ပါလက်စတိုင်းတို့၏ အယ်လ်အက္ကာဆာမုန်တိုင်း ထိုးစစ်သစ်နှင့် အစ္စရေးတစ်နိုင်ငံလုံး တိုက်ခိုက်ခံရ
Htay Oung (NSS) - အောက်တိုဘာ ၇
ဟားမတ်စ် စစ်သွေးကြွအုပ်စုဟာ မိမိတို့အပေါ် စစ်ပွဲစတင်လိုက်ပြီဖြစ်ကြောင်း အစ္စရေးကာကွယ်ရေးဝန်ကြီးက ကြေညာလိုက်ပါတယ်။ အဲဒီ စစ်ပွဲမှာ မိမိတို့သာ အနိုင်ရရှိမှာဖြစ်ကြောင်း ကြွေးကြော်လိုက်တယ်လို့ AP က ယ နေ့ ရေးသားပါတယ်။
ယနေ့ (အောက်တိုဘာလ ၇ ရက်) နံနက်ပိုင်း အစ္စရေးတောင်ပိုင်းနဲ့ အလယ်ပိုင်းဧရိယာကို ဒုံးကျည်များဖြင့် အံ့အားသင့်ဖွယ် တိုက်ခိုက်ခြင်းအားဖြင့် ဟားမတ်စ်တို့အနေနဲ့ မဟာအမှားကြီးတစ်ရပ်ကို ကျူးလွန်လိုက်ပြီလို့ တဲလ်အဗစ်မြို့ အစ္စရေးစစ်ဌာနချုပ် လုံခြုံရေးဆိုင်ရာ အစိုးရဝန်ကြီးများအဖွဲ့အစည်းအဝေးအပြီးမှာ ကာကွယ်ရေးဝန်ကြီး ယိုအတ်ဂယ်လန့် က သတိပေးလိုက်ပါတယ်။
ဂါဇာကမ်းမြှောင်ဒေသဟာ မြေထဲပင်လယ် အရှေ့ဘက်ကမ်းရိုးတန်းမှာ တည်ရှိပြီး ၁၉၆၇-ခုနှစ် စစ်ပွဲအပြီး အနိုင်ရရှိသူ အစ္စတို့က ပါလက်စတိုင်းတို့အတွက် သတ်မှတ်ပေးထားတဲ့ နယ်မြေတစ်ခုဖြစ်ပါတယ်။ ၃၆၅ စတုရန်းကီလိုမီတာ အကျယ်အ၀န်းရှိတဲ့ နယ်မြေမှာ ပါလက်စတိုင်း (၂)သန်းခန့် နေထိုင်လျက်ရှိပါတယ်။
ပါလက်စတိုင်းတို့ဟာ ဂါဇာကမ်းမြှောင်ဒေသနဲ့ အလယ်မှာ အစ္စရေးပိုင်နက်တစ်ခုလုံး ခြားနားပြီး ဂျော်ဒန်မြစ် အနောက်ဘက်ကမ်းမှာလည်း နေထိုင်ကြတယ်။ အစ္စရေးတို့ သိမ်းပိုက်ခံရကတည်းက အဲဒီနယ်မြေနှစ်ခုစလုံးဟာ နိုင်ငံအဖြစ် ပါလက်စတိုင်းအာဏာပိုင်များရဲ့ အုပ်ချုပ်မှုအောက်မှာ တည်ရှိခဲ့ပေမယ့် နောက်ဆုံးကျင်းပတဲ့ ရွေးကောက်ပွဲအပြီး သဘောထားတင်းမာသူ ဟားမတ်စ်တို့က ချုပ်ကိုင်လာခဲ့ကြပါတယ်။ အဲဒီနောက်ပိုင်း ဂါဇာကမ်းမြှောင်ဟာ အစ္စရေးတို့ရဲ့ ကြည်း-ရေ-လေ တင်းကြပ်ပိတ်ဆို့မှုအောက် ရောက်ရှိသွားခဲ့ပြီး နယ်မြေများ အတွင်း လူနဲ့ ကုန်ပစ္စည်းများ ၀င်ထွက်ခြင်းကို တားဆီးထားပါတယ်။
ယခုနှစ်များအတွင်း ဂါဇာကို စိုးမိုးအုပ်ချုပ်နေတဲ့ စစ်သွေးကြွအုပ်စုနဲ့ အစ္စရေးတို့အကြား တင်းမာမှုများ အဆိုးရွားဆုံး အရှိန်မြင့်တက်ခဲ့ကြောင်း တွေ့ရှိရပါတယ်။ စနေနေ့(အောက် တိုဘာလ ၇ ရက်)မှာ ဂါဇာမှ ဟားမတ်စ်သေနတ်သမားတွေဟာ နယ်စပ်စည်းရိုးမှ နေရာအနှံ့အပြားကို မယုံကြည်နိုင်လောက်အောင်ဖြတ်ကျော်ပြီး အစ္စရေးတောင်ပိုင်း လူနေ ဧရိယာအတွင်း ထိုးဖောက် ၀င်ရောက်လာခဲ့ပါတယ်။
