ရောင်နီ (NSS) - စက်တင်ဘာ ၁၇

ရိုမေးနီးယားနိုင်ငံမှာ ယူကရိန်း စပါးနဲ့ ဆက်စပ်ထွက်ကုန်တွေကို ဆက်လက်ပိတ်ဆို့ထားဖို့ တောင်သူလယ်သမားအဖွဲ့အစည်းက အစိုးရကို စနေနေ့ (စက်တင်ဘာ ၁၆ ရက်) မှာ တောင်းဆိုလိုက်ပါတယ်။

ဘူဂ်ဂေးရီးယား၊ ဟန်ဂေရီ၊ ပိုလန်နဲ့ စလိုဗက်ကီးယားလိုပဲ ရိုမေးနီးယားနိုင်ငံဟာ ရုရှား-ယူကရိန်း ပဠိပက္ခအတွင်း ယူကရိန်းမှ စပါးတင်သွင်းမှု မြင့်တက်လာခြင်းကြောင့် ဒေသတွင်း စပါးစျေးကွက်ကို ထိခိုက်လာခြင်းနဲ့ ပတ်သက်ပြီး လယ်သမားတွေရဲ့ဆန္ဒပြမှုတွေနဲ့ ရင်ဆိုင်နေရပါတယ်။ 

သောကြာနေ့ (စက်တင်ဘာ ၁၅ ရက်) မှာတော့ ပိုလန်၊ ဆလိုဗက်ကီးယားနဲ့ ဟန်ဂေရီတို့က ၎င်းတို့ရဲ့ တစ်ဦးတည်း ဆန္ဒနဲ့ ယူကရိန်းမှ ကုန်တင်သွင်းမှုပိတ်ပင်ခြင်းကို ကြေညာခဲ့ပါတယ်။ ဒါပေမယ့် အဲဒီပိတ်ပင်မှုဟာ သွင်းကုန်တွေ အပေါ်မှာသာ သက်ရောက်မှုရှိမှာဖြစ်ပြီး အခြားဈေးကွက်တွေမှ ဖြတ်သန်းရောက်ရှိလာတဲ့ ကုန်ပစ္စည်းတွေအတွက် အကျုံးမဝင်ဘူးလို့ သိရပါတယ်။ 

ဒီအတွက် လယ်သမားများ အသင်းအဖွဲ့က ယူကရိန်းကိုထောက်ခံတဲ့ ပိုလန်နိုင်ငံတောင် တစ်ဖက်သတ် တစ်ဦးတည်းဆန္ဒနဲ့ ယူကရိန်းမှ ကုန်တင်သွင်းမှု ပိတ်ပင်ထားပြီဖြစ်တာကြောင့် ရိုမန်းနီးယားဟာလည်း အလားတူ ပိတ်ပင်မှုလုပ်သင့်ကြောင်း၊ ၎င်းတို့ရဲ့တောင်းဆိုချက်ဟာ ယူကရိန်းရဲ့ကုန်တွေ ရိုမေးနီးယားကိုဖြတ်ပြီး အခြားနေရာတွေကို ကူးသန်းရောင်းဝယ်မှုတွေကို ထိခိုက်စေမှာ မဟုတ်ကြောင်း ဆိုပါတယ်။      

ယူကရိန်းဟာ ယခုနှစ်ရဲ့ ပထမ ၈ လအတွင်း ရိုမေးနီးယားရှိ ပင်လယ်နက်ဆိတ်ကမ်းမှတဆင့် စပါးမစ်ထရစ် တန်ချိန် ၉.၂ သန်း တင်ပို့နိုင်ခဲ့ပါတယ်။ သောကြာနေ့ (စက်တင်ဘာ ၁၅ ရက်) က ထုတ်ပြန်ချက်တစ်ခုအရ ဟန်ဂေရီနိုင်ငံဟာလည်း ကောက်နှံ၊ ဟင်းသီးဟင်းရွက်၊ အသားထွက်ကုန်နဲ့ ပျားရည် အပါအဝင် ယူကရိန်းနိုင်ငံ ထုတ် လယ်ယာထွက်ကုန် ၂၄ မျိုးကို တင်သွင်းခွင့် ကန့်သတ်လိုက်တယ်လို့ သိရပါတယ်။