မျိုးကြီး (NSS) - အောက်တိုဘာ ၈

လျှပ်စစ်ဓာတ်အားသုံး မီးရထားစက်ခေါင်းများကို ထုတ်လုပ်ရန်နှင့် ရေနွေး ငွေ့သုံး မီးရထားစက်ခေါင်းများကို ပြန်လည်အသုံးပြုရန် ဗိုလ်ချုပ်မှူးကြီးမင်းအောင်လှိုင်က တိုက်တွန်းထားသည်။

၎င်းက ယမန်နေ့(အောက်တိုဘာလ ၇ ရက်)တွင် ရန်ကုန်တိုင်း၊ မင်္ဂလာတောင်ညွန့်မြို့နယ်၊ မြန်မာ့မီးရထား၊ မလွှကုန်းယာဒ်ဝင်းဧရိယာအတွင်းရှိ စက်ရုံ၊ အလုပ်ရုံများ၏ လုပ်ငန်းဆောင်ရွက်မှုများကို သွားရောက်စစ်ဆေးစဉ် အထက်ပါကဲ့သို့ တိုက်တွန်းခဲ့ခြင်းဖြစ်သည်။

မြန်မာနိုင်ငံတွင် ရထားများကို အသုံးပြုခဲ့သည်မှာ နှစ်ပေါင်း (၁၀၀)ကျော်ခန့်ရှိပြီဖြစ်သည့်အတွက် အတွေ့အကြုံများကို အသုံးချကာ ရထားစက်ခေါင်းများ၊ တွဲများ၊ သံလမ်းများကို ကိုယ်တိုင်ထုတ်လုပ်နိုင်ရမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

ထို့ပြင် ခေတ်မီသည့်ရထားသယ်ယူပို့ဆောင်ရေးစနစ်ကို ဖော်ဆောင်ရမည့်အပြင် လျှပ်စစ်ဓာတ်အားအသုံးပြုသည့် မီးရထားစက်ခေါင်းများကို ထုတ်လုပ်နိုင်ရန်လိုအပ်ကြောင်းလည်း ၎င်းက ဆက်လက်ပြောသည်။

လက်ရှိတွင် ရထားသယ်ယူပို့ဆောင်ရေး၌ လျှပ်စစ်အသုံးပြုကာ ပြောင်းလဲပြေးဆွဲနိုင်ရေးအတွက် ကြိုတင်ပြင်ဆင်မှုများကို လုပ်ဆောင်လျက်ရှိကြောင်း သိရသည်။

အလားတူ ဗိုလ်ချုပ်မှူးကြီးမင်းအောင်လှိုင်သည် မြန်မာ့မီးရထား၌ လွန်ခဲ့ သောနှစ်ပေါင်းများစွာက အသုံးပြုခဲ့သော ရေနွေးငွေ့သုံး မီး၇ထားစက်ခေါင်းများကို ပြန်လည်အသုံးပြုနိုင်ရေး ကြိုးစားဆောင်ရွက်သွားရန်လည်း တိုက်တွန်းခဲ့ကြောင်း သိရသည်။

သယ်ယူပို့ဆောင်ရေးစနစ်တွင် ကုန်လမ်း၊ ရေလမ်းနှင့် လေကြောင်းပို့ ဆောင်ရေးဟူ၍ရှိသည့်အနက် ရထားဖြင့် ပို့ဆောင်ခြင်းသည် ကုန်ကျစရိတ်သက်သာသော်လည်း သယ်ယူပို့ဆောင်မှုကဏ္ဍအနေဖြင့် ပိုမိုမြင့်မားလာရန် လိုအပ်လျက်ရှိနေကြောင်း သိရသည်။

ထို့ကြောင့် သယ်ယူပို့ဆောင်ရေး ကုန်ကျစရိတ်သက်သာခြင်းသည် ပြည်သူ လူထု၏ နေ့စဉ်လူမှုစီးပွားဘဝ သက်သာချောင်ချိရေးကို အထောက်အကူပြုနိုင်သည့်အပြင် နိုင်ငံတော်ဖွံ့ဖြိုးတိုးတက်မှုအတွက်ပါ အဓိကအရေးပါသည့် အတွက် ရထားသယ်ယူပို့ဆောင်ရေးကို မြှင့်တင်ရန်လိုသည်ဟုလည်း တပ်ချုပ်က မှတ်ချက်ပြုထားသည်။

လက်ရှိတွင် မြန်မာနိုင်ငံအတွင်း၌ ရထားလမ်းခရီးမိုင် စုစုပေါင်း (၃၈၀၀) ကျော် နှင့် ဘူတာရုံပေါင်း (၉၆၀)ခန့်ရှိကြောင်း သိရသည်။

ထို့ပြင် မီးရထားလမ်းပိုင်းများ၌ အမြန်ရထား (၁၈)စင်း၊ စာပို့ရထား (၁၀) စင်း၊ လူစီးကုန်တင်ရထား (၁၄)စင်းနှင့် ရန်ကုန်မြို့တွင်း၌ မြို့ပတ်ရထားအနေဖြင့် နေ့စဉ် ရထား(၃၅)စင်း စုစုပေါင်း ရထား(၇၇)စင်းဖြင့် ပြေးဆွဲလျက်ရှိကြောင်း သိရသည်။

ထိုသို့ ပြည်သူလူထု၏ နေ့စဉ်လူမှုစီးပွားဘဝ သက်သာချောင်ချိရေးအတွက် ရထားခရီးစဉ်များ ပြေးဆွဲနေမှုနှင့်အတူ အခြားတစ်ဖက်တွင်လည်း နိုင်ငံရေးပဋိပက္ခများကြောင့် ရထားလမ်းပိုင်းများနှင့် ဘူတာရုံများ မိုင်းထောင်ဖျက် ဆီးခံရခြင်း၊ ရထားများ မိုင်းခွဲဖျက်ဆီးခံရခြင်းများလည်း ရှိနေသည်။