စော(NSS) - စက်တင်ဘာ ၂၆

မီးဘေးနှင့် ရုတ်တရက်ဖြစ်ပေါ်လာသော ဘေးအန္တရာယ်များကြုံတွေ့လာပါက မီးသတ်ဦးစီးဌာနသို့ အရေးပေါ်အကူအညီတောင်းခံနိုင်ရန်အတွက် 191 Report App အား အဆင့်မြှင့်တင်ထားကြောင်း သိရသည်။

မြန်မာနိုင်ငံမီးသတ်ဦးစီးဌာနမှ ယမန်နေ့(စက်တင်ဘာလ ၂၅ ရက်)တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

ပြည်သူများကြုံတွေ့နေရသည့် ဘေးအန္တရာယ်များအား ခေတ်နှင့်အညီ ICT နည်းပညာကို အသုံးပြုထားသည့်အတွက် မီးသတ်ဦးစီးဌာနသို့ အချိန်နှင့်တပြေးညီ သတင်းပေးပို့ အကူ အညီတောင်းခံနိုင်ကြောင်း သိရသည်။

“ကိုယ့်မျက်စိရှေ့မှာမြင်နေရတာ ဒါမှမဟုတ်ရင် ကိုယ့်အနီးနားပတ်ဝန်းကျင်မှာ ဖြစ်ပျက်နေတဲ့ဟာကို အပလီကေးရှင်းကနေ ဓာတ်ပုံရိုက်ပြီး ပေးပို့လိုက်တယ်ဆိုတာနဲ့  ဖြစ်ပွားတဲ့ဖြစ်စဉ်မှတ်တမ်းရယ် ပေးပို့သူရဲ့ဖုန်းနံပါတ်ကို confirm လုပ်ပြီးတာနဲ့ ချက်ချင်းနီးစပ်ရာစခန်းကနေ ကားတွေထွက်နိုင်အောင်  ဆောင်ရွက်ထားတဲ့ အထောက်အကူပစ္စည်းလေးပါ။ ဓာတ်ပုံပို့တဲ့အချိန်မှာတော့ Location လေးကို တစ်ချက်ဖွင့်ထားပေးရပါမယ်။ ပို့တဲ့အချိန်ပဲဖွင့်ထားရင်ရပါတယ်”ဟု မြန်မာနိုင်ငံမီးသတ်ဦးစီးဌာနမှ လက်ထောက်ညွှန်မှူး ဦးတင်ခိုင်မှ NSS ကိုပြောသည်။

၎င်း 191 Report App ဖြင့် မီးဘေး အပါအဝင် သဘာဝဘေးအန္တရာယ်များနှင့် ရုတ်တရက်ဖြစ်ပေါ်လာသော အန္တရာယ်များကို ဓာတ်ပုံရိုက်ပေးပို့ရာတွင်  Location အား ဖွင့်ပေးထားရန်လိုအပ်ကြောင်း သိရသည်။

အဆိုပါ သတင်းပေးချက်များအား  အချိန်နှင့် တပြေးညီတုန့်ပြန်ဆောင်ရွက်နိုင်ရန်နှင့် မီးသတ်ဦးစီးဌာန၏ ပြည်သူ့ဝန်ဆောင်မှုလုပ်ငန်းများအား အားကိုးယုံကြည်မှုရရှိစေရန်အတွက် အဆင့်မြှင့်တင်ထားကြောင်း သိရသည်။

“အချက်အလက်တွေကတော့ ဘာတွေပါလဲဆိုရင်တော့ ကိုယ်နဲ့နီးစပ်ရာ မီးသတ်စခန်းရဲ့ဖုန်းနံပါတ်တွေပါလာမယ်။ Location ရှာတာပါမယ်။ နောက်ပြီးတော့ မီးသတ်ဦးစီးဌာနနဲ့ သက်ဆိုင်တဲ့ သတင်းအချက်အလက်တွေကို အချိန်နဲ့တပြေးညီ အပလီကေးရှင်းထဲကနေ ဖတ်နိုင်မယ်”ဟု ၎င်းကဆက်လက်ပြောကြားခဲ့သည်။

ထို့ပြင် နိုင်ငံတော်နှင့် ပြည်သူလူထု၏ အသက်အိုးအိမ်စည်းစိမ်များအား ကာကွယ်စောင့် ရှောက်ရာတွင် ICT နည်းပညာဖြင့် အထောက်အကူဖြစ်စေရန် ရည်ရွယ်ထားကြောင်း သိရသည်။

အဆိုပါ 191 Report App အား Play Storeနှင့်  Apple Store တို့တွင် အဆင့်မြှင့်တင်အသုံးပြုနိုင်ပြီဖြစ်ကြောင်း မြန်မာနိုင်ငံမီးသတ်ဦးစီးဌာနက အသိပေးထုတ်ပြန်ထားသည်။