မြူနစ် (NSS) - စက်တင်ဘာ ၁၇

ဗိုလ်ချုပ်မှူးကြီးမင်းအောင်လှိုင် ဦးဆောင်သည့် နစကအစိုးရလက်ထက်၌ ပစ်ခတ်တိုက်ခံရမှုကြောင့် သေဆုံးခဲ့ရသည့် ရဲတပ်ဖွဲ့ဝင်ဦးရေ(၅၀၀)နီးပါးရှိကြောင်း သိရသည်။

၂၀၂၁ ခုနှစ် ဖေဖော်ဝါရီလ ၁ ရက်မှစ၍ ၂၀၂၃ ခုနှစ် ဇူလိုင်လကုန်ပိုင်းအထိ ပစ်ခတ်တိုက် ခိုက်ခံရမှုကြောင့် သေဆုံးခဲ့သည့် ရဲတပ်ဖွဲ့ဝင်ဦးရေသည် (၄၄၅)ဦးရှိကြောင်း နစက၏ သတင်းအချက်အလက်များအရ သိရသည်။

နိုင်ငံတော်တာဝန်ကို ရယူခဲ့သည့် နစကအစိုးရလက်ထက် (၂)နှစ်တာကာလအတွင်း၌ PDF အပါအဝင် လက်နက်ကိုင်အဖွဲ့များ၏ ပစ်ခတ်တိုက်ခိုက်ခံရမှုကြောင့် သေဆုံးခဲ့ရသည့် ရဲတပ်ဖွဲ့ဝင်ဦးရေသည် (၄၀၀)ကျော်ရှိခဲ့ကြောင်း သိရသည်။

နစကအစိုးရ၏ (၂)နှစ်တာကာလအပြီး နောက်ထပ်(၆)လသက်တမ်းအတွင်း၌ ပစ်ခတ်တိုက်ခိုက်ခံရမှုကြောင့် ထပ်မံသေဆုံးခဲ့ရသည့် ရဲတပ်ဖွဲ့ဝင်ဦးရေသည် (၅၀)နီးပါးရှိခဲ့ကြောင်း သိရသည်။

ထို့ကြောင့် နစကအစိုးရလက်ထက် (၂)နှစ်ခွဲကာလအတွင်း၌ ရဲတပ်ဖွဲ့ဝင်(၅၀၀)နီးပါး သေဆုံးခဲ့ကြောင်းသိရပြီး ပစ်ခတ်တိုက်ခိုက်ခံရမှုဖြစ်စဉ်အများအပြားသည် စစ်ကိုင်းတိုင်း၊ ချင်းပြည်နယ်၊ မကွေးတိုင်း နှင့် မန္တလေးတိုင်းတို့တွင် အများဆုံးဖြစ်ပွားခဲ့ကြောင်း နစက၏ သတင်းအချက်အလက်များတွင် ‌ဖော်ပြထားသည်။

ထို့ပြင် PDF အပါအဝင် လက်နက်ကိုင်အဖွဲ့များ၏ ပစ်ခတ်တိုက်ခိုက်မှုကြောင့် ထိခိုက်ဒဏ်ရာရရှိခဲ့ရသည့် ရဲတပ်ဖွဲ့ဝင်ဦးရေသည်လည်း အများအပြားရှိခဲ့ကြောင်း သိရသည်။

အလားတူ ယခုရက်ပိုင်း၌ စစ်ကိုင်းတိုင်းအတွင်း ဒုရဲအုပ်နှင့် ၎င်း၏မိသားစုသည် PDF အဖွဲ့၏ သေနတ်ဖြင့်ပစ်ခတ်လုပ်ကြံသတ်ဖြတ်ခြင်းကို ခံခဲ့ရသည်။

ထို့ပြင် စစ်ကိုင်းတိုင်း၊ ဘုတလင်မြို့ပေါ်၌ ယမန်နေ့(စက်တင်ဘာလ ၁၆ ရက်)တွင် PDF အဖွဲ့၏ ပစ်ခတ်တိုက်ခိုက်မှုကြောင့် ရဲတပ်ဖွဲ့ဝင်(၂)ဦး ထိခိုက်သေဆုံးခဲ့ကြောင်း သိရသည်။