တိုက်ခိုက်ရေးသမားတွေကို နယ်စပ်ဖြတ်ကျော် စေလွှတ်ထားပြီး အစ္စရေးနိုင်ငံအတွင်း ဒုံးကျည်ထောင်aပါင်းများစွာနဲ့ ပစ်ခတ်ခြင်းအားဖြင့် “အယ်လ်အက္ကာဘာ “စစ်ဆင်ရေးသစ်ကို စတင်လိုက်ကြောင်း အာဏာရ ဟားမတ်စ် စစ်သွေးကြွအဖွဲ့ က ကြေညာပါတယ်။
စစ်ပွဲ စတင်နေကြောင်း နိုင်ငံသားများကို အစ္စရေးစစ်တပ်က သတိပေးထားပြီး ဂါဇာရှိပစ်မှတ်များကို လက်တုံ့ ပြန်တိုက်ခိုက်ခဲ့ပါတယ်။ အစ္စရေးကို ဝိုင်းပတ်တည်ရှိနေတဲ့ အာရပ်မွတ်စလင်တိုင်းပြည်များနဲ့ ဂျူးတို့ရဲ့ ခါးသီးသော ရန်ဘက်တို့အကြား စစ်ပွဲသစ် ဖြစ်လာနိုင်ခြေရှိတဲ့ အခင်းအကျင်းလည်း ဖြစ်ပါတယ်။ ဂါဇာမှ ဒုံးကျည်များ နဲ့ အဆက်မပြတ် ပစ်လွှတ်နေတဲ့အတွက် မြောက်ဘက် ဂျေရုဆလင်မြိုံအထိ အစ္စရေးတစ်နိုင်ငံလုံး လေကြောင်းတိုက်ခိုက်မှုသတိပေး ဥသြသံများနဲ့ ဆူညံနေပါတယ်။
ဂါဇာနဲ့ ကပ်လျက်တည်ရှိတဲ့ အစ္စရေးအနောက်ပိုင်း ဆီဒါရော့မြို့မှာ ယူနီဖောင်းဝတ် ပါလက်စတိုင်း သေနတ်သမားလို့ ယူဆရသူတွေရဲ့ ဓါတ်ပုံဟာ လူမှုကွန်ရက်မှာ ပျံ့နှံနေပြီး “ အလ္လာရှင်သာ အကြီးမြတ်ဆုံး” လို့ ကြွေးကြော်ရင်း သက်မဲ့ အစ္စရေးစစ်သားရဲ့ ရုပ်အလောင်းကို ဒေါသတကြီးနင်းချေနေကြတဲ့ ပါလက်စတိုင်းလူအုပ်ကြီးကိုလည်း တွေ့မြင်နေရပါတယ်။ မီးလောင်ကျွမ်းပြီး အစ္စရေးတင့်ကားတစ်စီးပေါ်မှာ ကခုန်နေတဲ့ ပါလက်စတိုင်းများ၊ အစ္စရေးစစ်သား တစ်ယောက်ကို ပါလက်စတိုင်းတို့က မော်တော်ဆိုင်ကယ်နောက်မြီးမှာ အသက်ရှင်လျက် ဒရွတ်တိုက် ဆွဲယူသွားပုံလည်း ပါ၀င်ပြီး ဗွီဒီယိုများရဲ့ စစ်မှန်မှုကိုတော့ AP အနေနဲ့ လောလောဆယ် အတည်ပြုနိုင်ခြင်း မရှိပါဘူး။
မိမိဘက်က ဒုံးကျည် စင်းရေ ၅၀၀၀ ကျော် ပစ်လွှတ်ခဲ့ကြောင်း ဟားမတ်စ်စစ်ဘက်က ကြေညာထားပြီး ပါလက်စတိုင်း ပြည်သူတွေဟာ သူတို့ရဲ့ တော်လှန်ရေးကို ပြန်လည်စတင်လိုက်ပြီဖြစ်ကြောင်း၊ အရှေ့ဘက် ဂျေရုဆလင်မှ အစ္စရေးမြောက်ပိုင်းအထိ ပါလက်စတိုင်း အားလုံးတို့အနေနဲ့ ကျူးကျော်သိမ်းပိုက်သူတွေကို မောင်းထုတ်ပြီး တံတိုင်းများကို ဖြိုဖျက်ခြင်းဖြင့် တိုက်ပွဲမှာ ပါဝင်ဆင်နွှဲကြရန် လှုံ့ဆော်လိုက်ပါတယ်။
အစ္စရေး ပြည်သူ ၂၂ ဦးကို သတ်ဖြတ်ခြင်းဖြင့် ဟားမတ်စ်တို့က စစ်စတင်လိုက်ပြီဖြစ်ကြောင်း၊ လုံခြုံရေးဆိုင်ရာ ကဲဘိနက်အစည်းအဝေးတစ်ရပ်ကို အရေးတကြီး ခေါ်ယူထားတယ်လို့ အစ္စရေး၀န်ကြီးချုပ် ဘင်ဂျမင်နေတန်ယာဟုက ပြောပါတယ်။
