခန့်ထိ ကြာမြင့်တတ်ကြောင်း သိရသည်။

ထို့သို့ ကူးစက်ခံရလျှင် မျက်စိနီရဲခြင်း၊ မျက်စိယားယံခြင်း၊ မျက်ရည်ယိုခြင်း၊ မျက်ဝတ်များထွက်ခြင်း၊ မျက်စိနာကျင်ရောင်ရမ်းခြင်းနှင့် အလင်းရောင်မကြည့်နိုင်ခြင်းစသည့်‌ရောဂါလက္ခဏာများ ခံစားရနိုင်ကြောင်း သိရသည်။

မျက်စိနာရောဂါဖြစ်ပွားသူနှင့်နီးကပ်စွာ အတူနေထိုင်ခြင်း အပါအဝင် ၎င်း၏ အသုံးအဆောင်များကို ကိုင်တွယ်သုံးစွဲခြင်းတို့ကြောင့် ရောဂါအလွယ်တကူ ကူးစက်ပြန့်ပွားနိုင်သဖြင့် ရှောင်ရှားသင့်ကြောင်း အသိပေးထားသည်။

ထို့ကြောင့် မျက်စိနာရောဂါသည် ကူးစက်လွယ်သောရောဂါဖြစ်ပြီး ရောဂါ ကူးစက်ခံရသူ၏ အလှပြင်ပစ္စည်းများ၊ မျက်နှာသုတ်ပုဝါ၊ လက်ကိုင်ပုဝါစသည့် အသုံးအဆောင်များကို အတူသုံးစွဲခြင်းမပြုလုပ်သင့်ကြောင်း သိရသည်။

ထို့ပြင် လက်ကိုင်ပုဝါအစား တစ်ခါသုံးတစ်ရှူးကို  အသုံးပြုသင့်ပြီး ရောဂါ ကူးစက်ခံရသူ၏ အဝတ်အစားများကိုလည်း သီးသန့်လျှော်ဖွပ်ရမည်ဖြစ် ကြောင်း တိုက်တွန်းထားသည်။

ရောဂါကူးစက်ခံရပါက မျက်လုံးအနီးတစ်ဝိုက်ကို သန့်ရှင်းရေးပြုလုပ်ပေးရန် လိုပြီး မျက်ရည်တု (သို့မဟုတ်) မျက်စဉ်းဆေးရည် (Artifical Tear Eye Drops) ကို တစ်နေ့ (၃)ကြိမ်မှ (၄)ကြိမ် ခတ်ပေးရမည်ဖြစ်ကြောင်း အသိ ပေးထားသည်။

ထို့ပြင် မျက်လုံးကို မသန့်ရှင်းမီနှင့် မျက်စဉ်းဆေးရည်ခတ်ပြီးတိုင်း လက်ကိုဆပ်ပြာနှင့် သေချာစွာဆေးကြောရမည်ဖြစ်ပြီး အကယ်၍ မသက်သာပါက ဆေးရုံ၊ ဆေးခန်းများနှင့် မျက်စိကုဌာနသို့ ပြသရမည်ဖြစ်ကြောင်း တိုက် တွန်းထားသည်။

၎င်းမျက်စိနာရောဂါ အခြားသူများသို့ မကူးစက်စေရန်အတွက် မျက်စိနာရောဂါကူးစက်ခံရသူသည် မျက်စိကို မကိုင်မိစေရန် အကာအကွယ်မျက်မှန်တပ်ထားသင့်ကြောင်း ကျန်းမာရေးဝန်ကြီးဌာနမှ အသိပေးတိုက်တွန်းထား သည်။