မျိုးကြီး (NSS) - စက်တင်ဘာ ၁ဝ

ရခိုင်လက်နက်ကိုင်အဖွဲ့ ULA/AA က ခေါ်ဆောင်ထားသည့် ပါတီဒုဥက္ကဋ္ဌ နှင့် ဗဟိုအကြံပေးအဖွဲ့ဝင်ကို အမြန်ဆုံးလွှတ်ပေးရန် ရခိုင့်ဦးဆောင်ပါတီက တောင်းဆိုလိုက်သည်။

ဒေါက်တာအေးမောင် ဦးဆောင်သော ရခိုင့်ဦးဆောင်ပါတီ(AFP)က ယမန်နေ့(စက်တင်ဘာ ၉ ရက်) တွင် အထက်ပါကဲ့သို့ထုတ်ပြန်ကာ တောင်းဆိုလိုက်ခြင်းဖြစ်သည်။

ရခိုင့်ဦးဆောင်ပါတီမှ ဒုတိယဥက္ကဋ္ဌဦးကျော်ဇောဦး နှင့် ဗဟိုအကြံပေးအဖွဲ့ဝင် ဦးကျော်လွင်တို့သည် ပြီးခဲ့သော ၂ဝ၂၂ ခုနှစ် အောက်တိုဘာလ နှင့် နိုဝင်ဘာလတို့တွင် ULA/AA အဖွဲ့၏ ဖမ်းဆီးခေါ်ဆောင်ခြင်းခံခဲ့ရပြီး လက်ရှိ အချိန်တွင် တစ်နှစ်ပြည့်မြောက်တော့မည်ဖြစ်သည်။

“အရင်တုန်းကလည်း တရားဝင် statement ထုတ်ပြီးတော့ မတောင်းဆိုဖူးဘူးလေ။ ဒီတစ်ခေါက်တော့ ဦးဥတ္တမနေ့ မှာ မှတ်မှတ်ရရပေါ့နော် လွှတ်ပေးဖို့ တောင်းဆိုတာပါ” ဟု ရခိုင့်ဦးဆောင်ပါတီဥက္ကဋ္ဌဒေါက်တာအေးမောင် က NP News ကို ပြောသည်။

၎င်းတို့နှစ်ဦးသည် မြန်မာ့နိုင်ငံရေးပဋိပက္ခအား ငြိမ်းချမ်းစွာဖြင့် ဆွေးနွေးအဖြေရှာသည့် နိုင်ငံရေးနည်းလမ်းကို သက်ဝင်ယုံကြည်ကြပြီး ကြိုးပမ်းအကောင်အထည်ဖော်နေသူများဖြစ်ကြောင်း ရခိုင့်ဦးဆောင်ပါတီက ဆိုသည်။

 “မဖမ်းသင့်ဘူးပေါ့ဗျာ။ ကျွန်တော်တို့လည်းပဲ နိုင်ငံရေးနည်းနဲ့ ကိုယ့်ဒေသ၊ ကိုယ့်လူမျိုးကောင်းဖို့အတွက် ကြိုးစားနေကြတာပဲလေ။ လက်နက်ကိုင်တော်လှန်ရေးကလည်း သူ့နည်းသူ့ဟန်ယုံကြည်ချက်နဲ့သွားတာကို။ အဲဒီတော့ ပါတီနိုင်ငံရေးမှာ လုပ်နေကြတဲ့သူတွေကို လက်နက်ကိုင်အဖွဲ့အစည်းတွေဘက်က ဖမ်းတယ်ဆီးတယ်ဆိုတာမျိုးက မကောင်းဘူးပေါ့ဗျာ” ဟု ဒေါက်တာအေးမောင်က ဆက်လက်ပြောသည်။

ရခိုင့်ဦးဆောင်ပါတီမှ ဒုဥက္ကဋ္ဌ နှင့် ဗဟိုအကြံပေးအဖွဲ့ဝင်တို့ကို မေးမြန်းစရာရှိသည့်အတွက် ခေါ်ဆောင်ထားခြင်း ဖြစ်ကြောင်း ULA/AA ၏ ပြောခွင့်ရ ဦးခိုင်သုခက သတင်းစာရှင်းလင်းပွဲ၌ ထည့်သွင်းပြောဆိုခဲ့ဖူးသည်။

“မကြာခင်မှာ တစ်နှစ်ပြည့်တော့မယ်။ ခေါ်ယူထားတယ်လို့ပဲ သူတို့ပြောတာဗျ။ ခေါ်ယူထားတယ်ဆိုရင် အခေါ်ခံရ တဲ့ သူအတွက်လည်း အကျိုးမရှိဘူးလေ။ ခေါ်ယူထားတဲ့အဖွဲ့အစည်းအပေါ်မှာလည်း အကျိုးမရှိဘူးလေ။ ကျွန်တော်တို့ နိုင်ငံရေးပါ တီမှာတော့ အင်အားလျော့သွားတာပေါ့။ သူတို့က လူတော်တွေ၊ လူကောင်းတွေဗျ” ဟု ပါတီဥက္ကဋ္ဌဒေါက်တာအေးမောင် က ဆိုသည်။

ထို့ကြောင့် ဦးကျော်ဇောဦးနှင့် ဦးကျော်လွင်တို့အား ၎င်းတို့၏ မိသားစုနှင့်အမြန်ဆုံး တွေ့ဆုံခွင့်ရရှိရေး၊ ပါတီဝင်ထု နှင့် အမြန်ဆုံးတွေ့ဆုံခွင့်ရရှိရေးအတွက် ခေါ်ဆောင်ထားသည့် ULA/AA အနေဖြင့် အမြန်ဆုံးလွှတ်ပေးပါရန် ရခိုင့် ဦးဆောင်ပါတီ က တောင်းဆိုထားသည်။