ယွန်း (NSS) - စက်တင်ဘာ ၁၀

အကြမ်းဖက်များ၏ ခြိမ်းခြောက်သတ်ဖြတ်ခံရမှုကြောင့် စုစုပေါင်း လျှပ်စစ်ဝန်ထမ်း(၂၆)ဦးထိ သေဆုံးထားရကြောင်း လျှပ်စစ်စွမ်းအားဝန်ကြီးဌာနထံမှ သိရသည်။

နစက အာဏာစတင် ရယူခဲ့သည့် ၂ဝ၂၁ ခုနှစ်၊ ဖေဖော်ဝါရီလမှ စတင်၍ နိုင်ငံတစ်ဝန်းရှိ ဒေသအချို့တွင် လက်နက်ကိုင်ပဋိပက္ခဖြစ်ပွားမှုများရှိခဲ့ကြောင်း သိရသည်။

အဆိုပါပဋိပက္ခများကြောင့် ရဟန်းသံဃာနှင့်သီလရှင်များ အပါအဝင် နိုင်ငံဝန်ထမ်းများနှင့် ဒေသခံပြည်သူ သေဆုံးမှုများရှိခဲ့ကြောင်း သိရသည်။

ထိုသို့သေဆုံးခဲ့သူများရှိခဲ့ရာ လျှပ်စစ်စွမ်းအားဝန်ကြီးဌာနတွင်လည်း လျှပ်စစ်ဝန်ထမ်း(၂၆)ဦးထိ သေဆုံးခဲ့ရကြောင်း သိရသည်။

၎င်းတို့သည် ဓာတ်အားဖြန့်ဖြူးပေးနိုင်ရေးနှင့် ဓာတ်အားခကောက်ခံရေးတို့အတွက် ဆောင်ရွက်နေစဉ် လက်နက် ကိုင်များက ခြိမ်းခြောက်ခြင်း၊ ချောင်းမြောင်းပစ်ခတ်ခြင်း၊ သတ်ဖြတ်ခြင်း တို့ကြောင့် သေဆုံးခဲ့ကြောင်း လျှပ်စစ်စွမ်းအားဝန်ကြီးဌာနက ဆိုသည်။

"ဓာတ်အားဖြန့်ဖြူးပေးနိုင်ရေးနဲ့ ဓာတ်အားခကောက်နိုင်ရေးကို ဆောင်ရွက်နေချိန်မှာ မသမာသူ၊ အဖျက်အမှောင့် လုပ်လိုသူ၊ အကြမ်းဖက်လက်နက်ကိုင်တွေက ခြိမ်းခြောက်တာ၊ ချောင်းမြောင်းပစ်ခတ်တာ၊ သတ်ဖြတ်တာတွေကို ပြုလုပ်တာကြောင့် ဝန်ထမ်း(၂၆)ဦး သေဆုံးခဲ့ပြီး (၆၉)ဦး ဒဏ်ရာရရှိခဲ့ပါတယ်" ဟု လျှပ်စစ်စွမ်းအားဝန်ကြီးဌာနမှ တာဝန်ရှိသူတစ်ဦးက NP News ကို ပြောသည်။

ဝန်ကြီးဌာနအနေဖြင့် ထိုသို့ ရင်ဆိုင်ကြုံတွေ့နေရသော်လည်း သက်ဆိုင်ရာတိုင်းနှင့် ပြည်နယ်အစိုးရအဖွဲ့များ၏ လုံခြုံရေးအကူအညီဖြင့် ဓာတ်အားခကြွေးကျန်ရရှိရေးအတွက် ဓာတ်အားခကောက်ခံခြင်းကို အလေးထား ဆောင်ရွက်နေကြောင်း သိရသည်။

"ဝန်ထမ်းဆိုတာကို မည်သည့်အဖွဲ့အစည်းမဆို ဝန်ထမ်းလို့ နားလည်ဖို့လိုပါတယ်။ မည်သည့်အစိုးရပဲ တက်တက် ဗျူရိုကရေစီအုပ်ချုပ်ရေးယန္တရားကိုလည်ပတ်အောင် ဝန်ထမ်းကလုပ်ရတယ်။ အဲဒါကို နားလည်မှ ဝန်ထမ်းတွေကို နိုင်ငံရေးကစားပွဲထဲကို မတွဲမိအောင် ဆောင်ရွက်ကြရမယ်လေ။ အခုကတော့ သားကောင်ဖြစ်တာပေါ့ဗျာ။ အမှန်က ဗျူရိုကရေစီယန္တရားအရ ဝန်ထမ်းတွေလိုအပ်တာပေါ့။ စိုက်ပျိုးရေး၊ မွေးမြူရေး၊ လျှပ်စစ် စသည်ဖြင့်ပေါ့ နိုင်ငံရေး ဟာ နိုင်ငံရေးပဲလေ။ အစိုးရတစ်ရပ်ရဲ့မောင်းနှင်အားကတော့ ဝန်ထမ်းပဲ။ ဘယ်သူပဲ အစိုးရတက်တက်ပေါ့။ အဲဒီလို မျိုးအမြင်ရှိရင် ဝန်ထမ်းတွေကို သတ်တယ်၊ ဖြတ်တယ်တွေဆိုတာက လျော့သွားနိုင်တာပေါ့။ ဒါပေမယ့် အဲဒီလိုမျိုး အမြင်မကျယ်ကြလို့သာ ဒီလိုမျိုးသတ်တာတွေရှိတာပေါ့။ မလုပ်အပ်ဘူးလို့ပဲ မြင်ပါတယ်။ ဒါတွေက အဓိကက လူမှု့အဖွဲ့အစည်းအတွက် လိုအပ်တဲ့မောင်းနှင်အားတွေပဲလေ" ဟု ရခိုင့်ဦးဆောင်ပါတီဥက္ကဋ္ဌ ဒေါက်တာ အေးမောင်က NP News ကို သုံးသပ်ပြောကြားထားသည်။

နစကအနေဖြင့် ပြီးခဲ့သည့် သြဂုတ်လ(၁)ရက်မှစ၍  နိုင်ငံတော်အရေးပေါ်ကာလကို (၆)လ ထပ်မံ တိုးမြှင့်သတ်မှတ် ထားပြီး ၂ဝ၂၃ ခုနှစ်၊ ဖေဖော်ဝါရီ(၁)ရက်မှ ဇူလိုင်လ(၃ဝ)ရက်အထိ (၆)လတာကာလအတွင်း ရဟန်းသံဃာ နှင့် သီလရှင်လေးပါး၊ အပြစ်မဲ့ပြည်သူ (၇၇၂)ဦး နှင့် နိုင်ငံ့ဝန်ထမ်း(၂၈)ဦး သေဆုံးထားကြောင်း သိရသည်။