ဂျန်ဇက် (NSS) - အောက်တိုဘာ ၅ 

နိုင်ဂျာနိုင်ငံအတွင်း တပ်စွဲထားတဲ့ ပြင်သစ်တပ်ဖွဲ့ဝင်များကို ဒီသီတင်းပတ်အတွင်း ပြန်လည်ရုတ်သိမ်းသွားတော့ မှာဖြစ်ကြောင်း ပြင်သစ်အစိုးရ က ပြောပါတယ်။

နိုင်ဂျာနိုင်ငံမှာ ဇူလိုင်လအတွင်း အာဏာသိမ်းမှုဖြစ်ပွားခဲ့ပြီးနောက်ပိုင်း ပြင်သစ်နဲ့ နိုင်ဂျာစစ်အစိုးရကြား ဆက်ဆံရေးတင်းမာခဲ့ရာ ပြင်သစ်သံအမတ်ကြီးနဲ့ ပြင်သစ်တပ်ဖွဲ့ဝင်များအားလုံးကို ပြန်ရုတ်သိမ်းသွားဖို့ နိုင်ဂျာ စစ်အစိုးရက တောင်းဆိုခဲ့ဖူးကြောင်း သိရပါတယ်။ 

ပြင်သစ်စစ်ဌာနချုပ်က "ကျွန်တော်တို့ဟာ ဒီသီတင်းပတ်အတွင်းမှာ တပ်ဖွဲ့ဝင်တွေ ပြန်လည်ရုတ်သိမ်းတာတွေ စတင်တော့မှာပါ" လို့ ပြောပါတယ်။ 

နိုင်ဂျာနိုင်ငံရှိ ပြင်သစ်သံအမတ်ကြီး မိခင်နိုင်ငံကို ပြန်လည်ရောက်ရှိခဲ့ပြီးနောက် သီတင်းပတ်တစ်ပတ်အကြာမှာ ပြင်သစ်အစိုးရက တပ်ဖွဲ့ဝင်တွေ ပြန်လည်ရုတ်သိမ်းမယ့်အကြောင်းကို သတင်းထုတ်ပြန်ခဲ့တာဖြစ်ပါတယ်။ 

ပြင်သစ်သမ္မတ မက်ခရွန်က နိုင်ဂျာနိုင်ငံရှိ ပြင်သစ်တပ်ဖွဲ့ဝင် ၁၄ဝဝ ကျော်ကို ဒီနှစ်မကုန်ခင် အပြီးသတ် ပြန်ရုတ်သိမ်းမယ်လို့ ပြီးခဲ့တဲ့စက်တင်ဘာလက ကြေညာခဲ့ဖူးပါတယ်။ နိုင်ဂျာနိုင်ငံအတွင်း အစ္စလာမ်အကြမ်းဖက် အုပ်စုတွေ တိုက်ခိုက်နိုင်ဖို့ ပြင်သစ်အစိုးရ တပ်ဖွဲ့ဝင်တွေကို နိုင်ဂျာနိုင်ငံအတွင်း ဖြန်ကြတ်ချထားခဲ့တာဖြစ်ပါတယ်။

နိုင်ဂျာပြည်သူတွေကလည်း နိုင်ငံအတွင်းရှိ ပြင်သစ်တပ်ဖွဲ့ဝင်တွေကို နိုင်ငံအတွင်းကနေ အမြန်ဆုံး ပြန်ရုတ်သိမ်းဖို့ ဆန္ဒပြတောင်းဆိုတာတွေ ရှိနေကြောင်း သိရပါတယ်။

ပြင်သစ်နိုင်ငံဟာ နိုင်ဂျာနိုင်ငံကို ကိုလိုနီလက်အောက်ခံနိုင်ငံအဖြစ် သိမ်းပိုက်ခဲ့ဖူးတဲ့နိုင်ငံဖြစ်ကြောင်း သိရပါတယ်။ အာဖရိကနိုင်ငံဖြစ်တဲ့ မာလီနိုင်ငံဟာ နိုင်ငံအတွင်းရှိ ပြင်သစ်တပ်ဖွဲ့ဝင်တွေကို ပြန်ရုတ်သိမ်းဖို့ တောင်းဆိုခဲ့ပြီး နောက် နိုင်ဂျာနိုင်ငံကလည်း ပြင်သစ်တပ်ဖွဲ့ဝင်တွေကို ပြန်ရုတ်သိမ်းဖို့ တောင်းဆိုလာခဲ့တာဖြစ်ပါတယ်။ 

နိုင်ဂျာနိုင်ငံမှာ အာဏာသိမ်းမှုဖြစ်ပွားခဲ့ပြီးနောက် အနောက်အာဖရိကစီးပွားရေးအဖွဲ့ဟာ နိုင်ဂျာစစ်အစိုးရကို စစ်ရေးနည်းလမ်းအသုံးပြုကာ ဖြုတ်ချဖို့ စီစဉ်ခဲ့ရာ ပြင်သစ်နိုင်ငံက အားပေးထောက်ခဲ့ပြီးနောက် တင်းမာမှုတွေ ပိုမိုဖြစ်လာခဲ့ကြောင်း သိရပါတယ်။