ဂျန်ဇက် (NSS) - အောက်တိုဘာ ၉ 

အမေရိကန်ရီပတ်ဘလီကန်ပါတီရဲ့လွှတ်တော်ကိုယ်စားလှယ်ခေါင်းဆောင် တေလာ ဂရင်းက အစ္စရေးနဲ့ ဟားမက်လက်နက်ကိုင်အဖွဲ့ကြားဖြစ်ပွားနေတဲ့စစ်ပွဲမှာ ဟားမက်အဖွဲ့ အသုံးပြုနေတဲ့ အမေရိကန်ထုတ်လက်နက်များနဲ့ပတ်သက်ပြီး စုံစမ်းစစ်ဆေးသွားရမယ်လို့ ထုတ်ဖော်ပြောဆိုလိုက်ပါတယ်။

ဟာမက်လက်နက်ကိုင်အဖွဲ့အသုံးပြုနေတဲ့ အမေရိကန်လက်နက်တွေဟာ ယူကရိန်း ဒါမှမဟုတ် အာဖန်ဂန်နစ္စတန်နိုင်ငံက ရရှိခြင်းမျိုးဖြစ်နိုင်ဖွယ်ရှိနေပြီး၊ အဲဒီလက်နက်များရရှိတဲ့ မူလအစစ်မှန်နေရာကို စုံစမ်းစစ်ဆေးမယ်လို့ ဆိုပါတယ်။ 

အီရန်အစိုးရက အစ္စရေးနိုင်ငံကို တိုက်ခိုက်ဖို့ ပါလက်စတိုင်းလက်နက်ကိုင်အဖွဲ့တွေကို ကူညီပေးခဲ့တယ်ဆိုတဲ့သတင်းတွေကို ငြင်းဆန်လိုက်ကြောင်း သိရပါတယ်။ အစ္စရေးနိုင်ငံကို တိုက်ခိုက်ဖို့ အီရန်နိုင်ငံက ဟာမက်အဖွဲ့ကို အားပေးကူညီခဲ့တယ်ဆိုတဲ့သတင်းတွေ ထွက်ပေါ်လာခဲ့ပြီးနောက် ကုလသမဂ္ဂဆိုင်ရာ အီရန်သံအမတ်ကြီးက တုံ့ပြန်ခဲ့တာဖြစ်ပါတယ်။ 

အစ္စရေး နဲ့ ဟားမက်လက်နက်ကိုင်အဖွဲ့ကြားဖြစ်ပွားနေတဲ့စစ်ပွဲကြောင့် အနည်းဆုံးလူပေါင်း ၁၂၃ဝဝဝ ကျော် နေရပ်စွန့်ခွာထွက်ပြေးနေရကြောင်း ကုလသမဂ္ဂအဖွဲ့က ပြောပါတယ်။ အစ္စရေးဟာ ဟာမက်လက်နက်ကိုင်အဖွဲ့ရဲ့တိုက်ခိုက်ခံရမှုကို လက်တုံ့ပြန်တိုက်ခိုက်ခဲ့ရာ လေကြောင်း ဗုံးကြဲမှုတွေကြောင့် ဂါဇာဒေသမှာ အိမ်ယာအဆောက်အဦးပေါင်း ၁၆ဝ အပြင်အခြားအဆောက်အဦးပေါင်း ၁၂ဝဝ ကျော် ထိခိုက်ပျက်စီးခဲ့ကြောင်း ကုလသမဂ္ဂက ဆိုပါတယ်။

လူပေါင်း ၂၅ဝ ကျော် နေရပ်စွန့်ခွာနေထိုင်နေတဲ့ စာသင်ကျောင်းအဆောက်အဦးလည်း ဗုံးဒဏ်ခံခဲ့ရကြောင်း သိရပါတယ်။ 

အစ္စရေးစစ်ဘက် တာဝန်ရှိသူတစ်ဦးက အစ္စရေးတပ်ဖွဲ့တွေဟာ ဟားမက်အဖွဲ့ရဲ့တိုက်ခိုက်မှုတွေကိုတုံ့ပြန်နိုင်ဖို့ စစ်လက်နက်ပစ္စည်းများ လုံလောက်မှုမရှိကြောင်း သတင်းများထွက်ပေါ်နေခြင်းကို ငြင်းဆန်လိုက်ကြောင်း သိရပါတယ်။

၎င်းက "စစ်လက်နက်ပစ္စည်းအချို့ကို နေရာရွှေ့ပြောင်းထားတာတွေ လုပ်ခဲ့ရတယ်။ စစ်လက်နက်ပစ္စည်း လိုအပ်ချက်မရှိပါဘူး" လို့ ပြောပါတယ်။ 

အစ္စရေးစစ်တပ်ဟာ ဂါဇာဒေသရှိ ဟားမက်လက်နက်ကိုင်အဖွဲ့ နဲ့ ဆက်နွယ်နေတဲ့ ပစ်မှတ်နေရာပေါင်း ၈ဝဝ ကျော်ကို အောက်တိုဘာလ ၈ ရက်က ဗုံးကြဲတိုက်ခိုက်ခဲ့သလို ဂါဇာဒေသရှိ  Beit Hanoun အရပ်ဒေသမှာလည်း တိုက်လေယာဉ်အစင်းပေါင်း ၅ဝ ကျော် ဖြန့်ကြတ်ချထားကြောင်း သိရပါတယ်။

အစ္စရေးဟာ ဟားမက်အဖွဲ့ရဲ့အလစ်တိုက်ခိုက်ခံရပြီးနောက် ဟာမက်အဖွဲ့ထိန်းချုပ်ထားတဲ့နေရာတွေကို ပစ်မှတ်ထားပြီး လေကြောင်းက ဗုံးကြဲတိုက်ခိုက်နေတာဖြစ်ပါတယ်။

ဟားမက်လက်နက်ကိုင်အဖွဲ့ ဟာ အစ္စရေးပိုင်တွေကို အောက်တိုဘာ ၉ ရက်မှာ ရော့ကဒ် ဒုံးကျည်တွေနဲ့ဆက်လက်တိုက်ခိုက်နေပြီး အစ္စရေးနိုင်ငံ တောင်ပိုင်းကမ်းရိုးတန်းမြို့ရှိ လူနေအိမ်ယာအဆောက်အဦးများကို ထိမှန်ခဲ့ကြောင်း သိရပါတယ်။

အစ္စရေး နဲ့ ဟားမက်တို့ဟာ အောက်တိုဘာ ၇ ရက်မှာ စစ်ပွဲစတင်ခဲ့ပြီး လက်ရှိအချိန်အထိ တိုက်ခိုက်နေဆဲဖြစ်ရာ နှစ်ဖက် သေဆုံးသူအရေအတွက် ၁၁ဝဝ ကျော်သွားခဲ့ကြောင်း သိရပါတယ်။