မြူနစ် (NSS) - စက်တင်ဘာ ၁၁

ဒီမိုကရေစီအစိုးရ ဒုတိယသက်တမ်း(NLD လက်ထက်)၌ နိုင်ငံ၏ အုပ်ချုပ်ရေးသည် ပြည်ပနိုင်ငံများ၏ သြဇာအောက်သို့ မသိမသာရောက်ရှိခဲ့ကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။

၎င်းက ယမန်နေ့(စက်တင်ဘာလ ၁၀ ရက်)တွင် အရှေ့မြောက်တိုင်းစစ်ဌာနချုပ်၊ ရွှေလီရတနာခန်းမ၌ ရှမ်းပြည်နယ် (မြောက်ပိုင်း)ရှိ ပြည်သူ့စစ်ဌာနေတပ်ဖွဲ့ဝင်များအားတွေ့ဆုံစဉ် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

၂၀၂၀ ပြည့်နှစ်ပါတီစုံဒီမိုကရေစီအထွေထွေရွေးကောက်ပွဲ၌ လူပုဂ္ဂိုလ်ဦးစားပေး၍ ဆောင်ရွက်ခဲ့ခြင်းကြောင့် နိုင်ငံအတွက် မဖြစ်သင့်သည့်ကိစ္စရပ်များဖြစ်ပေါ်ခဲ့သည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

ထို့ပြင် ဒီမိုကရေစီအစိုးရဒုတိယသက်တမ်းတွင် နိုင်ငံ၏ အုပ်ချုပ်ရေးနှင့်စီးပွားရေးဆိုင်ရာများ၌ ပြည်ပနိုင်ငံများ၏ အကြံဉာဏ်များကိုခံယူ၍ ဆောင်ရွက်ခဲ့သည်ကိုတွေ့ရှိရပြီး ပြည်ပနိုင်ငံများ၏ သြဇာအောက်သို့ မသိမသာရောက်ရှိနေခြင်းသည် တစ်နည်းအားဖြင့် မြန်မာနိုင်ငံ၏လွတ်လပ်ရေးကို ဆုံးရှုံးခြင်းပင်ဖြစ်ကြောင်း ၎င်းကထပ်မံပြောသည်။

နိုင်ငံတကာဆက်ဆံရေးနှင့်ပတ်သက်၍ သဟဇာတဖြစ်နေရန် လိုအပ်သော်လည်း သြဇာခံဖြစ်၍ မရကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။

ယခင်အစိုးရလက်ထက်များ၌ မြန်မာနိုင်ငံအနေဖြင့်လွတ်လပ်၍ တက်ကြွပြီး ဘက်မလိုက်သည့် နိုင်ငံခြားရေးမူဝါဒကို ကျင့်သုံးခဲ့ပြီး လက်ရှိတွင်လည်း ယင်းမူဝါဒအတိုင်းပင် ကျင့်သုံးလျက်ရှိကြောင်း သိရသည်။

လက်ရှိ ဗိုလ်ချုပ်မှူးကြီးမင်းအောင်လှိုင် ဦးဆောင်သည့် နစကအစိုးရလက်ထက်တွင် မြန်မာနိုင်ငံနှင့် ရုရှားနိုင်ငံတို့၏ ဆက်ဆံရေးသည် ကဏ္ဍပေါင်းစုံ၌ ပိုမိုကောင်းမွန်လျက်ရှိသည်ကို တွေ့ရသော်လည်း အမေရိကန်နိုင်ငံအပါအဝင် အနောက်အုပ်စုနိုင်ငံများနှင့် ဆက်ဆံရေးသည် ကောင်းမွန်နေခြင်းမရှိကြောင်း တွေ့ရှိရသည်။