တရားစီရင်ရေးကဏ္ဍကို ပြန်လည်ပြင်ဆင်ရန် အစ္စရေးအစိုးရအဖွဲ့အတွင်း ပြင်းပြင်းထန်ထန် သဘောထားကွဲလွဲနေပါတယ်။ အဲ့ဒီအစီအစဉ်ကို ဆန့်ကျင်ကန့်ကွက်တဲ့ ဆန္ဒပြမှုတွေဟာ အစ္စရေးစစ်တပ်အဆင့်အသီးသီး အတွင်းတိုင်အောင် ပျံ့နှံ့နေတဲ့အတွက် ယခုလို ကိုင်တွယ်ရန် အကဲဆတ်နေချိန် နေတန်ယာဟုရဲ့ လက်ယာ စွန်းအစိုးရအတွက်လည်း တင်းမာမှုများ ရှိနေပါတယ်။
ယခု စစ်ဆင်ရေးဟာ ပါလက်စတိုင်းမြေကို ကျူးကျော်သိမ်းပိုက်သူတို့ရဲ့ ရာဇ၀တ်မှုများအပေါ် တုံ့ပြန်မှု ဖြစ်ကြောင်း ပြည်ပရောက် ဟားမတ်စ်ခေါင်းဆောင်တစ်ဦးက ပြောပါတယ်။ ဂျေရုဆလင်ရှိ အယ်လ်အက္ကဆာ ဗလီကို တိုက်ခိုက်ရေးသမားများက ခုခံကာကွယ်နေပြီး ထောင်ချီတဲ့ ပါလက်စတိုင်းအကျဉ်းသားများကို အစ္စ္စရေးက ထိန်းသိမ်းထားတယ်လို့ ဆိုပါတယ်။
ယခုဖြစ်ရပ်ဟာ “ဆင်ခါတိုရာ” အရေးကြီး ဂျူးဘာသာရေးပွဲတော်ကာလမှာ ရန်သူတို့က အစ္စရေး အစောင့်အကြပ်များကို အလစ်အငိုက် ဖမ်းဆီးရာမှ အာရပ်-အစ္စရေး “ယွန်ကစ်ပူစစ်ပွဲ “ ဖြစ်ပွားရတဲ့ ၁၉၇၃-ခုနှစ်ကို ပြန်လည် အမှတ်ရစေပါတယ်။
အစ္စရေးတောင်ပိုင်း ဂါဇာနယ်စပ်အနီးရှိ နေရာအများအပြားတွင် စိမ့်ဝင်ထိုးဖောက်၀င်ရောက်မှု ဖြစ်ပွားခဲ့ကြောင်း အစ္စရေးစစ်တပ်က စနေနေ့မှာ အတည်ပြုပါတယ်။ ဒေသတွင်း နေထိုင်သူအားလုံးတို့အနေနဲ့ မိမိတို့ အိမ်တွင်းမှာသာ နေထိုင်ကြရန် အမိန့်ထုတ်ထားပါတယ်။
ဂါဇာကမ်းမြောင်ဒေသအနီးရှိ လမ်းများကို စစ်တပ်က ပိတ်ထားစဉ် အစ္စရေးတောင်ပိုင်းမြို့ရွာများမှာ အသွားအလာ မတွေ့ရပဲ ဖြစ်နေပါတယ်။ လေကြောင်း သတ်ိပေးဥသြသံများ ထွက်ပေါ်နေချိန်မှာ အစ္စရေးသန်းပေါင်းများစွာ တို့ဟာ ဗုံးခိုကျင်း အမိုးအကာများဆီကို အပြေးအလွှားသွားရောက်နေကြပါတယ်။
(AP., 7 October 2023,” Hamas militant group has started a war that ‘Israel will win,’ defense minister says” ကို #HtayOung, #OungMarine ဆီလျော်အောက် ကောက်နှုတ်ဘာသာပြန်ဆိုသည်။)
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဟားခါးမြို့နယ်၌ နေအိမ်ရေမလာသဖြင့် သွားရောက်စစ်ဆေးသည့် အမျိုးသားတစ်ဦး မိုင်းနင်းမိ၍ ထိခိုက်ဒဏ်ရာရ
RELATED POSTS
02 Oct 2024 | နိုင်ငံရေး,ပြည်တွင်း
01 Oct 2024 | နိုင်ငံရေး,နိုင်ငံတကာ
01 Oct 2024 | နိုင်ငံရေး,နိုင်ငံတကာ
01 Oct 2024 | နိုင်ငံရေး,နိုင်ငံတကာ