မျိုးကြီး (NSS) - စက်တင်ဘာ ၂၉

ICJ ၌ မြန်မာနိုင်ငံအပေါ် တရားစွဲဆိုထားသည့်ကိစ္စနှင့်ပတ်သက်၍ ရှေ့ဆက်သွားမည့်လုပ်ငန်းစဉ်များကို မြန်မာ ကိုယ်စားလှယ်အဖွဲ့ သွားရောက်ဆွေးနွေးခဲ့ကြောင်း နစကမှ သတင်းထုတ်ပြန်ထားသည်။

အပြည်ပြည်ဆိုင်ရာတရားရုံး(ICJ) ဥက္ကဋ္ဌ Joan Donoghue သည် မြန်မာနိုင်ငံနှင့် ဂမ်ဘီယာနိုင်ငံမှ ကိုယ်စားလှယ်များ တွေ့ဆုံဆွေးနွေးရန် အကြောင်းကြားခဲ့ကြောင်း သိရသည်။

ထို့ကြောင့် ပြည်ထောင်စုအစိုးရအဖွဲ့ရုံးဝန်ကြီး ဦးကိုကိုလှိုင် နှင့် ဥပဒေရေးရာဝန်ကြီးဒေါက်တာသီတာဦးတို့ ခေါင်းဆောင်သော မြန်မာကိုယ်စားလှယ်အဖွဲ့သည် ပြီးခဲ့သော စက်တင်ဘာ ၂၄ ရက်တွင် နယ်သာလန်နိုင်ငံ၊ သည်ဟေ့ဂ်မြို့သို့ သွားရောက်ခဲ့ကြောင်း သိရသည်။

သည်ဟေ့ဂ်မြို့ရှိ အပြည်ပြည်ဆိုင်ရာတရားရုံး(ICJ)၌ စက်တင်ဘာ ၂၆ ရက်တွင် မြန်မာကိုယ်စားလှယ်အဖွဲ့သည် ICJ ဥက္ကဋ္ဌ အပါအဝင် ဂမ်ဘီယာနိုင်ငံမှ ကိုယ်စားလှယ်များနှင့်တွေ့ဆုံခဲ့ကြောင်း သိရသည်။

ထိုသို့တွေ့ဆုံရာ၌ ဂမ်ဘီယာနိုင်ငံက မြန်မာနိုင်ငံအား တရားစွဲဆိုထားသည့်ကိစ္စနှင့်ပတ်သက်၍ ရှေ့ဆက်သွားမည့် လုပ်ငန်းစဉ်များကို ဆွေးနွေးခဲ့ကြသည်ဟု နစကမှ သတင်းထုတ်ပြန်ထားသည်။

ဂမ်ဘီယာနိုင်ငံက မြန်မာနိုင်ငံအား ၁၉၄၈ ခုနှစ် လူမျိုးသုဉ်းစေမှုကို တားဆီးရန်နှင့် ပြစ်ဒဏ်ပေးရန် နိုင်ငံတကာ သဘောစာချုပ်ကို ကျူးလွန်ဖောက်ဖျက်သည်ဟု စွပ်စွဲချက်ဖြင့် ICJ ၌ တရားစွဲဆိုထားခြင်းဖြစ်သည်။

ထိုသို့တရားစွဲဆိုထားခြင်းနှင့်ပတ်သက်၍ ဂမ်ဘီယာနိုင်ငံက ၎င်း၏အဆိုလွှာကို တရားရုံးသို့ ၂ဝ၂ဝ ပြည့်နှစ် အောက်တိုဘာ ၂၃ ရက်တွင် တင်သွင်းခဲ့ကြောင်း သိရသည်။

၎င်းအဆိုလွှာအပေါ် မြန်မာနိုင်ငံက ပြန်လည်ချေပလျှောက်လဲသည့်အချေလွှာကို ၂ဝ၂၃ ခုနှစ် သြဂုတ်လ ၂၄ ရက် တွင် တရားရုံးသို့ တင်သွင်းခဲ့ကြောင်း နစကဘက်က ထုတ်ပြန်ထားသည်။

ICJ ၌ မြန်မာနိုင်ငံကို တရားစွဲဆိုထားမှုအပေါ်ရင်ဆိုင်နေသည့် ဦးဆောင်ကော်မတီအား ဒုဝန်ကြီးချုပ်ဦးသန်းဆွေ ကို ဦးဆောင်စေကာ နစကမှ ပြန်လည်ပြင်ဆင်ဖွဲ့စည်းခဲ့ကြောင်း သတင်းရရှိသည်။

အပြည်ပြည်ဆိုင်ရာတရားရုံး(ICJ)၌ တရားရင်ဆိုင်ခြင်းဆိုင်ရာဦးဆောင်ကော်မတီကို နိုင်ငံတော်စီမံအုပ်ချုပ်ရေး ကောင်စီသည် ပြီးခဲ့သော လပိုင်းအတွင်းက ပြင်ဆင်ဖွဲ့စည်းခဲ့ကြောင်း နစက၏ အချက်အလက်များအရ သိရသည်။

ထို့ပြင် ဦးဆောင်ကော်မတီ၏ ဒုဥက္ကဋ္ဌများအဖြစ် ဝန်ကြီးဦးကိုကိုလှိုင်၊ ဝန်ကြီးဒေါက်တာသီတာဦးတို့ကို တာဝန် ပေးအပ်ထားပြီး နယ်စပ်ရေးရာဝန်ကြီးဒုတိယဗိုလ်ချုပ်ကြီး ထွန်းထွန်းနောင်၊ လူဝင်မှုကြီးကြပ်ရေးနှင့်ပြည်သူ့ အင်အားဝန်ကြီးဦးမြင့် ကြိုင်၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီး ဒေါက်တာစိုးဝင်း တို့ကိုလည်း အဖွဲ့ဝင်များအဖြစ် တာဝန်ပေး ဖွဲ့စည်းထားသည်။

ဆက်လက်ပြီး ၎င်းကော်မတီ၌ စစ်ရေးချုပ် ဒုတိယဗိုလ်ချုပ်ကြီးစိုးမင်းဦး၊ စစ်ဥပဒေချုပ် ဒုတိယဗိုလ်ချုပ်ကြီး မျိုးသန့်နိုင် အပါအဝင် ပြည်ထဲရေး၊ ကာကွယ်ရေး၊ နိုင်ငံခြားရေး ဒုဝန်ကြီးများကိုလည်း အဖွဲ့ဝင်များအဖြစ် ထည့်သွင်းဖွဲ့စည်းကာ နစကမှ တာဝန်ပေးအပ်ထားသည်။