ယွန်း (NSS) - စက်တင်ဘာ ၁၂

ဒေါ်မို့မို့အောင်ဦးဆောင်သည့် မြန်မာနိုင်ငံအိမ်ခြံမြေဝန်ဆောင်မှုအသင်း(ဗဟို)က ဥက္ကဋ္ဌသက်တမ်းကို (၃)နှစ် နှစ်ကြိမ်သာ တာဝန်ထမ်းဆောင်ရန် ပြင်ဆင်သတ်မှတ်လိုက်ကြောင်း သိရသည်။

ဒေါ်မို့မို့အောင် ဦးဆောင်သော မြန်မာနိုင်ငံအိမ်ခြံမြေဝန်ဆောင်မှုအသင်း(ဗဟို)၏ နှစ်ပတ်လည်အထွေထွေအစည်း အဝေးကို ယနေ့(စက်တင်ဘာလ ၁၂ ရက်)တွင် ရန်ကုန်မြို့၊ ကျောက်တံတားမြို့နယ်ရှိ Asia Plaza Hotel တွင် ကျင်းပခဲ့သည်။  

မြန်မာနိုင်ငံအိမ်ခြံမြေဝန်ဆောင်မှုအသင်း(ဗဟို)၏ အသင်းဖွဲ့စည်းပုံအခြေခံစည်းမျဥ်း အပိုဒ်(၃၅)အရ ဗဟိုအလုပ် အမှုဆောင်ကော်မတီနှင့် အလုပ်အမှုဆောင်ကော်မတီတို့၏ သက်တမ်းသည်(၃)နှစ်ဖြစ်သည်ဟု ပြဋ္ဌာန်းထားပြီး အပိုဒ်(၃၆)တွင်လည်း အသင်းဥက္ကဋ္ဌ၏ သက်တမ်းသည် တစ်ဆက်တည်း(၂)ကြိမ် (စုစုပေါင်း ၆ နှစ်)အထိသာ ရွေး ကောက်တင်မြှောက်ပိုင်ခွင့်ရှိကြောင်း အသင်း၏သင်းဖွဲ့စည်းမျဥ်းတွင် ဖော်ပြထားသည်။

အိမ်ခြံမြေဝန်ဆောင်မှုအသင်း(ဗဟို)၏ ၂၀၂၃- ၂၀၂၆ အတွက် ဥက္ကဋ္ဌအပါအဝင် အလုပ်အမှုဆောင်ကိုယ်စားလှယ်သစ်များရွေးကောက်ပွဲကို ပြီးခဲ့သည့် သြဂုတ်လအတွင်း ကျင်းပခဲ့ကြောင်း သိရသည်။

အဆိုပါ ရွေးကောက်ပွဲရလဒ်များအရ လက်ရှိတွင် မြန်မာနိုင်ငံအိမ်ခြံမြေဝန်ဆောင်မှုအသင်း(ဗဟို)၏ ဥက္ကဋ္ဌ တာဝန်ကို ဒေါ်မို့မို့အောင်မှတာဝန်ယူထားပြီး ၎င်းအနေဖြင့် ဥက္ကဋ္ဌသက်တမ်းကို သုံးနှစ် နှစ်ကြိမ်ဖြင့် စုစုပေါင်း(၆)နှစ် ထမ်းဆောင်ပြီးပါက နာယကနေရာကို ပြောင်းလဲရယူသွားမည်ဖြစ်ကြောင်း သိရသည်။

"သင်းဖွဲ့စည်းမျဥ်းတိုင်းမှာပါတာက ဥက္ကဋ္ဌသည် (၃)နှစ် နှစ်ကြိမ်လုပ်ပြီးသွားရင် တစ်ကြိမ်နားရမယ်။ အခုကဘာဖြစ်လဲဆိုတော့ ဒီကိစ္စတွေက ပြဿနာများစွာဖြစ်လာတယ်။ အဲဒီလိုတွေဖြစ်လာတော့ ရှေ့ကလုပ်တဲ့သူတွေကလည်း မဖယ်ချင်တာတွေရှိလာတော့ တစ်နိုင်ငံလုံးအတွက်လည်း အဆင်မပြေဘူး။ အဲဒီတော့ အခုလက်ထက်မှာ (၃)နှစ် နှစ်ကြိမ်လုပ်ပြီးရင် တစ်ခါထဲ နာယကနေရာကို သွားတော့မယ်ဆိုတဲ့ သင်းဖွဲ့စည်းမျဥ်းကို အဓိကထားပြီးပြင်လိုက်တာပေါ့။ ကျန်တာကတော့ ခေတ်နဲ့လျော်ညီစွာ လိုအပ်ချက်တွေကို ပြင်ဆင်မှာဖြစ်ပါတယ်"ဟု ဥက္ကဋ္ဌ ဒေါ်မို့မို့အောင်က ပြောသည်။

ယနေ့ ကျင်းပခဲ့သည့် အစည်းအဝေး၌ ပြည်နယ်နှင့် တိုင်းအသီးသီးမှ အသင်းဥက္ကဋ္ဌများ အပါအဝင် အသင်းသားအဖွဲ့ဝင်များ စုစုပေါင်း (၁၀၀၀)ကျော် တက်ရောက်ခဲ့ကြောင်း သိရသည်။

လက်ရှိတွင် မြန်မာနိုင်ငံအိမ်ခြံမြေဝန်ဆောင်မှုအသင်းနှင့်ပတ်သက်၍ ဥက္ကဋ္ဌဒေါ်မို့မို့အောင် ဦးဆောင်သော အသင်းနှင့် ဥက္ကဋ္ဌ ဦးခင်မောင်သန်းဦးဆောင်သော အသင်းဟူ၍ နှစ်ဖွဲ့ကွဲလျက်ရှိကြောင်း တွေ့ရှိရသည်။

ဥက္ကဋ္ဌ ဦးခင်မောင်သန်းဦးဆောင်သည့် မြန်မာနိုင်ငံအိမ်ခြံမြေဝန်ဆောင်မှုအသင်းသည် ပြီးခဲ့‌သည့် ဇူလိုင်လ(၉)ရက်၌ ရန်ကုန်မြို့ရှိ Sky Star Hotel တွင် နှစ်ပတ်လည်အစည်းအဝေးတစ်ရပ် ကျင်းပခဲ့သည်။

ဥက္ကဋ္ဌ ဦးခင်မောင်သန်းသည် မြန်မာနိုင်ငံအိမ်ခြံမြေဝန်ဆောင်မှုအသင်း၌ (၁၁)နှစ်ကြာ ဥက္ကဋ္ဌအဖြစ် တာဝန်ထမ်းဆောင်ခဲ့ကြောင်း သိရသည်။

မြန်မာနိုင်ငံအိမ်ခြံမြေ ဝန်ဆောင်မှုအသင်းအား ၂ဝ၁၂ ခုနှစ်၊ ဇွန်လ(၂၈)ရက်တွင် အသင်းလုပ်ငန်းလုပ်ကိုင်ခွင့်ရှိသည့် လိုင်စင်နှင့်အတူ ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာနတွင် ဖွဲ့စည်းမှတ်ပုံတင်ခဲ့ခြင်းဖြစ်သည်။