Pika (NSS) - စက်တင်ဘာ ၂၆ 

ဆဲလ်ဖုန်းများအားလုံးမှ ဓါတ်ရောင်ခြည်ဖြာထွက်မှုများသည် လူသားများ၏ ကျန်းမာရေးအတွက် အန္တရာယ်ရှိသောကြောင့် ဆဲလ်ဖုန်းများအသုံးပြုမှုကို လျှော့ချသင့်ကြောင်း ရုရှား၏ စားသုံးသူအခွင့်အရေးနှင့် လူသားကျန်းမာရေး အေဂျင်စီ Rospotrebnadzor က ပြောကြားခဲ့သည်။

ပြင်သစ်နိုင်ငံတွင် Iphone12 အမျိုးအစားကို ပိတ်ပင်လိုက်ပြီးနောက် ရုရှားကလည်း ပိတ်ပင်နိုင်ချေရှိသည်ဆိုသည့် ထင်ကြေးပေးမှုများရှိနေမှုနှင့်အတူ အဆိုပါအေဂျင်စီက ယခုကဲ့သို့ ထုတ်ဖော်ပြောဆိုခဲ့ခြင်းဖြစ်သည်။ 

အေဂျင်စီပြောရေးဆိုခွင့်ရှိသူ က "ဆဲလ်ဖုန်းတွေက ဓါတ်ရောင်ခြည်ဖြာထွက်မှုတွေဟာ လူသားတွေ အထူးသဖြင့် ကလေးတွေအတွက် အန္တရာယ်ရှိပါတယ်။ ပြီးတော့ ဖုန်းပြောရာမှာလည်း ဘေးကင်းရေးစည်းမျဉ်းတွေကို လိုက်နာ ဖို့ လိုအပ်ပါတယ်။ ဖုန်းပြောမှုတွေဟာ နှစ်မိနစ်ထက်ပိုမကြာသင့်သလို ဖုန်းခေါ်ဆိုမှုတွေကြား အနည်းဆုံး ရပ်နားချိန်က (၁၅)မိနစ်ရှိသင့်ပါတယ်" ဟု ပြောထားသည်။

သုံးစွဲသူများသည် အိပ်နေစဉ်အချိန်အတွင်း ဖုန်းကို ဘေးဘက်တွင် ထားသင့်ပြီး အိတ်ကပ်များထဲတွင် ထည့်သယ် သွားမည့်အစား လွယ်အိတ်များထဲတွင် ထည့်သယ်သွားသင့်ကြောင်း အဆိုပါပြောရေးဆိုခွင့်ရှိသူက ပြောကြားခဲ့ သည်။ 

ပြင်သစ်နိုင်ငံ၏ National Frequency Agency (ANFR) သည် Apple ကုမ္ပဏီ၏ iPhone 12 အမျိုးအစားက ဓါတ်ရောင်ခြည်အများအပြားကို ထုတ်လွှတ်နေကြောင်း စစ်ဆေးတွေ့ရှိခဲ့ပြီးနောက် နိုင်ငံအတွင်းတွင် iPhone 12 အမျိုးအစားရောင်းချမှုကို ယခုလအစောပိုင်းတွင် ပိတ်ပင်ခဲ့ကြောင်း သိရသည်။ iPhone 12 ကို ၂ဝ၂ဝ ပြည့်နှစ် အောက်တိုဘာလတွင် စတင်ထုတ်လုပ်ခဲ့ခြင်းဖြစ်ပြီး ဈေးနှုန်းသက်သာမှုများနှင့်အတူ လူကြိုက်များခဲ့သည်၊၊

iPhone 12 သည် ဓါတ်ရောင်ခြည်အများအပြား ထုတ်လွှတ်နေသည်ဆိုသည့် (ANFR) ၏ ပြောဆိုချက်များကို Apple ကုမ္ပဏီက ငြင်းဆိုထားကြောင်းလည်း သိရသည်။ သို့သော်လည်း Apple ကုမ္ပဏီသည် ယခင်တည်းက ဓါတ်ရောင်ခြည်စံနှုန်းများကို ချိုးဖောက်ခဲ့သည်ဟု စွပ်စွဲခံရမှုများလည်း ရှိနေသည်။