ဂျန်ဇက် (NSS) - အောက်တိုဘာ ၉

အစ္စရေးနဲ့ ပါလက်စတိုင်းလက်နက်ကိုင်အဖွဲ့ဖြစ်တဲ့ ဟားမက်စ်ကြား စစ်ပွဲများစတင်ဖြစ်လာခဲ့ပြီးနောက် အမေရိကန်အစိုးရဟာ ၎င်းရဲ့မဟာမိတ် အစ္စရေးကို စစ်ရေးအရကူညီထောက်ပံ့ပေးဖို့ စီစဉ်နေရာ အစ္စရေး နိုင်ငံအနီးကို စစ်သင်္ဘောတွေ နဲ့ တိုက်လေယာဉ်တွေ စေလွှတ်လိုက်ကြောင်း အမေရိကန်ကာကွယ်ရေးဝန်ကြီး လွိုင်အော်စတင်က ထုတ်ဖော်ပြောဆိုလိုက်ပါတယ်။

အမေရိကန်ကာကွယ်ရေးဝန်ကြီးက အစ္စရေးနိုင်ငံအပေါ် အားပေးထောက်ခံကြောင်းပြသဖို့ စစ်သင်္ဘောတွေနဲ့ တိုက်လေယာဉ်တွေ စေလွှတ်လိုက်ကြောင်း ဆိုပါတယ်။ ဟားမက်စ်အဖွဲ့ကတော့ အစ္စရေးနိုင်ငံနဲ့အနီးစပ်ဆုံးနေရာတွေကို စစ်သင်္ဘောတွေ နဲ့ တိုက်လေယာဉ်တွေစေလွှတ်ခဲ့တဲ့ အမေရိကန်အစိုးရရဲ့လုပ်ရပ်ကို ပြစ်တင်ရှုတ်ချထားပြီး ပါလက်စတိုင်းပြည်သူတွေအပေါ် ရန်လိုတဲ့လုပ်ရပ်ဖြစ်ကြောင်း ဝေဖန်ထားပါတယ်။

ပါလက်စတိုင်း လက်နက်ကိုင်အဖွဲ့ဖြစ်တဲ့ ဟားမက်စ်အုပ်စုဟာ အစ္စရေးနိုင်ငံအပေါ် အောက်တိုဘာလ ၇ ရက်က စတင်တိုက်ခိုက်ခဲ့ပြီးနောက် ယနေ့ (အောက်တိုဘာလ ၉ ရက်)၊ နံနက်ပိုင်းအထိ အစ္စရေးနိုင်ငံသား ၇၀၀ ကျော်အပါအဝင် လူပေါင်း ၁၁၀၀ ကျော်သေဆုံးထားကြောင်းသိရပါတယ်။

အမေရိကန်ကာကွယ်ရေးဝန်ကြီးဟာ USS Gerald R. Ford အမည်ရှိ လေယာဉ်တင်သင်္ဘောအုပ်စုကို အစ္စရေးနဲ့အနီးစပ်ဆုံးနေရာဖြစ်တဲ့ မြေထဲပင်လယ်အရှေ့ဘက်ပိုင်းကို စေလွှတ်ထားကြောင်းသိရပါတယ်။ အဆိုပါ လေယာဉ်တင်သင်္ဘောအုပ်စုထဲမှာ ပဲ့ထိန်းဒုံးကျည်ဖျက်သင်္ဘောလေးစင်း၊ ပဲ့ထိန်းဒုံးကျည်များပစ်လွှတ်နိုင်တဲ့ စစ်သင်္ဘောတွေနဲ့ တပ်ဖွဲ့ဝင်များ ပါဝင်ခဲ့ကြောင်းသိရပါတယ်။ 

ဒါ့ပြင် အမေရိကန်ကာကွယ်ရေးဝန်ကြီးဟာ အမေရိကန်လေတပ်တပ်ဖွဲ့ရဲ့ အဓိကတိုက်ခိုက်ရေးလေယာဉ်တွေဖြစ်တဲ့ F-35 တိုက်လေယာဉ်၊ F-15 တိုက်လေယာဉ်တွေ၊  F-16 တိုက်လေယာဉ်တွေနဲ့  A-10 အမျိုးအစားတိုက်လေယာဉ်တွေကို အစ္စရေးနိုင်ငံရဲ့အနီးစပ်ဆုံးနေရာကို စေလွှတ်ခဲ့ကြောင်းသိရပါတယ်။ အမေရိကန်အစိုးရဟာ အစ္စရေးနိုင်ငံကို ခဲယမ်းမီးကျောက်များ ကူညီထောက်ပံ့ပေးသွားမှာဖြစ်ကြောင်းသိရပါတယ်။