ဂျန်ဇက် (NSS) - စက်တင်ဘာ ၂၆ 

ရုရှားနိုင်ငံက အိမ်ရှင်အဖြစ် လက်ခံကျင်းပနေတဲ့ နိုင်ငံတကာအကြမ်းဖက်မှုတန်ပြန်တိုက်ဖျက်ရေး လေ့ကျင့်ခန်း Counter-Terrorism Field Training Exercises များကို မြန်မာနိုင်ငံ ပူးပေါင်းပါဝင်ခဲ့ကြောင်း ရုရှားအခြေစိုက်သတင်းတွေမှာ ဖော်ပြထားပါတယ်။

အာဆီယံအဖွဲ့ဝင်နိုင်ငံများ နဲ့ မိတ်ဖက်နိုင်ငံများ"ADMM Plus" တို့ ပူးပေါင်းလုပ်ဆောင်တဲ့  Counter-Terrorism Field Training Exercises ကို ရုရှားနိုင်ငံမှာ စက်တင်ဘာ ၂၅ ရက်က ၃ဝ ရက်အထိ ကျင်းပမှာဖြစ်ပြီး Primorsky ဒေသမှာ လုပ်ဆောင်နေတဲ့ လေ့ကျင့်ခန်းအစီအစဉ်အတွင်း မြန်မာနိုင်ငံအပြင် အာဆီယံအဖွဲ့ဝင်နိုင်ငံတွေဖြစ်တဲ့ ဘရူးနိုင်း၊ ဗီယက်နမ်၊ အင်ဒိုနီးရှား၊ ကမ္ဘောဒီးယား၊ လာအို၊ မလေးရှား၊ ထိုင်း နဲ့ ဖိလစ်ပိုင်တို့ ပူးပေါင်းပါဝင်ခဲ့ကြောင်း ရုရှားအရှေ့ပိုင်းတိုင်းစစ်ဌာနချုပ်က သတင်းထုတ်ပြန်ထားပါတယ်။ 

ဒါ့အပြင် အာဆီယံအဖွဲ့ဝင်နိုင်ငံတွေမဟုတ်တဲ့ တရုတ်၊ အိန္ဒိယနိုင်ငံတို့လည်း ပူးပေါင်းပါဝင်ခဲ့ပြီး အခြားမိတ်ဖက်နိုင်ငံများ ပူးပေါင်းပါဝင်ခြင်း မရှိခဲ့ကြောင်း သိရပါတယ်။ 

"ADMM Plus" လေ့ကျင့်ခန်းတွေဟာ အာဆီယံနဲ့ မိတ်ဖက်နိုင်ငံများကြား ပူးပေါင်းလုပ်ဆောင်တဲ့ လေ့ကျင့်ခန်းဖြစ်ပြီး ၂ဝ၁ဝ ပြည့်နှစ်မှာ အာဆီယံနဲ့ ဆွေးနွေးမှုမိတ်ဖက်နိုင်ငံများအဖွဲ့အစည်းကို ဖွဲ့စည်းခဲ့ကာ အာဆီယံအဖွဲ့ဝင်နိုင်ငံများအပြင် မိတ်ဖက်နိုင်ငံများအဖြစ် သြစတြေးလျ၊ အိန္ဒိယ၊ တရုတ်၊ နယူးဇီလန်၊ တောင်ကိုရီးယား၊ ဂျပန်၊ အမေရိကန်၊ ရုရှားတို့ ပါဝင်ခဲ့ကြောင်း သိရပါတယ်။

ရုရှားအရှေ့ပိုင်းတိုင်းစစ်ဌာနချုပ်က "အကြမ်းဖက်မှုတိုက်ဖျက်ရေးလေ့ကျင့်ခန်းကို အဆင့် နှစ်ဆင့် နဲ့ ကျင်းပသွားမှာပါ။ ပထမအဆင့်မှာ လေ့ကျင့်ခန်းအတွင်း ပါဝင်တဲ့နိုင်ငံတွေရဲ့စစ်ဘက်ရေးတပ်မှူးတွေဟာ အကြမ်းဖက် တိုက်ဖျက်ရေးစစ်ဆင်ရေးလုပ်ဆောင်ဖို့ ဆုံးဖြတ်ကြမှာပါ။ ဒုတိယအဆင့်မှာတော့ လေ့ကျင့်ခန်းမှာ ပါဝင်တဲ့ နိုင်ငံတွေရဲ့တပ်ဖွဲ့ဝင်တွေဟာ  အကြမ်းဖက်မှုတိုက်ဖျက်ရေးလုပ်ငန်းတွေကို လက်တွေ့ပူးပေါင်းလေ့ကျင့်ရမှာဖြစ်တယ်" လို့ ပြောပါတယ်။ 

ရုရှားနိုင်ငံက အိမ်ရှင်အဖြစ် လက်ခံကျင်းပနေတဲ့ Counter-Terrorism Field Training Exercises အစည်းအဝေးကို တပ်ဖွဲ့ဝင်အရေအတွက် ၇ဝဝ ကျော် ပါဝင်လေ့ကျင့်မှာဖြစ်ပြီး၊ တိုက်လေယာဉ်များ၊ စစ်ဘက်သုံးရဟတ်ယာဉ်များ၊ မောင်းသူမဲ့လေယာဉ်များ၊ တင့်ကားများ၊ သံချပ်ကာ ကားများ နှင့် အခြားစစ်ဘက်သုံးပစ္စည်းများကို အသုံးပြုကာ လေ့ကျင့်သွားဖွယ်ရှိနေကြောင်း သိရပါတယ်။ 

မြန်မာနိုင်ငံနဲ့ ရုရှားနိုင်ငံတို့ဟာ ADMM-Plus အကြမ်းဖက်မှုတန်ပြန်တိုက်ဖျက်ရေးဆိုင်ရာ  အစည်းအဝေးများကို ပူးတွဲဥက္ကဋ္ဌအဖြစ် တာဝန်ယူခဲ့ပြီး ပြီးခဲ့တဲ့သြဂုတ်လက မြန်မာနိုင်ငံမှာ ADMM-Plus အကြမ်းဖက်မှုတန်ပြန်တိုက်ဖျက်ရေးဆိုင်ရာ စားပွဲတင်လေ့ကျင့်ခန်းကို အိမ်ရှင်အဖြစ် ကျင်းပခဲ့ကြောင်း သိရပါတယ်။

မြန်မာနိုင်ငံမှာ ၂ဝ၂၁ ခုနှစ်က အာဏာရယူမှုဖြစ်ပွားခဲ့ပြီးနောက် မြန်မာနိုင်ငံ နဲ့ ရုရှားနိုင်ငံကြား ဆက်ဆံရေးပိုမိုကောင်းမွန်လာခဲ့ပြီး၊ ပူးပေါင်းဆောင်ရွက်မှုတွေ မြှင့်တင်နိုင်ခဲ့ကြောင်း သိရပါတယ်။